பூ மழை பொழிந்தது ஹெலிகாப்டர்: மகிழ்ச்சியில் நனைந்தனர் மணமக்கள்!

காரைக்குடி : காரைக்குடி எஸ்.ஆர்.பட்டினத்தில் நடந்த திருமணத்தில், ஹெலிகாப்டர் மூலம் வானிலிருந்து மணமக்களுக்கு பூ தூவப்பட்டது.

சிவகங்கை மாவட்டம் எஸ்.ஆர்.பட்டினத்தை சேர்ந்த ஆறுமுகம் - -கண்ணகி தம்பதியின் இளைய மகன் கவுதமன். இவர்கள் பிரான்சில் வசிக்கின்றனர். கவுதமன் சட்ட ஆலோசகராக உள்ளார். இவருக்கும் அறந்தாங்கியை சேர்ந்த துணை வட்டார வளர்ச்சி அலுவலர் மகள் பானுப்பிரியாவுக்கும் நேற்று, எஸ்.ஆர்.பட்டினத்தில் திருமணம் நடந்தது.

நேற்று முன்தினம், எஸ்.ஆர்.பட்டினத்திலிருந்து, அறந்தாங்கிக்கு பெங்களூரு, 'டெக்கான் சார்ட்டர்ஸ் பிரைவேட் லிமிடெட்' நிறுவன ஹெலிகாப்டரில் நிச்சயத்துக்கு சென்ற மணமகன், அதே ஹெலிகாப்டரில் மணமகளுடன் திரும்பினார். நேற்று காலை, 9:00 மணிக்கு, வீட்டின் அருகில் உள்ள சங்கிலி கருப்பர் கோவிலில் திருமணம் நடந்தது. அப்போது, ஹெலிகாப்டர் இரண்டு முறை வானில் வட்டமிட்டபடி, பூ மழை தூவியது. திருமணம் முடித்த மணமக்கள் மற்றும் உறவினர்கள், ஹெலிகாப்டரில் ஊரை வலம் வந்தனர்.

50 கிலோ கேக் : மதியம் விருந்துக்கு பின், பிரான்ஸ் நாட்டு முறைப்படி, 50 கிலோ கேக் வெட்டி, 12 பாட்டில், 'ஷாம்பெய்ன்' பார்ட்டி நடந்தது. விசாலயன்கோட்டை அரசு பள்ளி மாணவ, மாணவியர், ஆசிரியர்கள் ஹெலிபேட் தளத்தில் நின்ற ஹெலிகாப்டரை பார்வையிட்டனர்.

ஒரு லட்ச ரூபாய் கட்டணம் : டெக்னீசியன் ஒருவர் கூறுகையில், 'எஸ்.ஆர்.பட்டினத்துக்கு பெண் அழைப்புக்காக வந்த ஹெலிகாப்டர், சிங்கிள் இன்ஜின் கொண்டது. இதன் எடை, 1,600 கிலோ. ஒரு மணி நேரத்துக்கு ஒரு லட்சம் ரூபாய் வரை கட்டணமாக வசூலிக்கப்படுகிறது. இதை
விட நவீன ஹெலிகாப்டர்கள் இப்போது உள்ளன' என்றார்.

சென்னையை சேர்ந்த, 'சான்சூயி ஏர்' நிறுவனம் மணமகன் வீட்டாருக்கு ஹெலிகாப்டர் வசதியை ஏற்பாடு செய்து கொடுத்துள்ளது.

நேற்று முன்தினம் மணமக்கள், ஹெலிகாப்டரில் இருந்து இறங்கி, வீடு வரை செல்வதற்காக, குதிரைகள் பொருத்திய சாரட் வண்டிக்கு ஏற்பாடு செய்யப்பட்டிருந்தது. மணமகள் பானுப்பிரியா குடும்பத்தினர், வணங்கும் தெய்வமாக குதிரை இருப்பதால், அவர் அதை தவிர்த்தார். இதை தொடர்ந்து அவர்கள் காரில் ஏறி சென்றனர். மணமகன் தாய், தந்தை மற்றும் உறவினர்கள் சாரட் வண்டியில் வந்தனர்.

தினமலர்