விஜயகாந்த் முயற்சி: தலைவர்கள் ஆதரவு

தமிழகத்தின் 5 முக்கிய பிரச்னைகளுக்காக எதிர்க்கட்சித் தலைவர்களை ஒருங்கிணைக்கும் வகையில் தேமுதிக தலைவர் விஜயகாந்த் எடுத்துள்ள முயற்சிக்கு அனைத்துக் கட்சியினரும் ஆதரவு தெரிவித்துள்ளனர்.

இளங்கோவன் (காங்கிரஸ்): முதல்வர் செய்ய வேண்டிய வேலையை எதிர்க்கட்சித் தலைவர் விஜயகாந்த் செய்துகொண்டிருக்கிறார். காங்கிரஸ் சார்பில் நாசே ராமச்சந்திரனும், கோபண்ணாவும் அவருடன் செல்கின்றனர். தமிழர் நலனில் அக்கறை உள்ள யாரும் இந்த முயற்சிக்கு ஆதரவு அளிப்பர். விஜயகாந்துடனான சந்திப்புக்கும் தேர்தல் கூட்டணிக்கும் எந்தத் தொடர்பும் இல்லை.

ஜி.கே.வாசன் (தமாகா): காவிரி விவகாரம் உள்பட தமிழர் பிரச்னையில் பிரதமர் நரேந்திரமோடி சிறப்பாகச் செயல்படவில்லை. அனைத்துக் கட்சித் தலைவர்களையும் ஒருங்கிணைத்துச் செல்லும் விஜயகாந்த் முயற்சிக்கு முழு ஆதரவு உண்டு. இதற்கும் கூட்டணிக்கும் எந்தத் தொடர்பும் இல்லை. தமாகா சார்பில் எஸ்.ஆர்.பாலசுப்பிரமணியன் செல்வார்.

வைகோ (மதிமுக): காவிரிப் பிரச்னையில் தமிழர்களுக்கு மத்திய அரசு துரோகம் இழைத்து வருகிறது. இந்த நிலையில் விஜயகாந்த் எடுக்கும் முயற்சி பாராட்டத்தக்கது. மதிமுகவின் முழு ஆதரவு உண்டு.

தமிழிசை (பாஜக): மேக்கேதாட்டுவில் கர்நாடகம் அணை கட்ட அனுமதிக்கக் கூடாது என்று பிரதமரை ஏற்கெனவே வலியுறுத்தியுள்ளோம். இந்தச் சூழ்நிலையில் அனைத்துக் கட்சி பிரதிநிதிகளையும் விஜயகாந்த் ஒருங்கிணைத்துச் செல்லும் முயற்சி வரவேற்கத்தக்கது. இதற்கு பாஜகவின் முழு ஆதரவும் உண்டு.

மத்திய அமைச்சர் பொன்.ராதாகிருஷ்ணனும், நானும் செல்ல உள்ளோம்.

ஜி.ராமகிருஷ்ணன் (மார்க்சிஸ்ட்): மார்க்சிஸ்ட் கம்யூனிஸ்ட் கட்சியின் மாநிலக் குழு கூட்டம் நாகையில் நடைபெறுவதால், விஜயகாந்தோடு இணைந்து செல்ல முடியவில்லை. ஆனால், இந்த முயற்சிக்கு ஆதரவு உண்டு.

சந்திப்பு விவரம்

10:50     கோபாலபுரம் கருணாநிதி இல்லம்
11:45     காங்கிரஸ் அலுவலகம் சத்தியமூர்த்தி பவன்
12.20     பாஜக அலுவலகம் கமலாலயம்
12.45     ஆழ்வார்ப்பேட்டை தமாகா அலுவலகம்
1.45     அசோக்நகர் விடுதலைச் சிறுத்தைகள் அலுவலகம்
4.00     மதிமுக அலுவலகம் தாயகம்