இலக்கியத் தோட்ட விருதுகள்

**ayyasamy ram** · **ayyasamy ram** Wed Aug 05, 2015 7:12 pm

-

கனடா தமிழ் இலக்கியத் தோட்டத்தின் பதினைந்தாவது
இயல் விருது விழா ரொறொன்ரோ ராடிஸன் ஹொட்டலில்
யூன் 13ஆம் தேதி நடைபெற்றது.
–
விழாவுக்கு கனடிய எழுத்தாளரும் திரைப்பட இயக்குநருமான
டேவிட் பெஸ்மொஸ்கிஸ் கலந்து கொண்டு சிறப்பித்தார்.
இம்முறை வாழ்நாள் இலக்கியச் சாதனைக்கான இயல் விருது
பா. ஜெயமோகனுக்கு வழங்கப்பட்டது.
–
நவீனத் தமிழின் முக்கிய அடையாளங்களில் ஒருவராகத் திகழும்
ஜெயமோகன் நாவல்கள், சிறுகதைகள், கட்டுரைகள்,
விமர்சனங்கள், நாடகங்கள், சினிமா என பல தளங்களில்
இயங்கிக் கொண்டிருக்கிறார். இயல் விருதைத் தொடர்ந்து
மற்றைய விருதுகளும் வழங்கப்பட்டன.
–
சுந்தர ராமசாமி நினைவாக காலச்சுவடு அறக்கட்டளையால்
நிறுவப்பட்ட ‘கணிமை விருது’ முனைவர் முத்தையா
அண்ணாமலைக்கு வழங்கப்பட்டது.
–
அண்ணாமலை அமெரிக்காவில் பாஸ்டன் மாநிலத்தில் வாழ்ந்து
வருகிறார். தனது எட்டு ஆண்டு உழைப்பில் ‘எழில்’ என்ற
பெயரில் ஒரு கணினி மொழியை உருவாக்கியுள்ளார்.
–
ஓர் ஆங்கிலச் சொல் கூட உபயோகிக்காது, தமிழ் மட்டுமே
அறிந்தவர்கள்கூட இம்மொழியைப் பயன்படுத்த முடியும்.
இவ்வகை முயற்சிகள் இதற்குமுன் எடுக்கப்பட்டிருந்தாலும்
அவை அதன் அடிப்படையைத் தாண்டி முன்னேறவில்லை
என்பதும், இதுவே இவ்வாறாகத் தமிழுக்காக உருவாக்கப்பட்ட
முதற் கணினி மொழி என்பதும் குறிப்பிட வேண்டியது.
–
இது இலவசமாகக் கிடைக்கிறது என்பது இதன் சிறப்பம்சம்.
–
முத்தையாவின் கணிமைச் சேவையைப் பாராட்டி
2014ஆம் ஆண்டுக்கான விருதை முனவர் வெங்கட்ரமணன்
வழங்கினார். புனைவு இலக்கியப் பிரிவில் ‘கனவுச்சிறை’
நாவலுக்காக தேவகாந்தனுக்கும், ‘நஞ்சுண்டகாடு’ நாவலுக்காக
குணா கவியழகனுக்கும் அபுனைவு இலக்கியப் பிரிவில்
‘கூலித்தமிழ்’ நூலுக்காக முத்தையா நித்தியானந்தனுக்கும்,
‘ஜாதியற்றவளின் குரல்’ நூலுக்காக ஜெயராணிக்கும் விருதுகள்
வழங்கப் பட்டன.

சிறந்த கவிதைத் தொகுப்புக்கான விருதை ‘மெசியாவுக்கு
மூன்று மச்சங்கள்’ நூலுக்காக கதிர்பாரதி பெற்றுக் கொண்டார்.
மொழிபெயர்ப்புப் பிரிவில் ‘யாருக்கும் வேண்டாத கண்’ நூலை
மலையாளத்தில் இருந்து தமிழுக்கு மொழிபெயர்ப்பு செய்த
கே வி ஷைலஜாவும்,
‘Madras Studios – Narrative Genre and Idelogy in
Tamil Cinema’ நூலுக்காக சொர்ணவேல் ஈஸ்வரனும் விருதுகள்
பெற்றனர்.

மாணவர் கட்டுரைப் போட்டியில் சிறந்த இரண்டு கட்டுரைகள்
தேர்ந்தெடுக்கப் பட்டு வாசுகி கைலாசம், யுகேந்திரா ரகுநாதன்
விருது பெற்றார்கள். விழாவுக்குப் பல நாடுகளில் இருந்து
எழுத்தாளர்களும் கல்வியாளர்களும் ஆர்வலர்களும் வருகை
தந்து சிறப்பித்தார்கள்.
–
————————————————-

ரவிச்சந்திரிகா
நன்றி- காலச்சுவடு