அடங்காநல்லூர் - கவிப்பேரரசு வைரமுத்து

**ayyasamy ram** · **ayyasamy ram** Sat Jan 16, 2016 4:38 am

-

போதும்
எங்களை முட்டாதீர்
இதற்குமேலும் எங்கள்
வால் முறுக்காதீர்
-
தயவுசெய்து
எங்கள் கொம்புகள் மீது
அரசியல் சாயம் பூசாதீர்
மூக்கணாங் கயிறுருவி
நைலான் கயிறு பூட்டாதீர்
-
திமிலின் ஒட்டிய ஈயோட்டுவதாய்
ஈட்டி எறியாதே சட்டமே
இனியும் தடுத்தால்
பூம்பூம் மாடாகி விடுவதன்றி
வேறு வழியில்லை
-
உங்களுக்கு ஆகஸ்ட் 15
எங்களுக்கு இன்றுதான்
ஆண்டெல்லாம் எங்களை
அடிமைகொண்ட மனிதனை
ஒருநாள் வென்றெடுக்கும் வாய்ப்புக்காக
வாடி வாசலில் காத்திருக்கிறோம்
ஏறு தழுவுதல் என்ற தமிழன்
எப்படி எங்களை காயம் செய்வான்?
-
தழுவுதல் குற்றமெனில்
காதலுமில்லை; காளையுமில்லை
அடிமாடு லாபம்
பிடிமாடு பாவமெனில்
பிள்ளைக்கறி லாபம்
பிள்ளைதழுவல் பாவமோ?
-
ஒவ்வொன்றாய் இழந்த தமிழா
அன்னம் இழந்தாய்
அன்றில் இழந்தாய்
சிட்டுக் குருவிகளையும்
வானில் தொலைக்கிறாய்
கடைசியில் காளையினத்தையும்
தொலைத்துவிடாதே!
-
வேளாண்மைக் கலாசாரத்தின்
உயிர் விஞ்ஞானம் நாங்கள்
எங்களைக்
கட்டித் தழுவிக்
காப்பாற்றுங்கள்!
-
---------------------------
பொங்கல் மலர் - தினமலர்