அதிமுக, திமுகவை தேர்தலில் தோற்கடிப்போம்: மதுரை மாநாட்டில் வைகோ சபதம்

சட்டப்பேரவைத் தேர்தலில் அதிமுக, திமுகவை தோற்கடிப்போம் என மதிமுக பொதுச் செயலர் வைகோ தெரிவித்தார்.

மதுரை ஒத்தக்கடையில் மக்கள் நல கூட்டணி மாற்று அரசியல் எழுச்சி மாநாடு நேற்று நடைபெற்றது. இதில் விடுதலைச் சிறுத்தைகள் கட்சியின் நிறுவனத் தலைவர் திருமாவளவன் பேசியது:

அதிமுக, திமுகவால் தமிழகத்துக்கு ஆபத்து ஏற்பட்டுள்ளது. 1967-ம் ஆண்டில் காங்கிரஸ் ஆட்சிக்கு எதிராக ஏற்பட்டதுபோன்ற அதிருப்தி தற்போது அதிமுக, திமுகவுக்கு எதிராக இருக்கிறது. இந்த இரு கட்சிகளுக்கும் உண்மையான மாற்று மக்கள் நல கூட்டணிதான். இந்த தேர்தல் ஜனநாயகத்துக்கும், சர்வாதிகாரத்துக்கும் இடையே நடக்கும் மாபெரும் யுத்தம். திமுகவை அண்ணாதுரை ஆரம்பித்தபோது அந்த கட்சி பெரிய கட்சியில்லை. அந்த கட்சிதான் காங்கிரஸை வீழ்த்தியது. அப்படி போன்ற ஆட்சி மாற்றம், இந்த தேர்தலில் மக்கள் நல கூட்டணியால் நடக்கும்.

எந்த கட்சியும் கூட்டணிக்கு வரும் என இந்த கூட்டணியை உருவாக்கவில்லை. மாற்று அரசியல், மாற்று அரசு வேண்டும் என்பதற்காகவே மக்கள் நல கூட்டணி உருவாக்கப்பட்டது. பெரும்பாலான மாநிலங்களில் கூட்டணி ஆட்சிதான் நடக்கிறது. திமுக, அதிமுக கட்சிகள் கூட்டணி ஆட்சிக்கு ஒருபோதும் சம்மதிக்க மாட்டார்கள். மக்கள் நல கூட்டணி வெற்றி பெற்று கூட்டணி ஆட்சி அமைக்கும். நேர்மையான வெளிப்படையான ஆட்சி நிர்வாகம் நடக்கும். கடைசி வரை இதே ஒற்றுமையுடன் நின்று தேர்தலை சந்திப்போம் என்றார்.

மதிமுக பொதுச் செயலர் வைகோ பேசியது:

ஜன. 26-ம் தேதி இந்தியாவின் குடியரசு நாள். இந்த நாளில் அதிமுக, திமுகவை தோல்வி என்னும் பள்ளத்தாக்கில் தூக்கி எறிவோம் என சபதம் ஏற்போம். இந்த கூட்டணியில் இவர்கள் தொடர்ந்து நீடிப்பார்களா அல்லது விலை போய்விடுவார்களா என்றெல்லாம் சிலர் பேசுகிறார்கள்.

அவர்கள் தப்பு கணக்கு போடுகிறார்கள். அந்த கணக்கு ஒருபோகும் ஈடேறாது. உலகில் எங்கும் கிடைக்காத தாதுமணல், கிரானைட் கற்கள் தமிழகத்தில் இருக்கின்றன. அந்த தாதுமணல், கிரானைட் கொள்ளை விசாரணை அறிக்கைகள் என்னாச்சு? ஆயிரக்கணக்கான ஆண்டுகள் நமது முன்னோர் பாதுகாத்த நதிகள் இன்று மணல் கொள்ளையால் அழிகின்றன. கற்பனை செய்து பார்க்க முடியாத அளவுக்கு 60 லட்சம் கோடி ரூபாய் அளவுக்கு கொள்ளை நடந்துள்ளது. கடைசியாக மதுரையின் யானைமலையை வெட்டி சிதைத்து வெளிநாட்டுக்கு ஏற்றுமதி செய்யவும் திட்டமிட்டனர்.இப்பகுதியை சேர்ந்த மக்கள் ஒன்றுதிரண்டு திட்டத்தை தடுத்தனர்.

எடுத்ததெற்கெல்லாம் பக்கம் பக்கமாக அறிக்கை வெளியிடும் கருணாநிதி, கிரானைட், தாதுமணல் கொள்ளை பற்றி வாய் திறக்கவில்லை. தற்போது அவரும் நேர்மையான ஆட்சி செய்வோம் என மக்களை சந்திக்கிறார். மக்கள் அவரை ஒருபோதும் நம்ப மாட்டார்கள் என்றார்.


நன்றி ஹிந்து

-

இவரும் தில்லியில் தனக்கென ஒரு லாபி வைத்து,
நிறையவே சம்பாதித்து கொண்டு தான் இருக்கிறார்.

ஊழல் செய்வதில் அளவு மட்டுமே வித்தியாசம், இதில்
உத்தமரென முழக்கத்திற்கு ஒன்னும் குறைச்சல் இல்லை.