பட்டாபிராம் அருகே இரு ரயில்கள் மோதல்:புறநகர் ரயில்கள் ரத்து: பயணிகள் அவதி

-
பட்டாபிராம் அருகே விரைவு ரயிலும், புறநகர் மின்சார ரயிலும் வியாழக்கிழமை (மே 5) மோதிக் கொண்ட விபத்து காரணமாக, சென்னை -அரக்கோணம் மார்க்கத்திலும், அரக்கோணம் – சென்னை மார்க்கத்திலும் இயக்கப்பட்ட ரயில்கள் ரத்து செய்யப்பட்டன. இதனால் பயணிகள் அவதிக்குள்ளாயினர்.

–

திருவள்ளூர் மாவட்டம் பட்டாபிராம் அருகே வியாழக்கிழமை இரவு 8.15 மணிக்கு விபத்து நடத்த இடத்தை தெற்கு ரயில்வே பொது மேலாளர் வசிஷ்ட ஜோரி உள்ளிட்டோர் பார்வையிட்டு, சீரமைப்பு நடவடிக்கைகளை துரிதப்படுத்தினர். இதைத் தொடர்ந்து இரவு 9.30 மணி அளவில் ஒரு பாதை சரி செய்யப்பட்டதையடுத்து ரயில் போக்குவரத்து மீண்டும் தொடங்கியது.

விபத்து நடந்தது எப்படி? சென்னை சென்ட்ரலில் இருந்து திருவனந்தபுரம் செல்லும் விரைவு ரயில் வியாழக்கிழமை இரவு 7.40 மணிக்கு சென்ட்ரலில் இருந்து புறப்பட்டுச் சென்றது. சென்னையில் இருந்து 3-ஆவது அகல ரயில் பாதையில் சென்று கொண்டிருந்த விரைவு ரயில், பட்டாபிராம் அருகே மிலிட்டரி சைடிங் செல்ல தண்டவாளத்தைக் கடந்து கொண்டிருந்த புறநகர் மின்சார ரயில் மீது மோதியது.

–
7 பயணிகளுக்கு லேசான காயம்: இதனால், புறநகர் மின்சார ரயிலின் இரண்டு பெட்டிகள் தண்டவாளத்தை விட்டு கீழே இறங்கின. இந்த விபத்தில் புறநகர் மின்சார ரயிலில் பயணம் செய்த 7 பயணிகளுக்கு லேசான காயம் ஏற்பட்டது. அவர்களுக்கு முதலுதவி வழங்கப்பட்டு மேல் சிகிச்சைக்காக ஆவடி அரசு மருத்துவமனையில் அனுமதிக்கப்பட்டனர். இரு ரயில்களும் மிகவும் குறைந்த வேகத்தில் இயக்கப்பட்டிருந்ததால், பெரும் பாதிப்பு ஏற்படவில்லை.
–
விபத்து காரணமாக சென்னை – அரக்கோணம் மார்க்கத்திலும், அரக்கோணம்- சென்னை மார்க்கத்திலும் அனைத்து ரயில்களும் தாற்காலிகமாக நிறுத்தப்பட்டன. சென்னை சென்ட்ரலில் இருந்து இரவு 8 மணியளவில் ஆலப்புழை செல்லும் விரைவு ரயில் நேரம் குறிப்பிடாமல் தாற்காலிகமாக ரத்து செய்யப்பட்டது. 8.05-க்கு மங்களூர் செல்லும் விரைவு ரயில் தாமதமாக 10.25-க்கு இயக்கப்பட்டது. இதனால் திருவள்ளூர், கடம்பத்தூர், திருநின்றவூர், செவ்வாப்பேட்டை உள்ளிட்ட சுற்றியுள்ள பகுதிகளில் இருந்து சென்னை, அரக்கோணம் செல்லக் காத்திருந்த பயணிகள் மிகவும் அவதிப்பட்டனர்.
-
விபத்துக்கு யார் காரணம்? நேராகச் செல்லும் திருவனந்தபுரம் விரைவு ரயிலுக்கு சிக்னல் கொடுத்திருந்தால், முதல் தண்டவாளத்தில் இருந்து 4-ஆவது தண்டவாளத்தைக் கடந்து செல்லும் புறநகர் மின்சார ரயிலுக்கு சிக்னல் கிடைத்திருக்காது.
–
புறநகர் மின்சார ரயிலுக்கு சிக்னல் கொடுத்திருந்தால், விரைவு ரயிலுக்கு சிக்னல் கிடைத்திருக்காது. எனவே விபத்துக்குக் காரணம் சிக்னல் அல்லது ஓட்டுநரின் கவனக் குறைபாடாக இருக்கும் என உயரதிகாரிகளும், ரயில்வே போலீஸாரும் கருதுகின்றனர்.

–

தினமணி