தொழில்துறையில் சாதிக்கும் தலைமுறைதான் இந்தியாவுக்கு தேவை: மத்திய அமைச்சர் ராஜீவ் பிரதாப் ரூடி தகவல்

-

தொழில்துறையில் சாதிக்கும் தலைமுறைதான் இந்தியாவுக்கு தேவை. அதற்கான தொடக்கமாகவே பண மதிப்பு நீக்க நடவடிக்கை மேற்கொள்ளப்பட்டுள்ளதாக மத்திய அமைச்சர் ராஜீவ் பிரதாப் ரூடி தெரிவித்துள்ளார்.

கோவையில் கொடிசியா, இந்திய தொழில்வர்த்தக சபை ஆகியவை இணைந்து ‘மின்னணு பணப் பரிவர்த்தனை’ குறித்த கருத்தரங்கை நடத்தின.

சிறப்பு விருந்தினராக மத்திய தொழில் திறன் மேம்பாட்டுதுறை அமைச்சர் ராஜீவ் பிரதாப் ரூடி பங்கேற்றார். அவர் பேசியதாவது: பிஹாருடன் ஒப்பிடும்போது கோவையில் உண்மையான தொழில் வளர்ச்சியை பார்க்க முடிகிறது. பிஹாரில் 20 மில்லியன் மக்கள் உள்ளனர். வங்காளம், பூடான், நேபாளம் என தேச எல்லைகளும் உள்ளன. ஆனால் வளர்ச்சி பெற்ற ஒரு தொழிற்சாலை கூட இல்லை. ஆனால், கோவை, தொழில்துறையில், தேச வளர்ச்சிக்கே உதவி வருவது பெருமையானது.

பணமில்லா வர்த்தகத்துக்காக அரசு எடுத்துள்ள நடவடிக்கைகள் குறித்து இளைய தலைமுறையினர் புரிந்து கொள்ள வேண்டும். இந்நடவடிக்கையால் பாதித்துள்ளதாக தொழில்துறை யினர் கூறுகின்றனர். அதை புரிந்து கொள்ள முடிகிறது. ஆனால் இந்த நடவடிக்கையால் வளரும் தொழில் நிறுவனங்களுக்கு நல்ல வாய்ப்புகள் உருவாகும். தேச நலனுக்காகவே இந்த நடவடிக்கை எடுக்கப்பட்டுள்ளது. பண மதிப்பு நீக்க நடவடிக்கையால் ஏற்பட்டுள்ள பிரச்சினைகள் விரைவில் சரியாகக் கூடியவையே.

வட, வடகிழக்கு மாநிலங்களில் 72% மக்கள், 2 டாலர் மதிப்பிலான தனிநபர் வருமானத்தை வைத்துக் கொண்டே வாழ்க்கை நடத்துகிறார்கள். அதுபோன்ற சீரற்ற நிலைகளை சரிப்படுத்த வேண்டியுள்ளது. இந்த நடவடிக்கை என்ன பயன் தரப்போகிறது என்பதை அறிந்து அரசு அதில் இறங்கியுள்ளது. இந்த நடவடிக்கையால் கிடைக்கும் வெற்றி, தொழில்துறைக்கு கிடைக்கும் வெற்றியாகும்.

இளைஞர்களின் திறன் மேம்பாட்டுக்காக ஆண்டுதோறும் அரசு ரூ.1000 கோடியை ஒதுக்குகிறது. ஆனால் அதன் பயன் என்ன?. உலகம் முழுவதும், திறன் மேம்பாட்டுக் கல்வியை வகுப்பறைக்குள் வைத்து கற்றுக் கொடுப்பதில்லை. தொழிற்கூடங்களில் கற்றுக் கொடுக்கிறார்கள். ஆனால் நாம் அப்படி இல்லை. பட்டதாரிகளை மட்டுமே உருவாக்குகிறோம். இளைஞர்களின் திறன் மேம்பாட்டில் நாம் கவனம் செலுத்த வேண்டும். மனிதவளத்துக்கு ஈடான, திறன் மேம்பாடு இருந்தால் மட்டுமே தொழில்வளத்தில் இந்தியா சாதிக்க முடியும். அதற்கான முயற்சியை மத்திய அரசு எடுத்துள்ளது.

பள்ளிப்படிப்பு முடிக்கும் மாணவர்கள், சுயமாக வேலைவாய்ப்பை பெறும் அளவுக்கு அவர்களுக்கு பயிற்சி அளிக்க வேண்டுமென பிரதமர் நரேந்திரமோடி திட்டமிட்டுள்ளார். தொழிற்கல்விக்கான ஐடிஐ குறித்து நமக்கு என்ன விழிப்புணர்வு உள்ளது. மற்ற படிப்புகளுக்கு கொடுக்கும் முக்கியத்துவம் ஐடிஐக்கு கொடுப்பதில்லை. ஆனால் நாட்டின் தொழில்துறைக்கே 13000 தொழிற்பயிற்சி நிறுவனங்கள்தான் முதுகெலும்பாக உள்ளன. எனவே ஐடிஐகளுக்கு முக்கியத்துவம் தரப்பட வேண்டும்.

ஐடிஐ சான்றிதழ்களுக்கான மதிப்பை உயர்த்தி, ஐடிஐ முடிப்போர், பாலிடெக்னிக், பொறியியல் துறையில் எளிதில் செல்ல வழிவகைகள் உருவாக்கப்படும். தொழில்துறையில் சாதிக்கும் தலைமுறைதான் இந்தியாவுக்கு தேவை. அதற்கான திறன் மேம்பாட்டுப் பயிற்சிகளை பள்ளியில் இருந்தே வழங்க வேண்டும். எனவே அனைத்துக்கும் ஆரம்பமாக, பண மதிப்பு நீக்க நடவடிக்கை எடுக்கப்பட்டுள்ளது. மெல்ல மெல்ல அதன் பாதிப்புகள் குறையும். அதன் பிறகு தொழில்துறை வளர்ச்சி பல மடங்கு பெருகும் என்பதே உண்மை. இவ்வாறு அவர் பேசினார்.

தொழில் வர்த்தக சபைத் தலைவர் வனிதா மோகன், கொடிசியா தலைவர் வி.சுந்தரம், மத்திய கயிறு வாரியத் தலைவர் சி.பி.ராதாகிருஷ்ணன் உள்ளிட்டோர் கலந்து கொண்டனர்.

கருத்தரங்கில் நிதி ஆயோக் சார்பில் மின்னணு பணப் பரிவர்த்தனைக்கான வழிமுறைகளை விளக்கும் குறும்படம் திரையிடப்பட்டது. செல்போன் மூலம் வங்கிச் சேவைகளை பயன்படுத்துவது குறித்து விளக்கம் அளிக்கப்பட்டது.
-
தி இந்து