ஆஸ்திரேலியாவுடன் ஒருநாள் போட்டி தொடர்: இந்திய மகளிர் அணிக்கு கேப்டனாக நீடிக்கிறார் மித்தாலி

மும்பை:
ஆஸ்திரேலிய மகளிர் கிரிக்கெட் அணியுடன் ஒருநாள்
போட்டித் தொடரில் விளையாட உள்ள இந்திய அணிக்கு
மித்தாலி ராஜ் கேப்டனாக நீடிப்பார் என கிரிக்கெட் வாரியம்
அறிவித்துள்ளது.

மார்ச் மாதம் 2வது வாரத்தில் இந்தியா வரும் ஆஸ்திரேலிய
மகளிர் கிரிக்கெட் அணி, 3 போட்டிகள் கொண்ட ஒருநாள்
தொடரில் விளையாட உள்ளது.

இந்த தொடருக்கான இந்திய அணி வீராங்கனைகள் தேர்வு
நேற்று நடைபெற்றது. தென் ஆப்ரிக்க அணிக்கு எதிராக
சமீபத்தில் நடந்த ஒருநாள் போட்டித் தொடரில், இந்திய
அணியை சிறப்பாக வழிநடத்தி 2-1 என்ற கணக்கில் தொடரை
கைப்பற்றிய மித்தாலி ராஜ் கேப்டனாக நீடிக்கிறார்.

மித்தாலி உட்பட மொத்தம் 15 வீராங்கனைகள் அடங்கிய
அணியை பிசிசிஐ செயலர் அமிதாப் சவுதாரி அறிவித்தார்.
இந்த தொடர் ஐசிசி மகளிர் ஒருநாள் சாம்பியன்ஷிப்பின்
அங்கமாக நடைபெற உள்ளது குறிப்பிடத்தக்கது.

இந்தியா - ஆஸ்திரேலியா மகளிர் அணிகள் மோதும் முதல்
ஒருநாள் போட்டி, வதோதராவில் மார்ச் 12ம் தேதி நடக்கிறது.
அடுத்த 2 போட்டிகள் மார்ச் 15 மற்றும் 18ம் தேதி அதே
மைதானத்தில் நடக்க உள்ளன.

இதைத் தொடர்ந்து முத்தரப்பு டி20 தொடர் நடக்க உள்ளது.
இத்தொடருக்கான இந்திய அணி பின்னர் அறிவிக்கப்படும்.
தென் ஆப்ரிக்க அணிக்கு எதிராக நடந்த டி20 தொடரில்,
ஹர்மான்பிரீத் கவுர் தலைமையில் களமிறங்கிய இந்திய
அணி 3-1 என்ற கணக்கில் வென்றது குறிப்பிடத்தக்கது.

இந்தியா:
மித்தாலி ராஜ் (கேப்டன்), ஹர்மான்பிரீத் கவுர் (துணை கேப்டன்),
ஸ்மிரிதி மந்தனா, பூனம் ராவுத், ஜெமிமா ரோட்ரிகியூஸ்,
வேதா கிருஷ்ணமூர்த்தி, மோனா மேஷ்ராம், சுஷ்மா வர்மா
(விக்கெட் கீப்பர்), ஏக்தா பிஷ்ட், பூனம் யாதவ்,
ராஜேஷ்வரி கெயிக்வாட், ஷிகா பாண்டே, சுகன்யா பரிதா,
பூஜா வஸ்த்ராகர், தீப்தி ஷர்மா.
-
---------------------------------------
தினகரன்