குடியுரிமை சர்ச்சை: ராகுலுக்கு உள்துறை அமைச்சகம் நோட்டீஸ்

ragul4

காங்கிரஸ் தலைவர் ராகுல் காந்தி எந்த நாட்டுக் குடிமகன் என்பதை
உறுதி செய்ய வேண்டும் என்று வலியுறுத்தி அவருக்கு மத்திய உள்துறை
அமைச்சகம் நோட்டீஸ் அனுப்பியுள்ளது.

பாஜக எம்.பி.யும், அக்கட்சியின் மூத்த தலைவருமான
சுப்பிரமணியன் சுவாமி அளித்த புகாரின் அடிப்படையில் இந்த நோட்டீஸ்
அனுப்பப்பட்டுள்ளது. மக்களவைத் தேர்தல் நடைபெற்று வரும் நிலையில்
ராகுல் காந்தியின் குடியுரிமை குறித்து அவரிடம் விளக்கம் கேட்கப்பட்டுள்ளது
தேசிய அரசியலில் பெரும் பரபரப்பை ஏற்படுத்தியுள்ளது.

குடியுரிமை தொடர்பான புகார் என்ற பொருளில் ராகுல் காந்திக்கு உள்துறை
அமைச்சகத்தின் குடியுரிமைப் பிரிவு இயக்குநர் அனுப்பியுள்ள நோட்டீஸில்
கூறப்பட்டுள்ளதாவது:

உங்கள் குடியுரிமை தொடர்பாக மாநிலங்களவை
எம்.பி. சுப்பிரமணியன் சுவாமி புகார் அளித்துள்ளார். அதில், பிரிட்டனில்
2003-ஆம் ஆண்டு பதிவு செய்யப்பட்ட ஒரு நிறுவனத்தின் இயக்குநராக
உங்கள் பெயர் இடம் பெற்றுள்ளது. உங்கள் பிறந்த தினம் 19 ஜூன் 1970 என்றும்
தெரிவிக்கப்பட்டுள்ளது.

அந்த நிறுவனத்தின் ஆண்டறிக்கைகளில் நீங்கள் (ராகுல் காந்தி) பிரிட்டன்
நாட்டு குடிமகன் என்று கூறப்பட்டுள்ளது. இது தொடர்பாக அந்த நிறுவனத்திடம்
விவரம் கேட்கப்பட்டபோது அந்த நிறுவனமும் நீங்கள் பிரிட்டன் குடிமகன்
என்பதை உறுதி செய்துள்ளது.

இது தொடர்பான கடிதத்தை தனது புகாரில் சுப்பிரமணியன் சுவாமி
இணைத்துள்ளார். எனவே இந்த விஷயத்தில் உண்மையான நிலவரம் என்ன
என்பதை 15 நாள்களுக்குள் உள்துறை அமைச்சகத்திடம் தெரிவிக்க வேண்டும்
என்று கூறப்பட்டுள்ளது.

இது தொடர்பாக உள்துறை அமைச்சக அதிகாரிகள் கூறுகையில், கடந்த 2017-
ஆம் ஆண்டிலேயே இது தொடர்பாக உள்துறை அமைச்சகத்துக்கு
சுப்பிரமணியன் சுவாமி கடிதம் எழுதியுள்ளார். இப்போது அவர் மீண்டும் தனது
புகார் குறித்து நினைவூட்டல் கடிதத்தை அமைச்சகத்துக்கு அனுப்பினார். இ
தையடுத்து ராகுலிடம் விளக்கம் கேட்டு நோட்டீஸ் அனுப்பப்பட்டுள்ளது என்றனர்.

வழக்கமான நடைமுறைதான் - ராஜ்நாத் சிங்: லக்னெளவில் செய்தியாளர்களிடம்
செவ்வாய்க்கிழமை பேசிய மத்திய உள்துறை அமைச்சர் ராஜ்நாத் சிங், எம்.பி.
ஒருவர் மத்திய அமைச்சகத்துக்கு புகார் கடிதம் அனுப்பினால், இது தொடர்பாக
முடிந்த அளவுக்கு விரைவாக நடவடிக்கை எடுக்கப்படுவது வழக்கம்.
இது பெரிய விஷயமல்ல. வழக்கமான நடைமுறைதான் என்றார்.

மக்களவைத் தேர்தல் நடைபெற்று வரும் நிலையில் பிரதான எதிர்க்கட்சித்
தலைவரின் குடியுரிமை குறித்து நோட்டீஸ் அனுப்பியுள்ளது பரபரப்பை
ஏற்படுத்துவதற்காகவா? என்ற கேள்விக்கு, அப்படி எதுவும் இல்லை. இதே கேள்வி
நாடாளுமன்றத்திலும் முன்பு எழுப்பப்பட்டுள்ளது.

இந்த விஷயத்தை, நாடாளுமன்ற உறுப்பினர் (சுப்பிரமணியன் சுவாமி) பலமுறை
உள்துறை அமைச்சகத்திடம் எழுப்பியுள்ளார். அதன் அடிப்படையில்தான் நடவடிக்கை
எடுக்கப்பட்டுள்ளது என்றார். குடியுரிமை விவகாரம் தொடர்பாக பாஜக மூத்த தலைவர்
எல்.கே. அத்வானி தலைமையிலான நாடாளுமன்ற நெறிமுறைகள் குழுவுக்கு
விளக்கமளித்த ராகுல், நான் பிரிட்டன் குடியுரிமை பெறவும் இல்லை அதனைக் கோரவும்
இல்லை. எனது அடையாளம் இந்தியன் என்பது மட்டும்தான் என்று தெரிவித்திருந்தார்.

முன்னதாக, கடந்த 2015-ஆம் ஆண்டு ராகுலின் குடியுரிமை குறித்து சிபிஐ
விசாரணைக்கு உத்தரவிட வேண்டும் என்று கோரி உச்சநீதிமன்றத்தில் பொதுநல
மனு தாக்கல் செய்யப்பட்டது. அந்த மனுவை உச்சநீதிமன்றம் நிராகரித்துவிட்டது
குறிப்பிடத்தக்கது.

இரு நாட்டு குடியுரிமை வைத்திருப்பவர்கள் இந்தியாவில் தேர்தலில் போட்டியிட
முடியாது. இந்திய குடிமகன்கள் மட்டுமே தேர்தலில் களமிறங்க முடியும்.
-
----------------------------------------------
தினமணி