ஒரே ஒரு படம்:உலக ஊடகங்களில் முதலிடம்!யாரப்பா அந்த ‘செல்பி’ புள்ள?

**ayyasamy ram** · **ayyasamy ram** Wed Sep 25, 2019 10:21 am

நம்மூரில், பொது நிகழ்ச்சியொன்றில் தமக்கு முன்னால் கையை நீட்டி செல்பி எடுக்க முயன்ற இளைஞரின் மொபைல்போனை, ஆத்திர மிகுதியால் ஓங்கி கையால் தட்டி, கீழே தள்ளி, உடைத்த சிடுசிடு நடிகர் சிவக்குமாரை நாம் கண்டிருக்கிறோம்.

இப்படி ‘தட்டிவிட்ட’ வரிசையில் ஆத்திர அரசியல் தலைவர்கள், நடிகர்கள் சிலரும் அடங்குவர்; கேரள முதல்வர் பினராயி விஜயனும், அப்படி செய்தவரே. தம்முடன் ‘செல்பி’ எடுப்பது என்பது, தங்களை அவமதிக்கும் செயலாகவே பிரபலங்கள் பலரும் கருதுகின்றனர்; அதுவே, அவர்களின் கோபத்துக்கு காரணம்.

ஆனால், அகில உலகையே ஆட்டிப்படைக்கும் ஆளுமை மிக்க அமெரிக்க அதிபர் டொனால்டு டிரம்பையும், இந்தியாவின் வலிமை மிக்க பிரதமர் மோடியையும், ஒரே நேரத்தில் மிக அருகில் அழைத்து, ‘எக்ஸ்கியூஸ்மி… ப்ளீஸ்… உங்களுடன் ஒரு செல்பி எடுத்துக்கொள்ள அனுமதிப்பீர்களா?’ என, ஒரு சிறுவன் துணிச்சலுடன் கேட்கிறான்.

‘அதற்கென்ன…’ என்றவாறு மோடியும், டிரம்ப்பும் சிறுவன் பின்னால், புன்னகை பூத்தவாறு கைகோர்த்து நிற்கின்றனர், பொறுமையுடன் சிறுவன்சில வினாடிகள் தமது மொபைல் போனில் செல்பிஎடுக்கும் வரை.படம் எடுத்து முடித்ததும் சிறுவன் சின்னதாக ஒரு சிரிப்பை உதிர்க்கிறான்.

அவன் முதுகில் செல்லமாக ஒரு தட்டு தட்டிய மோடி, ஏதோ கமென்ட் அடித்து வாய்விட்டு சிரிக்க… அதைக்கேட்டு அமெரிக்க அதிபர் டிரம்ப்பும் தன் பங்கிற்கு சிரித்தவாரே, சிறுவனுடன் செல்லமாக கைலுக்கி பாராட்டிவிட்டு அங்கிருந்து நகர்கின்றனர்.

அருகில் மேடையிருந்தோர் அதிசயத்து போகின்றனர், இந்த அற்புதமான தலைவர்களின் எளிய அணுகுமுறையைக் கண்டு… வியக்கின்றனர், சிறுவனுக்கு இவ்வளவு துணிச்சலா என்று..இச்சம்பவம் நடந்தது கடந்த, 22ம் தேதி. அமெரிக்காவின் ஹூஸ்டன் நகரில், 50 ஆயிரம் அமெரிக்க வாழ் இந்தியர்களுடனான, ‘ஹவுடி மோடி ‘ நிகழ்ச்சி அரங்கின் மேடையில். இச்சிறுவன் எடுத்த செல்பி படம், ஊடகங்களில் பரவி, ‘தலைக்கணம்’ இல்லாத இரு பெரும் தலைவர்களின் பெருந்தன்மையை உலகமெங்கும் பறைசாற்றின.

மோடி தன் ‘டுவிட்டர்’ பக்கத்தில் சிறுவனின் செல்பி படத்தை பகிர்ந்து பாராட்ட, வெள்ளை மாளிகையும் அதே செல்பி நெருப்பை பற்ற வைத்தது. அவ்வளவுதான் யார் அந்த சிறுவன், இரு பெரும் தலைவர்களை அருகில் அழைத்து செல்பி எடுக்கும் அளவிற்கு இவ்வளவு துணிச்சலா, அவனது பெற்றோர் யார் என்ற கேள்விகள் பலரையும் குடைந்தன. இந்த சிறுவன் எடுத்த படம்தான், இந்தாண்டின் வரலாற்றுச் சிறப்பு வாய்ந்த, உலகளவில் புகழ்பெற்ற படம் என்ற பெருமையை பெற்றிருக்கிறது.

யார் அந்த சிறுவன்?

கர்நாடக மாநிலம், உத்தர கர்நாடகா மாவட்டம், சிர்ஸி எனும் இடத்தை சேர்ந்தவர் பிரபாகர் ஹெக்டே. தகவல் தொழில்நுட்பத் துறை இன்ஜினியர். இவரது மகன் சாத்விக் ஹெக்டே, 13. அமெரிக்கா சான் அன்டோனியா நகரில் உள்ள லுாயிஸ் டி பிராண்டிஸ் உயர்நிலைப் பள்ளியில், ஒன்பதாம் வகுப்பு படித்து வருகிறார்.

கடந்த, 2002ம் ஆண்டு தந்தை பிரபாகர் ஹெக்டே அமெரிக்காவுக்கு வேலை நிமித்தமாக சென்றார். சிறுவனின் தாய் மேகா ஹெக்டே அங்குள்ள பள்ளியில் ஆசிரியையாக பணியாற்றுகிறார். யோகா கலையில் நன்கு ஆர்வம் உள்ள இந்த சிறுவனை, ‘ஹவ்டி மோடி’ கலைநிகழ்ச்சியில் சூர்யநமஸ்காரம் செய்வதற்காக, நிகழ்ச்சி ஏற்பாட்டாளர்கள் தேர்வு செய்துள்ளனர்.

கலை நிகழ்ச்சிக்காக, இந்தியாவின் பாரம்பரிய உடை தரித்து, இதர நடன கலைஞர்களுடன் வி.வி.ஐ.பி.,க்களை வரவேற்க காத்திருந்த நேரத்தில், இன்ப அதிர்ச்சியாக பாதுகாப்பு படைவாரங்கள் எதுவுமின்றி, பிரதமர் மோடியும், அதிபர் டிரம்பும் மேடை நோக்கி வந்து கொண்டிருந்த போதுதான், செல்பி எடுக்கும் அதிர்ஷ்டம் வாய்த்தது.

ஒரே செல்பியில், உலகம் போற்றும் சிறுவனாக வலம் வரும் சாத்விக்கின் தாய்மாமா கணேஷ்ஹெக்டே கூறுகையில், ”பிரதமர் மோடி, அதிபர் டிரம்ப் உடன் செல்பி எடுக்கும் சிறுவனை நாங்கள் கவனித்தோம். நேரடி ஒளிபரப்பின் போது தெளிவாக தெரியாததால் எங்களால் உறுதிப்படுத்தமுடியவில்லை. பின்னர்சாத்விக் வாட்ஸ் ஆப் மூலம் போட்டோக்களை அனுப்பினார். எங்களுக்கு பெரும் மகிழ்ச்சியை தந்தது” என்றார்.

தினமலர்