ரெயில்வேயை தனியார் மயமாக்கும் எண்ணம் இல்லை: சென்னையில், ரெயில்வே வாரிய தலைவர் பேச்சு

-
சென்னை,

சென்னை பெரம்பூர் ரெயில்வே மைதானத்தில் அகில இந்திய
ரெயில்வே தொழிலாளர்கள் சம்மேளனத்தின் 95-வது தேசிய
மாநாடு நேற்று நடைபெற்றது. இந்த மாநாட்டுக்கு ரெயில்வே
வாரிய தலைவர் வினோத்குமார் யாதவ் தலைமை தாங்கினார்.


ரெயில்வே வாரிய உறுப்பினர் மனோஜ் பாண்டே, தெற்கு
ரெயில்வே பொதுமேலாளர் ஜான்தாமஸ், ஐ.சி.எப். பொதுமேலாளர்
ராகுல் ஜெயின், அகில இந்திய ரெயில்வே தொழிலாளர்கள்
சம்மேளனத்தின் பொது செயலாளர் சிவகோபால் மிஸ்ரா,
செயல் தலைவர் என்.கண்ணையா ஆகியோர் முன்னிலை
வகித்தனர்.

இந்த மாநாட்டில் ரெயில்வே வாரிய தலைவர் வினோத்குமார் யாதவ் கூறியதாவது:-

இந்திய ரெயில்வே ஒரு குடும்பம்.
இந்தியாவின் அனைத்து இடங்களிலும், இந்த குடும்பத்தினர்
இருக்கின்றனர். ராணுவத்துக்கு அடுத்தபடியாக ரெயில்வே
ஊழியர்கள் தான் 24 மணிநேரமும் வேலை செய்கின்றனர்.

ரெயில்வே மந்திரி பியூஷ்கோயல் நாடாளுமன்றத்தில் ரெயில்வேயை
தனியார் மயமாக்கமாட்டோம் என கூறியுள்ளார். பின்னர் ஏன் அனைவரும்
தனியார் மயம் பற்றி பேசிக்கொண்டு இருக்கின்றனர்.

ரெயில்வேயை தனியார் மயமாக்கும் எண்ணம் எங்களுக்கு இல்லை.
இந்திய ரெயில்வேயில் 20 ஆயிரம் ரெயில்கள் இயக்கப்பட்டு வருகிறது.
மேலும் அடுத்த ஆண்டில் கூடுதலாக 4 ஆயிரம் ரெயில்கள் இயக்க
திட்டமிட்டுள்ளோம்.

இதில் பயணிகள் அதிகம் பயணிக்கும் சில ரெயில்களில் வழங்கப்படும்
வர்த்தக சேவைகள் மட்டும் தனியாருக்கு வழங்கப்பட உள்ளது. ரெயில்
இயக்கம் தொடர்பான எதுவும் தனியாருக்கு வழங்கப்படவில்லை.
சேவைகளை தனியாருக்கு வழங்குவதற்கு முன்பு ரெயில்வே ஊழியர்
சங்கங்களிடம் கருத்து கேட்டு தான் முடிவு செய்யப்படும்.

தற்போது ரெயில்வே கட்டமைப்புகளை மேம்படுத்தவே நடவடிக்கை எடுத்து
வருகிறோம். இவ்வாறு அவர் கூறினார்.

முன்னதாக ரெயில்வே ஊழியர் சம்மேளனத்தின் செயல் தலைவர்
என்.கண்ணையா பேசினார். இந்த மாநாட்டில் இந்தியா முழுவதும்
உள்ள 30 ஆயிரத்துக்கும் மேற்பட்ட ரெயில்வே ஊழியர்கள் கலந்து
கொண்டனர்.

தினத்தந்தி