வருவாய் வரம்பை உயர்த்த பார்லி., நிலைக் குழு பரிந்துரை

புதுடில்லி

:இதர பிற்படுத்தப்பட்டோருக்கான இட ஒதுக்கீட்டில்,
வருவாய் வரம்பை, தற்போதைய, 8 லட்சம் ரூபாயில் இருந்து,
15 லட்சம் ரூபாயாக உயர்த்தலாம் என, பார்லி., நிலைக் குழு
அறிக்கையில் பரிந்துரைக்கப்பட்டுள்ளது.

தற்போது,
கல்வி மையங்கள் மற்றும் மத்திய அரசு பணிகளில்,
இதர பிற்படுத்தப்பட்டோருக்கு, 27 சதவீதம் இட ஒதுக்கீடு
வழங்கப்படுகிறது. இதற்கான ஆண்டு வருவாய் வரம்பு,
8 லட்சம் ரூபாய் என, நிர்ணயிக்கப்பட்டுள்ளது.

இந்நிலையில், பா.ஜ., - எம்.பி., கணேஷ் சிங் தலைமையிலான,
பிற்படுத்தப்பட்டோர் நல வாழ்வுக்கான பார்லி., நிலைக் குழு,
இதர பிற்படுத்தப்பட்டோரின் இட ஒதுக்கீட்டிற்கான வருவாய்
வரம்பை உயர்த்துவது தொடர்பான அறிக்கையை மத்திய
அரசுக்கு அளித்துள்ளது.

இது குறித்து, இக்குழு உறுப்பினர், விஷ்வம்பர் பிரசாத் நிஷாத்
கூறியதாவது:மத்திய அரசு பணிகள் மற்றும் கல்வி மையங்களில்,
இதர பிற்படுத்தப்பட்டோருக்கு, 27 சதவீதம் இட ஒதுக்கீடு
வழங்கப்படுகிறது. ஆனால், இதற்கான ஆண்டு வருவாய் வரம்பு,
8 லட்சம் ரூபாய் என, நிர்ணயிக்கப்பட்டுள்ளது.

அதனால், இதர பிற்படுத்தப்பட்டோர், இட ஒதுக்கீட்டின் பயனை
முழுமையாக பெற முடியவில்லை. எனவே, இதர
பிற்படுத்தப்பட்டோருக்கான ஆண்டு வருவாய் வரம்பை,
15 லட்சமாக உயர்த்த, குழு பரிந்துரைத்துள்ளது.

அத்துடன், ஆண்டு வருவாயில், ஊதியம் மற்றும் விவசாய வருவாயை
கணக்கில் கொள்ளக் கூடாது எனவும் தெரிவிக்கப்பட்டுள்ளது. இதற்கு,
குழு உறுப்பினர்கள் அனைவரும் ஒப்புதல் அளித்துள்ளனர்.

இவ்வாறு, அவர் கூறினார். இந்நிலையில், இதர பிற்படுத்தப்பட்டோருக்கான
இட ஒதுக்கீட்டில், வருவாய் வரம்பை, 12 லட்சம் ரூபாயாக நிர்ணயிப்பது
குறித்து, மத்திய அரசு பரிசீலித்து வருவதாக கூறப்படுகிறது.

தினமலர்