அயோத்தியில் கட்டப்பட உள்ள மசூதிக்கு முதல் நன்கொடை அளித்தது யார் தெரியுமா?

-
அயோத்தி:
அயோத்தியில் கட்டப்பட உள்ள மசூதிக்கு முதல் நன்கொடை அளித்தது இந்து மதத்தைச் சேர்ந்த ஒருவர் என்ற தகவல் வெளியாகியுள்ளது.

அயோத்தி வழக்கில் உச்ச நீதிமன்றத்தின் தீர்ப்பினையடுத்து இந்த வருடம் பிப்ரவரி மாதம் ராமர் கோவில் அமையவுள்ள இடத்திலிருந்து 25 கிமீ தொலைவில் உள்ள பைசாபாத் மாவட்டத்தின் சதர் தாலுகாவில் உள்ள தன்னிபூர் என்ற பகுதியில் இடம் மசூதி கட்ட ஐந்து ஏக்கர் நிலம் ஒதுக்குவதாக மாநில அரசு அறிவித்தது. அதைத் தொடர்ந்து ஆகஸ்ட் மாதத்தில் மாநில வக்ப் வாரியத்திடம் அந்த இடம் முறைப்படி ஒப்படைக்கப்பட்டது.

மசூதி கட்டும் நடவடிக்கைகளை மேற்கொள்வதற்காக சன்னி வக்ப் வாரியமானது ‘இந்திய இஸ்லாமிய கலாசார மையம்’ என்னும் அமைப்பினை உருவாக்கி, அதார் ஹுசைன் என்பவரை அதன் செயலாளராக நியமித்தது. அவர் பொறுப்பில் மசூதி கட்டுவதற்கான அடிப்படை வேலைகள் நடைபெற்று வருகின்றன.

இந்நிலையில் அயோத்தியில் கட்டப்பட உள்ள மசூதிக்கு முதல் நன்கொடை அளித்தது இந்து மதத்தைச் சேர்ந்த ஒருவர் என்ற தகவல் வெளியாகியுள்ளது.

லக்னௌ பல்கலைகழகத்தில் சட்டத் துறையில் பணிபுரியும் பேராசிரியரான ரோஹித் ஸ்ரீவத்சவா ரூ.21 ஆயிரத்தினை முதல் நனகொடையாக அளித்துள்ளார். அதுமட்டும் அல்லாமல் இந்தியாவில் உள்ள இஸ்லாமியர்கள் நமது சகோதரர்கள் என்பதனை மெய்ப்பிக்கும் விதமாக, இந்து மதத்தைச் சேர்ந்தவர்கள் மசூதி கட்டுமானத்திற்கு தாரளமாக நிதியளிக்க வேண்டும் என்றும் வேண்டுகோளும் விடுத்துள்ளார்.

இந்தத் தகவலை உறுதிபடுத்திய செயலாளர் அதார் ஹுசைன், மசூதி கட்டுமானத்திற்கான முதல் நிதி இந்து சகோதரார் ஒருவரிடம் இருந்து வந்துள்ளது என்பது நமது கலாச்சாரத்தை எடுத்துக் காட்டும் நெஞ்சைத் தொடும் வகையிலான சம்பவம் என்று உருக்கமாகத் தெரிவித்தார்.

தினமணி