பிரதமர் - சீன அதிபர் சந்திப்பு இன்றுடன் ஓராண்டு நிறைவு

மாமல்லபுரம் :மாமல்லபுரத்தில், பிரதமர் மோடி - சீன அதிபர் ஸீ ஜின்பிங் சந்தித்து, இன்றுடன் ஓராண்டு நிறைவானதை, இப்பகுதியினர், நினைவுகூர்ந்தனர்.
செங்கல்பட்டு மாவட்டம், மாமல்லபுரத்தில், 7ம் நுாற்றாண்டு பல்லவர் கால கலைச்சிற்பங்கள் உள்ளன. சர்வதேச சுற்றுலா இடமான இங்கு வர, உள், வெளி நாட்டு பயணியர் விரும்புகின்றனர்.

அரசு முறை விருந்தினராக, நம் நாட்டிற்கு வரும் வெளிநாட்டு அதிபர், பிரதமர், அமைச்சர் உள்ளிட்டோரும், கடற்கரை கோவில், அர்ச்சுனன் தபசு உள்ளிட்ட சிற்பங்களை காண்கின்றனர்.

இது ஒருபுறமிருக்க, நம் நாட்டின் பிரதமர் மோடி - சீன அதிபர் ஸீ ஜின்பிங், முறைசாரா மாநாடாக, கடந்த ஆண்டு, அக்டோபர், 11ல், மாமல்லபுரத்தில் சந்தித்தனர். அதற்கடுத்த நாள், கோவளத்தில் சந்தித்து உரையாடினர்.


-
தமிழக - சீனாவின் பண்டைய கலாசாரம், வர்த்தக தொடர்புகள் காரணமாக, இந்த சந்திப்பு நிகழ்ந்ததால், மாமல்லபுரம், சர்வதேச முக்கியத்துவம் பெற்றது. தவிர, சீன அதிபருக்கு அளிக்கப்பட்ட வரவேற்பு, அனைவரையும் கவர்ந்தது.

இந்நிகழ்வின்போது, பிரதமர், தமிழக பாரம்பரிய ஆடையான வேஷ்டி, சட்டை அணிந்து, சீன அதிபரை வரவேற்றார்.மேலும், அர்ச்சுனன் தபசு, வெண்ணெய் உருண்டை பாறை, ஐந்து ரதங்கள், கடற்கரைக் கோவில் தொல்லியல் சின்னங்களை, அதிபருக்கு காண்பித்து, தேர்ந்த வழிகாட்டியாக விளக்கினார்.கடற்கரைக் கோவில் வளாகத்தில் அமைக்கப்பட்ட, பிரத்யேக, கலையம்ச அரங்கங்களில், இருவரும் அமர்ந்து, கலை நிகழ்ச்சிகளை கண்டுகளித்தனர்.

தவிர, இரு நாட்டு உறவு குறித்து உரையாடினர்.இந்த சந்திப்பு நிகழ்ந்து,
இன்றுடன் ஓராண்டு நிறைவடையும் நிலையில், அப்போது பரபரப்பாக
இருந்த மாமல்லபுரத்தை, இப்பகுதியினர் தற்போது நினைவுகூர்கின்றனர்.

தினமலர்