உலகத் தலைநகரங்கள் - லண்டன்

**சிவா** · **சிவா** Tue 1 Jun 2010 - 16:55

பாரம்பரியப் பழமையும், நவீனப் புதுமையும் இணைந்து மிளிரும் நகரம், லண்டன். இது, இங்கிலாந்து மற்றும் `யுனைடெட் கிங்டத்தின்' (யுகே) தலைநகரம் ஆகும்.

பிரிட்டனிலேயே பெரிய நகரான லண்டனின் வரலாறு, இரண்டாயிரம் ஆண்டுகளுக்கு முன்பிருந்து நீள்கிறது. ரோம சாம்ராஜ்யத்திலேயே ஒரு பகுதியாக இருந்துள்ளது இம்மாநகரம். `லண்டன்' என்பது, `லாண்டினம்' என்ற வார்த்தையில் இருந்து பிறந்திருக்கலாம் என்று கருதப்படுகிறது.

லண்டனின் அடிப்படையான `பழைய நகரம்', `சதுர மைல்' வணிக வட்டம் என்றும் அழைக்கப்படுகிறது. மத்திய கால எல்லைச் சுவர்களை இன்றும் இப்பகுதியில் காண முடியும்.

உலகின் முன்னணி நகரங்களில் ஒன்றான லண்டன், உலகின் மிக முக்கியமான நிதி மையங்களில் ஒன்றும் ஆகும். கலை, கலாச்சாரம் மட்டுமின்றி, தொழில்துறையிலும் லண்டன் நகரம் சிறந்து விளங்குகிறது. ஐரோப்பாவின் மிகப் பெரிய 500 நிறுவனங்களில் 100-க்கும் மேற்பட்டவற்றின் தலைமையகங்கள் மத்திய லண்டனில் அமைந்துள்ளன.

அரசியல், பொருளாதாரம், கல்வி, பொழுதுபோக்கு, ஊடகத் துறை, `பேஷன்' ஆகியவற்றில் லண்டன் நகரின் தாக்கம் காரணமாக மேற்கண்ட விஷயங்களில் இந்நகரம் உலகளவில் முக்கியத்துவம் பெற்று விளங்குகிறது.

லண்டனில் நான்கு உலகப் பராம்பரியச் சின்னப் பகுதிகள் அமைந்துள்ளன. அவை, லண்டன் கோபுரம், கிரீன்வீச் வரலாற்றுக் குடியிருப்புப் பகுதி, ராயல் பொட்டானிக்கல் கார்டன், வெஸ்ட்மின்ஸ்ட்ர், வெஸ்ட்மின்ஸ்டர் அபே, செயின்ட் மார்க்கரெட் தேவாலயப் பகுதிகள்.

வருகிற 2012-ம் ஆண்டு ஒலிம்பிக் போட்டி லண்டனில் நடைபெற உள்ளது குறிப்பிடத்தக் கது. ஏற்கனவே இந்நகரில் 1908, 1948-ம் ஆண்டுகளில் ஒலிம்பிக் போட்டிகள் நடைபெற் றுள்ளன.

பல்வேறுபட்ட இன, பிராந்திய, கலாச்சார மக்கள் கலந்து வாழும் நகரமாகும் லண்டன். இந்நகர எல்லைக்குள் மட்டும் 300-க்கும் மேற்பட்ட மொழிகள் பேசப்படுகின்றன என்பது ஓர் ஆச்சரியமான தகவல்.

சொந்த நாட்டு மக்களுக்கு அடுத்தபடியாக லண்டனில் அதிகம் வசிக்கும் வெளிநாட்டினர் இந்தியர்கள் ஆவர். இங்கு இந்தியர்களின் எண்ணிக்கை ஏறக் குறைய 2 லட்சம். லண்டனின் மொத்த மக்கள்தொகை 75 லட்சம்.

இரண்டாம் உலகப் போர் தாக்குதல், 1666-ம் ஆண்டு ஏற்பட்ட `மாபெரும் லண்டன் தீ விபத்து' போன்ற வரலாற்று நிகழ்வுகளால் ஏற்பட்ட பின்னடைவுகளையும் கடந்து காலகாலமாக சுறுசுறுப்பாக இயங்கிக் கொண்டிருக்கிறது லண்டன். அதுவே இந்நகரின் பெருமையும் தனிச்சிறப்புமாகும்!

***
தங்கமலர்