பிரெஞ்ச் ஓபன் டென்னிஸ் : ரோஜர் ஃபெடரர் அதிர்ச்சித் தோல்வி

ரோலாண்ட் கேரோஸில் நடைபெறும் பிரெஞ்ச் ஓபன் கிராண்ட்ஸ்லாம் டென்னிஸ் தொடர் ஆடவர் ஒற்றையர் காலிறுதிச் சுற்றில் உலகின் நம்பர் 1 வீரர் ரோஜர் ஃபெடரர் 5ஆம் தரவரிசை ஸ்வீடன் வீரர் ராபின் சோடர்லிங்கிடம் தோல்வி தழுவி வெளியேறினார்.
தனது அபாரமான சர்வீஸ் மற்றும் ஃபோர்ஹேண்ட் ஷாட்களால் ஃபெடரரை நிலைகுலையச் செய்த சோடர்லிங் 3-6, 6-3, 7-5, 6-4 என்ற செட்களில் வெற்றி பெற்று அரையிறுதிக்கு முன்னேறினார்.

கடந்த 6 ஆண்டுகளில் ஃபெடரர் முதல் முறையாக காலிறுதியிலேயே வெளியேறுகிறார். இதற்கு முன்பு 12 முறை ஃபெடரரை சந்தித்துள்ள சோடர்லிங் 12 முறையும் ஃபெடரரிடம் தோல்வி தழுவியவர் என்பது குறிப்பிடத்தக்கது.

23 கிராண்ட் ஸ்லாம் அரையிறுதிகளில் தொடர்ச்சியாக தகுதி பெற்ற ஃபெடரரின் தொடர் வெற்றிக்கு நேற்று சோடர்லிங் முற்றுப்புள்ளி வைத்தார்.

மற்றொரு அரையிறுதியில் 15ஆம் தரவரிசை செக்.குடியரசு வீரர் டொமாஸ் பெர்டிச், 11ஆம் தரவரிசை ரஷ்ய வீரர் யூஸ்னியை 6-3, 6-1, 6-2 என்ற நேர் செட்களில் எளிதாக வீழ்த்தினார்.

இதன் மூலம் சோடர்லிங்கும், பெர்டிச்சும் அரையிறுதியில் பலப்பரீட்சை நடத்துகின்றனர்.

முதல் செட்டை ஃபெடரர் 8-வது சர்வை முறியடித்ததன் மூலம் எளிதில் கைப்பற்றினார். ஆனால் அப்போது யாரும் அறியவில்லை, சோடர்லிங் மீண்டு எழுவார் என்று.

இரண்டாவது செட்டில் தனது மேம்படுத்தப்பட்ட ஃபோர்ஹேண்ட் ஷாட்கள் மூலம் ஃபெடரரை அதிர்ச்சிக்குள்ளாக்கிய சோடர்லிங் முதலில் பிரேக் கொடுத்து 2-0 என்று முன்னிலை பெற்றார். இந்த செட்டை 6-3 என்று கைப்பற்றினார் சோடர்லிங்.

அதன் பிறகு 3-வது செட்டில் மழை குறுக்கிட்டதால் ஆட்டம் 75 நிமிடம் நிறுத்தப்பட்டது. அப்போது 5-5 என்று இருந்த செட்டில், ஃபெடரர் செய்த முக்கியமான சர்வீஸ் டபுள் ஃபால்ட்டினால் சோடர்லிங் பிரேக் செய்து 6-5 என்று முன்னேறி செட்டைக் கைப்பற்றினார்.

4-வது செட்டில் ஃபெடரர் பிரேக் கொடுத்து 2-1 என்று முன்னிலை பெற்றார். ஆனால் சோடர்லிங் இம்முறையும் மீண்டு எழுந்து தனது அதிரடி ஃபோர்ஹேண்ட் ஷாட்களால் அபார வெற்றியைப் பெற்றார்.