இந்திய வாக்காளர் பட்டியலில் பெயர் இருந்ததால் நாடின்றி வாழும் மலேசியப் பெண்மணி

கோலாலம்பூர்: மலேசியாவில் பிறந்த பெண்ணொருவரின் பெயர் இந்தியாவின் வாக்காளர் பட்டியலில் இருந்ததால் அப்பெண் மலேசியக் குடியுரிமையை இழந்துள்ளார்.ஆனால், இந்தியாவின் வாக்காளர் பட்டியலில் தான் ஒரு போதும் தனது பெயரைப் பதிவு செய்ததில்லையென மகேஸ்வரி கோதண்(வயது52) என்ற அந்தப்பெண் தெரிவித்துள்ளார்.

இவர் மலேசியாவில் வேலை பார்க்கவோ அல்லது இந்தியாவில் தனது குடும்பத்தினருடன் இணைந்து வசிக்கவோ முடியாத சூழ்நிலை ஏற்பட்டிருப்பதாகத் தெரிவிக்கப்படுகிறது.இந்நிலையில் 8 வருடங்களாக இழுபறியிலிருக்கும் இப் பிரச்சினையில் மலேசியப் பிரதமர் நஜிப் ரஷாக் தலையிடவேண்டுமென மகேஸ்வரி வேண்டுகோள் விடுத்துள்ளார்.

2004 இல் மலேசிய அரசாங்கம் எனது குடியுரிமையை இரத்து செய்துள்ள அதேவேளை அதிக காலம் தங்கியிருந்ததாக எனது கடவுச்சீட்டில் முத்திரை குத்தியுள்ள இந்திய உள்நாட்டு அமைச்சு நாட்டைவிட்டு வெளியேறுவதற்கான ஒரு பயண அனுமதியை மட்டும் வழங்கியுள்ளதாகச் செய்திச் சேவையொன்றுக்கு மகேஸ்வரி தெரிவித்துள்ளார்.

2002 இல் மலேசிய தேசிய பதிவுத் திணைக்களத்திலிருந்து மகேஸ்வரிக்கு அனுப்பப்பட்டிருந்த அறிவித்தலில் இந்தியாவின் வாக்காளர் பட்டியலில் இவரது பெயர் கண்டுபிடிக்கப்பட்டுள்ளதால் இவர் நீண்ட காலத்திற்கு மலேசியராக இருக்க முடியாதெனத் தெரிவிக்கப்பட்டிருந்தது.

மகேஸ்வரி தனது 16 ஆவது வயதில் இந்தியரொருவரை திருமணம் செய்ததைத் தொடர்ந்து இந்தியாவிலேயே வசிந்து வந்த போதும் அவர் அடிக்கடி மலேசியா சென்று வருவது வழக்கமாகும்.1989 இல் இந்தியாவிலுள்ள மலேசியா தூதரகத்தில் தனது கடவுச்சீட்டைப் புதுப்பிக்க விரும்பிய போதே இந்தப் பிரச்சினை ஆரம்பமாகியுள்ளது.

கடவுச்சீட்டை புதுப்பிப்பதற்காக இவரது ஆவணங்கள் மலேசியாவுக்கு அனுப்பப்பட்டிருந்ததாக இவருக்கு தெரிவிக்கப்பட்டதுடன் 13 வருடங்கள் கழித்து இவரது குடியுரிமை இரத்து செய்யப்பட்டிருப்பதாகவும் அறிவிக்கப்பட்டது.

இதன் பின்னர் பல தடவைகள் விடுக்கப்பட்ட வேண்டுகோளின் அடிப்படையில் விசாரணைக்கு மலேசியாவுக்கு வருமாறு அழைப்பு விடுக்கப்பட்டது.மலேசியாவை வந்தடைந்தபோது விமான நிலையத்தில் இவரது கடவுச்சீட்டை பறிமுதல் செய்த அதிகாரிகள் இவருக்கு அடையாள அட்டையொன்றை வழங்கியுள்ளனர்.

2008 இல் புதிய கடவுச்சீட்டைப் பெற முடியுமென தெரிவிக்கப்பட்டிருந்தபோதும் இதுவரை அவருக்குக் கடவுச்சீட்டு வழங்கப்படாததால் இப்பிரச்சினையைப் பிரதமரின் கவனத்திற்குக் கொண்டு செல்ல மகேஸ்வரி தீர்மானித்துள்ளார்.

ரைம்ஸ் ஒப் இந்தியா