புதுவையில் அரசு நடத்திய வளைகாப்பு

புதுச்சேரி

புதுச்சேரி அரசின் சுகாதாரத்துறை சார்பில் கர்ப்பிணிகளுக்கு வளைகாப்பு விழா புதன்கிழமை நடந்தது.÷வில்லியனூர்
மணவெளி தாய்சேய் துணை நிலையத்தில் நடைபெற்ற இவ் விழாவில் 180 கர்ப்பிணிகள்
பங்கேற்றனர். இதில் குடும்ப உறுப்பினர்களும் பங்கேற்றனர்.÷மொத்தத்தில்
அரசு நடத்திய ஒரு குடும்ப விழாவாக இது மாறியது. விழாவில் பங்கேற்ற
அனைவருக்கும் அரசு சார்பில் மதிய உணவும் வழங்கப்பட்டது.÷காரைக்கால்
பகுதியில் முதலில் சோதனை அடிப்படையில் கர்ப்பிணிகளுக்கு வளைகாப்பு விழா
நடத்தப்பட்டது. அதில் கர்ப்பிணிகள் ஆர்வமாகப் பங்கேற்றனர். அந்த
விழாவின்போது கர்ப்பிணிகளுக்குத் தேவையான விழிப்புணர்வு தகவல்களை
சுகாதாரத்துறை ஊழியர்கள் கூறினர். அதன் பயனாக மருத்துவமனையில் பிரசவம்
பார்த்துக் கொள்வோர் எண்ணிக்கை கூடியது.÷குறிப்பாக கிராமப்புற
மக்களிடம் விழிப்புணர்வு ஏற்பட்டதை அறிந்து, இப்போது வளைகாப்பு விழா ஒரு
திட்டமாக கொண்டு வரப்பட்டுள்ளது. இது திட்டமாக மாற்றிய பிறகு முதல் விழா
இப்போது நடந்ததுள்ளது. இதுபோன்ற விழாக்களை அனைத்து ஆரம்ப சுகாதார
நிலையங்களிலும் நடத்த சுகாதாரத்துறை திட்டமிட்டுள்ளது. இத் திட்டத்தை
செயல்படுத்த | 5.4 லட்சம் ஒதுக்கீடு செய்யப்பட்டுள்ளது.÷வளைகாப்பு
விழாவை அமைச்சர் ஆ.நமச்சிவாயம் தொடங்கி வைத்தார். வில்லியனூர் கொம்யூன்
பஞ்சாயத்து தலைவர் க.நடராஜன் உள்ளிட்டோர் கலந்து கொண்டனர்.÷இந்த
விழாவில் பங்கேற்ற கர்ப்பிணிகளுக்குப் பொருந்தும் வகையில் வளையல்களை அப்
பகுதி பெண்களே தேர்வு செய்தனர். அவர்களுக்குப் பிடித்த கலர், டிசைன்
போன்றவற்றை அவர்களே முடிவு செய்து கொள்ளலாம். அதற்கான பணத்தை அரசே
கொடுத்துவிட்டது.÷""எனக்கு அம்மா இல்லை. அரசு நடத்திய இந்த
விழாவில் பங்கேற்றது மகிழ்ச்சியாக இருக்கிறது'' என்று ஒரு சில
கர்ப்பிணிகள் கூறினர். காதல் திருமணம் செய்துகொண்டதால் இரண்டு
குடும்பத்தினராலும் கண்டு கொள்ளப்படாமல் இருந்த பெண்களும் பங்கேற்றனர்.
அவர்கள் உணர்வுபூர்வமாக இந்த விழாவை வரவேற்பதாகக் கூறினர்.÷கர்ப்பிணிகள்
ரத்தசோகையுடன் இருக்கக் கூடாது. அதற்காக சத்தான உணவுகளைச் சாப்பிட
வேண்டும். இந்த விழா முடிவில் கர்ப்பிணிகளுக்கு ஒரு சிறிய பெட்டி
வழங்கப்பட்டது. அதில் பேரீச்சம் பழம், விழிப்புணர்வு தகவல்கள் அடங்கிய
கையேடு போன்றவை இருந்தன. அப் பகுதியைச் சேர்ந்த சுமங்கலி பெண்கள் திரண்டு
வந்து கர்ப்பிணிகளுக்கு நலங்கு வைத்து வாழ்த்தினர்.