முதல் இந்திய விடுதலை போரில் பிரிட்டன் பிரதமரின் எள்ளு தாத்தா

பிரிட்டன் பிரதமர் டேவிட் கேமரூனின் எள்ளு தாத்தா, கி.பி., 1857ல் நடந்த முதல் இந்திய விடுதலை போரில் பங்கேற்று, எண்ணற்ற இந்திய வீரர்களை கொன்றுள்ளார் என்பது இப்போது வெளிச்சத்துக்கு வந்துள்ளது.வில்லியம் மவுன்ட் மற்றும் எலிசபெத் லெவலின் ஆகியோர் பிரிட்டன் பிரதமர் டேவிட் கேமரூனின் தாய்வழி தாத்தா, பாட்டி. வில்லியம் மவுன்ட்டின் தாத்தா வில்லியம் லோ, கி.பி., 1857ல் இந்தியாவில் நடந்த முதல் இந்திய விடுதலை போரில் பிரிட்டிஷ் குதிரை படையில் இருந்தவர்.அவர் போரில் ஒரு கையையும், ஒரு காதையும் இழந்தவர். அப்போரில் எண்ணற்ற இந்திய வீரர்களை இரக்கமற்ற முறையில் கொன்றவர்.

இது குறித்து தன் தந்தை ஜான் லோவுக்கு எழுதிய கடிதம் ஒன்றில், "புரட்சி படை வீரர்கள் ஒன்று திரண்டாலும், அவர்களை நாங்கள் அடித்து விரட்டி விட்டோம். அவர்கள் பக்கம் 100 பேர் பலியாயினர். நம் பக்கம் ஒன்பது பேரும் இரண்டு குதிரைகளும் பலியாயினர். ஏழு பேர் காயமடைந்தனர்.சிதறி போனவர்கள், தங்கள் நகரங்களுக்கு சென்று விட்டனர். ஆனால், போர் நடந்த இடத்தில் அவர்கள் விட்டு சென்ற குதிரைகளை வைத்து எத்தனை பேர் தப்பி போயிருப்பர் என்று கணக்கு போட்டு, அவர்களை துப்பாக்கி கத்தி முனையில் மீண்டும் இழுத்து வந்து தூக்கில் போட்டோம்' என்று பெருமிதத்துடன் கூறியுள்ளார் வில்லியம் லோ.

லோவின் கடிதங்கள், பிரிட்டிஷ் நூலகத்திலிருந்து எடுக்கப்பட்டு, "சண்டே டைம்ஸ்' பத்திரிகையில் பிரசுரிக்கப்பட்டது. பி.பி.சி.,செய்தி நிறுவனத்தில் பணிபுரியும் நிக் பராட் என்பவர், டேவிட் கேமரூனின் குடும்ப பரம்பரையை கண்டுபிடித்து, அவரது எள்ளு தாத்தாவின் அட்டூழியம் பற்றி "ஹூ டூ யு திங்க் யு ஆர்?' என்ற பெயரில் ஒரு நிகழ்ச்சியாகவே வழங்கி விட்டார்.

இச்செய்திகள் அனைத்தும் "தி டெலிகிராப்' பத்திரிகையில் வெளி வந்தவுடன், பிரதமர் அலுவலகம் வெளியிட்ட அறிக்கையில், "கேமரூன் தன் முன்னோர்கள், பிரிட்டிஷ் சாம்ராஜ்ய கட்டுமான பணியில் ஈடுபட்டிருந்தனர் என்பதை முன்பே கூறியுள்ளார்' என்று மட்டும் விளக்கம் அளித்திருந்தது.ஆனால், எள்ளு தாத்தா, இந்திய வீரர்கள் மீது நிகழ்த்திய கொடூரங்கள் குறித்து மவுனம் சாதித்தது. கேமரூன் இந்தியாவுக்கு வருவதற்கு சில நாட்கள் முன்பு தான் இச்செய்திகள் வெளியிடப்பட்டன. இதன் மூலம் அவருக்கு அரசியல் நெருக்கடி ஏற்படும் என்று பத்திரிகைகள் கூறியிருந்தன.

வெள்ளக் கார நாய்களுக்கு முன்னாடி துணிச்சலா எதிர்த்து நின்னு சுதந்திர போராட்டத்தில் ஈடுபட்டு தங்களது இன்னுயிரை நீத்த அந்த மாவீர்களுக்கு என் வீர வணக்கங்கள்!

ஜெ ஹிந்த்!