கைப்பிடி கையோடு வந்ததால் மாணவர் மரண போராட்டம்

சென்னை:
சென்னை புறநகர் மின்சார ரயிலில் ஏற முயன்றபோது கைப்பிடி
அறுந்து, கையோடு வந்ததால் கல்லூரி மாணவரின் கால் பிளாட்பாரத்திற்கும்,
ரயிலுக்கும் இடையே சிக்கி, ஆபத்தான முறையில் இழுத்து செல்லப்பட்டார்.
புறநகர் மின்சார ரயில்களை பராமரிப்பதில், தெற்கு ரயில்வே காட்டும்
அலட்சியமே இதற்கு காரணம் என்று, பயணிகள் குற்றம் சாட்டியுள்ளனர்.
சென்னை புரசைவாக்கத்தில் வசிப்பவர் கண்ணன். மாநகர போக்குவரத்து கழக பஸ்
கண்டக்டர். இவரது மகன் லோகேஷ் (19). இவர் குரோம்பேட்டை ஐ.ஆர்.டி.,
பாலிடெக்னிக் கல்லூரியில் கம்ப்யூட்டர் இன்ஜினியரிங் இரண்டாம் ஆண்டு
படித்து வருகிறார். கல்லூரிக்கு நேற்று காலை வீட்டில் இருந்து பஸ்சில்
புறப்பட்ட லோகேஷ், தனது நண்பர் ஒருவருடன் எழும்பூர் வந்து தாம்பரம்
செல்லும் புறநகர் மின்சார ரயிலில் ஏறினார். வழியில், சைதாப்பேட்டையில்
இறங்கிய நண்பருடன் தானும் இறங்கினார். நண்பரை வழியனுப்பிக் கொண்டிருந்த
போது ரயில் புறப்பட்டது. இதனால், ரயிலின் கைப்பிடியை பிடித்து அவசரமாக ஏற
முயன்றார். அப்பொழுது, எதிர்பாராதவிதமாக கதவருகே இருந்த கைப்பிடி லோகேஷின்
கையோடு வந்து விட்டது. இதனால், நிலைதடுமாறிய லோகேஷ், ரயிலின் உள்ளே செல்ல
முடியாமல் பிளாட்பாரத்தில் விழுந்தார். அவரது இடது கால்
பிளாட்பாரத்திற்கும், ரயிலுக்கும் இடையே சிக்கிக் கொண்டது. ரயிலுடன் அவர்
சிறிது தூரம் பிளாட்பாரத்தில் இழுத்து செல்லப்பட்டார். பின், சமாளித்து
காலை இழுத்துக் கொள்ளவே அவர் ஆபத்தின்றி உயிர் தப்பினார். இந்த விபத்தில்
அவரது காலில் படுகாயம் ஏற்பட்டது. உடன் பயணம் செய்த கல்லூரி நண்பர்கள்
அவரை மருத்துவமனைக்கு கொண்டு சென்றனர். அங்கு, அவருக்கு சிகிச்சை
அளிக்கப்பட்டு வருகிறது.
பராமரிப்பு படுகுறைவு:
எக்ஸ்பிரஸ் ரயில்களாக இருந்தாலும் சரி,
மின்சார ரயில்களாக இருந்தாலும் சரி பராமரிப்பு சரியாக இல்லை. நீண்ட தூர
எக்ஸ்பிரஸ் ரயில் இன்ஜின்கள் அவ்வப்போது நடுவழியில் படுத்துக் கொள்கின்றன.
எக்ஸ்பிரஸ் ரயில் பெட்டிகளில் எலி, கரப்பான் பூச்சி, மூட்டை பூச்சி
தொந்தரவு அதிகம். பல பெட்டிகளில் மின் விளக்குகள் எரிவதில்லை. பேன்
சுற்றுவதில்லை. இருக்கைகள் கிழிந்து போயுள்ளன. கழிப்பறைகள்
சுத்தப்படுத்தப்படுவதில்லை. அதேபோல், புறநகர் மின்சார ரயில்களின்
பெட்டிகள் தினசரி சுத்தம் செய்யப்படாமல், குப்பைகளுடன் காணப்படுகின்றன.
சில ரயில் பெட்டிகளில் மேலே பிடிப்பதற்கு கைப்பிடிகள் இருப்பதில்லை.
இதனால் பயணிகள் ஓடும் ரயிலில் தடுமாறுகின்றனர். அவ்வப்போது, ரயில்
பெட்டிகளில் ஏற்படும் பழுதுகளை சரி செய்ய, தெற்கு ரயில்வே நடவடிக்கை
எடுக்க வேண்டும்.