ஒரே பள்ளிக்கு இரு தலைமை ஆசிரியை அரசு தலையிடாததால் பிரச்னை தீவிரம்

வேலூர்: ஒரே பள்ளிக்கு இரு தலைமை ஆசிரியர்கள் விவகாரத்தில் நேற்று தடை
உத்தரவு பெற்ற தலைமையாசிரியை உண்ணாவிரதம் இருந்ததால் பரபரப்பு ஏற்பட்டது.
வேலூர் ஈ.வே.ரா., நாகம்மை அரசு பெண்கள் மேல் நிலைப்பள்ளி தலைமை ஆசிரியராக
இருந்த விஜயகுமாரி, கடந்த 6ம் தேதி காரப்பட்டு மேல்நிலைப் பள்ளிக்கு
மாற்றப்பட்டார். இவருக்கு பதிலாக அதே பள்ளியில் உதவி தலைமை ஆசிரியராக
பணிபுரிந்த காயத்திரி தேவி பதவி உயர்வு பெற்று தலைமை ஆசிரியராக
நியமிக்கப்பட்டு கடந்த 6ம் தேதி பதவி ஏற்றார். காரப்பட்டு பள்ளிக்கு
மாற்றியதை எதிர்த்து கடந்த 12ம் தேதி சென்னை உயர்நீதி மன்றத்தில்
விஜயகுமாரி தடை உத்தரவு பெற்றார். கடந்த 16ம் தேதி இருவரும் பள்ளிக்கு
வந்து தலைமை ஆசிரியர் சீட்டில் உட்கார்ந்ததால் பிரச்னை வெடித்தது. முதன்மை
கல்வி அலுவலர் ராதா கிருஷ்ணன், தலைமை ஆசிரியர் அறைக்கு பூட்டு போட்டார்.
இருவரும் பள்ளிக்கு வந்து தனித்தனி அறைகளில் உட்கார்ந்து பள்ளி
நிர்வாகத்தை கவனிக்கத் துவங்கினர். இதனால், மாணவர்கள், ஆசிரியர்கள் ,
அலுவலர்களுக்கு மத்தியில் குழப்பம் ஏற்பட்டது. தடை உத்தரவு பெற்ற
விஜயகுமாரி நேற்று காலை 9 மணிக்கு பள்ளிக்கு வந்ததும், பூட்டப்பட்ட தலைமை
ஆசிரியர் அறைக்கு முன் டேபிள், பெஞ்ச் போட்டு உட்கார்ந்து உண்ணாவிரதம்
இருந்தார். "தடை உத்தரவு பெற்ற தன்னை இந்த பள்ளியில் தலைமை ஆசிரியராக
நியமிக்கும் வரை உண்ணாவிரதம் தொடரும்' என, விஜயகுமாரி தெரிவித்தார்.
உண்ணாவிரதம் இருந்த சிறிது நேரத்தில் விஜயகுமாரி மயக்கம் போட்டு
விழுந்ததால் பள்ளியில் பரபரப்பு ஏற்பட்டது. நேற்று மாலை வரையில்
உண்ணாவிரதத்தை தொடர்ந்தார்