அமைதிக்கான நோபல் பரிசு பெற்றவரின் மனைவி மாயம்

ஜின்லுயு : ‘நடப்பாண்டில் அமைதிக்கான நோபல் பரிசு பெற்ற லீயோ ஷாவ்போவை சிறையில் காணவில்லை. அவரது மனைவியை செல்போனில் தொடர்பு கொள்ள முடியவில்லை. திடீரென மாயமாகிவிட்டார்’ என்று அவரது வக்கீல் ஷாங் பாவ்ஜூன் கூறியுள்ளார். சீனாவை சேர்ந்த புரட்சிகர எழுத்தாளர் லீயோ ஷாவ்போ. இவர் சீன நாட்டின் கம்யூனிச அரசாங்கத்தை கடுமையாக தனது எழுத்துக்களால் விமர்சித்தார். இக்குற்றத்திற்காக 11 ஆண்டுகள் சிறை தண்டனை பெற்று, பீஜிங்கில் இருந்து 300 மைல் தொலைவில் உள்ள சிறையில் அடைக்கப்பட்டு இரண்டு ஆண்டுகள் தண்டனை அனுபவித்துவிட்டார்.

இந்நிலையில், இவருக்கு நடப்பாண்டின் அமைதிக்கான நோபல் பரிசு அறிவிக்கப்பட்டது. சிறையில் இருக்கும் இவரை சந்தித்து இந்த விஷயத்தை தெரிவிக்க போவதாக இவரது மனைவி லீயோ ஜியா கூறியிருந்தார். கடந்த வெள்ளிகிழமை இவர் பத்திரிகையாளர்களை சந்திக்க இருந்தார். சந்திக்க விடாமல் இவரை போலீசார் தடுத்தனர். சனிக்கிழமை சிறைக்கு சென்று கணவரை சந்தித்து இந்த விஷயத்தை தெரிவிக்க போவதாக கூறியிருந்தார்.

இந்நிலையில், இவரது குடியிருப்புக்கு வந்த போலீசார் கணவரை சந்திக்க அழைத்து செல்வதாக கூறி இவரை அழைத்து சென்றுள்ளனர். இதுகுறித்து இவரது வக்கீல் ஷாங் கூறுகையில், ‘சனிக்கிழமை போலீசாருடன் கணவரை சந்திக்க சென்ற லீயோ ஜியாவை காணவில்லை. இவரது செல்போன் தொடர்பு துண்டிக்கப்பட்டுள்ளது. அவரை திடீரென காணவில்லை. இது எங்களுக்கு கவலை அளிக்கிறது’ என்று கூறியுள்ளார்.சிறையில் லீயோவை சந்திக்க பத்திரிக்கையாளர்களுக்கு போலீசார் தடை விதித்து வருகின்றனர். லீயோவை சீன அதிகாரிகள், ‘குற்றவாளி’ என்று விமர்சித்து வருகின்றனர்.

அரசு சார்பில் நடத்தப்படும் ‘குளோபல் டைம்ஸ்’ பத்திரிகையில், ‘சீனாவை கோபப்படுத்தவே நடப்பாண்டில் அமைதிக்கான நோபல் பரிசு வழங்கப்பட்டுள்ளது. ஆனால், இது வெற்றி பெறாது.இதற்கு மாறாக நோபல் பரிசுக்கான கமிட்டி, தன்னை அவமானப்படுத்தி கொண்டுள்ளது’ என்று குறிப்பிடப்பட்டுள்ளது. இதனிடையே, லீயோ ஷாவ்போவை அவரது மனைவி நேற்று சந்தித்து பேசியதாக, ஹாங்காங்கைச் சேர்ந்த மனித உரிமை மற்றும் ஜனநாயகத்துக்கான தகவல் அமைப்பு தெரிவித்துள்ளது. எனினும், சந்திப்பு எங்கு நடந்தது என்பது பற்றி குறிப்பிடப்படவில்லை.