கர்நாடகத்தில் இன்று மீண்டும் நம்பிக்கை வாக்கெடுப்பு

கர்நாடக சட்டசபையில் எதியூரப்பா இன்று மீண்டும் நம்பிக்கை வாக்கெடுப்பை சந்திக்கிறார். இதையடுத்து சட்டசபை வளாகத்தில் பெருமளவில் போலீஸார் குவிக்கப்பட்டு பாதுகாப்பு பலப்படுத்தப்பட்டுள்ளது.

இன்றைய வாக்கெடுப்பின் முடிவு என்னவாக இருந்தாலும், அது அக்டோபர் 18ம் தேதி கர்நாடக உயர்நீதிமன்றம், 16 எம்.எல்.ஏக்கள் தகுதி நீக்க வழக்கில் பிறப்பிக்கும் உத்தரவுக்கு கட்டுப்பட்டதாகும் என்பதால், இன்று எதியூரப்பா தப்பினாலும் கூட அது இறுதியானதல்ல என்பது குறிப்பிடத்தக்கது.

நேற்று தங்களை வாக்களிக்க அனுமதிக்கக் கோரி 5 சுயேச்சை எம்.எல்.ஏக்கள் விடுத்த கோரிக்கையை கர்நாடக உயர்நீதிமன்றம் நிராகரித்து விட்டது. இதனால் பாஜகவுக்கு சாதகமாக தற்போது நிலைமை உள்ளது.

16 பேர் தகுதி நீக்கத்தையடுத்து கர்நாடக உறுப்பினர்களின் எண்ணிக்கை 209 ஆக குறைந்துள்ளது. இதில் சபாநாயகரைத் தவிர்த்துப் பார்த்தால் 208 பேர். இதில் பெரும்பான்மையை நிரூபிக்க 106 பேர் தேவை. பாஜக தரப்பில் 108 பேரின் ஆதரவு உள்ளதாக தெரிவிக்கப்பட்டுள்ளது. எனவே இன்றைய நம்பிக்கை வாக்கெடுப்பில் எதியூரப்பா அரசுதப்பி விடும் என்று தெரிகிறது.

இருப்பினும் தகுதி நீக்கம் செய்யப்பட்ட எம்.எல்.ஏக்களுக்கு சாதகமாக ஒரு வேளை தீர்ப்பு வந்தால் மீண்டும் நம்பிக்கை வாக்கெடுப்பு கோருமாறு எதியூரப்பா பணிக்கப்படலாம் என்று தெரிகிறது. எனவே இன்றைய வாக்கெடுப்பு முடிவுகள் எதியூரப்பாவுக்கும், பாஜகவுக்கும் இறுதியானதல்ல என்பது குறிப்பிடத்தக்கது.

பலத்த பாதுகாப்பு:

இதற்கிடையே, இன்றைய நம்பிக்கை வாக்கெடுப்பையடுத்து சட்டசபை வளாகமான விதான செளதாவில் பலத்த பாதுகாப்புக்கு ஏற்பாடு செய்யப்பட்டுள்ளது. இன்று குரல் வாக்கெடுப்பு நடத்தப்பட மாட்டாது, டிவிஷன் வாக்கெடுப்பே நடத்தப்படும் என சபாநாயகர் போபய்யா கூறியுள்ளார். மேலும் எம்.எல்.ஏக்கள் ஒவ்வொருவரும் தீவிரமாக சோதிக்கப்பட்டு அதன் பின்னரே சட்டசபைக்குள் அனுமதிக்கப்படுவர் என்றும் தெரிவித்துள்ளார்.

நம்பிக்கை வாக்கெடுப்பு நேரடியாக ஒளிபரப்பப்படவுள்ளது. பார்வையாளர் மாடத்திலிருந்து செய்தியாளர்கள் செய்தி சேகரிக்க அனுமதிக்கப்பட்டுள்ளது.


தட்ஸ்தமிழ்