சோமாலியாவுக்கு முதலிடம்: பாகிஸ்தானுக்கு இரண்டாமிடம்

லண்டன்:பயங்கரவாதிகளால் மிகவும் மோசமாக தாக்குதலுக்குள்ளாகும் நாடுகளில் முதலிடத்தை சோமாலியாவும், இரண்டாமிடத்தை பாகிஸ்தானும் பிடித்துள்ளன. மூன்றாமிடத்தில் ஈராக் உள்ளது. இந்தியா 15வது இடத்தில் உள்ளது.

பிரிட்டனைச் சேர்ந்த "மேப்பிள்கிராப்ட்' என்ற ஆய்வு நிறுவனம், 2009-10ம் ஆண்டுகளில் உலகின் 196 நாடுகளில் நடந்த பயங்கரவாத தாக்குதல்களின் அடிப்படையில், ஒரு பட்டியலைத் தயாரித்து வெளியிட்டுள்ளது.அதன்படி, பயங்கரவாதிகளால் மிக மோசமாக தாக்குதலுக்குள்ளாகும் முதல் 16 நாடுகளில், முதலிடத்தை சோமாலியா பிடித்துள்ளது. அங்கு கடந்த ஓராண்டில் 556 பயங்கரவாதச் சம்பவங்கள் நிகழ்ந்துள்ளன; ஆயிரத்து 437 பேர் கொல்லப்பட்டுள்ளனர்; மூன்றாயிரத்துக்கும் மேற்பட்டோர் காயம் அடைந்துள்ளனர்.

இரண்டாம் இடத்தில் உள்ள பாகிஸ்தானில், கடந்த 2007ல் இருந்து பயங்கரவாதிகளால் இரண்டாயிரம் பேர் கொல்லப்பட்டுள்ளனர். மூன்றாமிடத்தில் ஈராக் உள்ளது. நான்காம் இடத்தில் ஆப்கானிஸ்தானும், பாலஸ்தீனிய எல்லைகள் ஐந்திலும், கொலம்பியா ஆறிலும், தாய்லாந்து, பிலிப்பைன்ஸ், ஏமன் மற்றும் ரஷ்யா ஆகிய நாடுகள் அடுத்தடுத்த இடத்திலும் உள்ளன.இந்தப் பட்டியலில் ரஷ்யாவும், கிரீசும் முன்னேறியுள்ளன.

கிரீஸ் கடந்தாண்டு பட்டியலில் 57ம் இடத்தில் இருந்தது; இந்தாண்டு பட்டியலில் 24ம் இடத்துக்கு வந்துள்ளது. இதன் மூலம் அங்கு பயங்கரவாதிகளின் ஆதிக்கம் பெருகி வருவதாக ஆய்வு நிறுவனம் கூறியுள்ளது.இந்தியாவில் கடந்தாண்டை விட இந்தாண்டு பயங்கரவாத தாக்குதல்கள் குறிப்பிடத்தக்க அளவில் இல்லை. அதனால், கடந்தாண்டில் ஆறாமிடத்தில் இருந்த இந்தியா, இந்தாண்டு 15வது இடத்துக்கு சென்றுவிட்டது.அமெரிக்கா 33வது இடத்திலும், பிரான்ஸ் 44, பிரிட்டன் 46, கனடா 67 ஜெர்மனி 70ம் இடத்திலும் இடம் பிடித்துள்ளன. இப்பட்டியலில் முதலிடத்தை நெருங்கிப் போவது என்பது மோசமான பயங்கரவாத தாக்குதலுக்குள்ளாவதைக் குறிக்கும். பின்தங்கிப் போவது என்பது பயங்கரவாத தாக்குதல் குறைவாக நடப்பதைக் குறிக்கும்.

தினமலர்!