அதிகம் தொலைக்காட்சி... குழந்தைகளுக்கு ஆபத்து!

அதிகம் தொலைக்காட்சி. பார்க்கும் குழந்தைகள் குண்டாகிவிடுவார்கள் என்று முந்தைய ஆய்வுகள் தெரிவித்தன. அதிகமாக தொலைக்காட்சி. பார்க்கும் குழந்தைகளுக்கு மனரீதியான பாதிப்பும் ஏற்படக்கூடும் என்று `பகீர்' குண்டு போடுகிறது ஒரு புதிய ஆய்வு.

ஒரு நாளைக்கு இரண்டு மணி நேரத்துக்கு மேலாக தொலைக்காட்சி. அல்லது கம்ப்யூட்டர் கேம்ஸில் கழிக்கும் குழந்தைகளுக்கு பின்னாட்களில் மனநலக் கோளாறுகள் ஏற்படும் அபாயம் அதிகம் என்று பிரிட்டீஷ் ஆய்வாளர்களின் இப்புதிய ஆய்வில் தெரிவிக்கப்பட்டுள்ளது.

இந்த ஆராய்ச்சியை மேற்கொண்ட பிரிஸ்டல் பல்கலைக்கழக ஆய்வாளர்கள், 10 மற்றும் 11 வயதுள்ள ஆயிரம் குழந்தைகளை ஆய்வு செய்தனர்.

ஏழு நாட்களுக்கு, தினசரி எத்தனை மணி நேரத்துக்கு தொலைக்காட்சி. அல்லது கம்ப்ïட்டர் முன் கழிக்கிறார்கள் என்று அந்த குழந்தைகளிடம் கேட்கப்பட்டது. குறிப்பிட்ட நேரத்தில் அவர்களின் மனநிலை எப்படி இருக்கும் என்றும் கேட்டறியப்பட்டது. உணர்வு, நடத்தை, சக நண்பர்கள் தொடர்பான பிரச்சினைகள் எல்லாம் அறியப்பட்டன. மானிட்டர் முன் அமர்ந்திருக்கும் நேரத்தில் குழந்தைகளின் உடல் செயல்பாடு எப்படி இருக்கிறது என்றும் `ஆக்சிலரோமீட்டர்' மூலம் அளவிடப்பட்டது.

ஒருநாளைக்கு இரண்டு மணி நேரத்துக்கு மேல், ஒளிரும் திரைக்கு முன் கழிக்கும் குழந்தைகளை, அதைவிடக் குறைவான நேரத்தை அவற்றின் முன் செலவிடும் குழந்தைகளுடன் ஒப்பிடப்பட்டது. அப்போது, முந்தைய குழந்தைகளுக்கு மனரீதியான பிரச்சினை அபாயம் 60 சதவீதம் என்று கண்டறியப்பட்டது.

தொலைக்காட்சி., கம்ப்யூட்டர் திரை முன் தலா இரண்டு மணி நேரத்தைக் கழிக்கும் குழந்தைகளுக்கு அபாயமும் இரண்டு மடங்காகிவிடுகிறதாம்.

குழந்தைகளின் பாலினம், வயது, வயது வந்த, வராத நிலை, கல்வி மற்றும் பொருளாதார நிலை எப்படியிருந்தாலும், பாதிப்பு ஒரே மாதிரி இருக்கிறது என்றும் ஆய்வாளர்கள் உறுதிப்படுத்தியிருக்கின்றனர். மற்ற நேரங்களில் குழந்தை எவ்வளவு சுறுசுறுப்பாக இருந்தாலும், பாதிப்பில் மாற்றமில்லையாம். சுறுசுறுப்பாக இருப்பது, தொலைக்காட்சி. பார்ப்பதற்கு நிவாரணமாக அமையாது என்று கூறுகின்றனர்.

``அதிக நேரம் தொலைக்காட்சி. பார்ப்பது, எதிர்மறையான பழக்கங்களுக்கும் காரணமாக இருப்பதை நாங்கள் கண்டுபிடித்திருக்கிறோம்'' என்று ஆய்வாளர் ஆன்ஜி பேஜ் கூறுகிறார். தொலைக்காட்சி. பார்ப்பதற்காக உடற்பயிற்சி நேரத்தைக் குறைத்தால் பாதிப்பு மேலும் அதிகரிக்கும் என்றும் அவர் எச்சரிக்கிறார்.