புலியுடன் போட்டோ எடுத்த விவசாய அமைச்சர் மீது வழக்கு?

kirupairajah · kirupairajah Thu Aug 20, 2009 12:36 pm

மகாராஷ்டிரா மாநில வேளாண் துறை அமைச்சராக இருப்பவர் பாலாசாகேப் தோரட். இவர் கடந்த சனிக்கிழமை நாக்பூரில் உள்ள மகா ராஜ்பாக் மிருகக்காட்சி சாலைக்கு சென்றார். புலி கூண்டுக்குள் நுழைந்த அமைச்சர் தோரட், ஒரு புலிக்குட்டியை வருடி கொடுத்தபடி போட்டோவுக்கு போஸ் கொடுத்தார். அமைச்சரின் இந்த செயல் அவருக்கு பெரிய சிக்கலை ஏற்படுத்தி இருக்கிறது. இந்த சம்பவம் குறித்து கேள்விப்பட்ட மத்திய மிருகக்காட்சி சாலை ஆணையம் நாக்பூர் மிருகக்காட்சி சாலை அதிகாரிகளிடம் விளக்கம் கேட்டு நோட்டீஸ் அனுப்பி இருக்கிறது.

மிருகக்காட்சி சாலையில் உள்ள வன விலங்குகளுக்கு யாரும் இடையூறு செய்யக்கூடாது என்பது சட்டவிதியாகும். மேலும் நோய் தொற்றும் ஆபத்தும் உள்ளது. நேற்று முன்தினம் நிருபர்களிடம் பேசிய தோரட், தனது செயலுக்காக மன்னிப்பு கேட்டார்.

கூண்டுக்குள் நுழைந்து புலிக்குட்டியை தொட்டது தவறுதான் என்றும் கூறினார். நாக்பூர் மாவட்ட சிவசேனா தலைவர் சேகர் சவர்பந்தே, அமைச்சர் தோரட்டுக்கு எதிராக போலீசில் புகார் கொடுத்துள்ளார்.

அதிகாரிகளிடம் இருந்து பதில் கிடைத்ததும் வனவிலங்குகள் பாதுகாப்பு சட்டத்தின் கீழ் அமைச்சருக்கு எதிராக வழக்கு தொடரப் படும் என்று நாக்பூர் டிவிஷன் தலைமை வனத்துறை அதிகாரி என்.ராம்பாபு கூறினார்.

இது குறித்து மத்திய சுற்றுச் சூழல் வனத்துறை இணை அமைச்சர் ஜெய்ராம் ரமேஷ் கூறுகையில், ‘‘அமைச்சர் தவறு செய்திருந்தால் சட்டப்படி நடவடிக்கை எடுக்கப் படும். மிருகக் காட்சி சாலை சட்டப்படி விதி மீறினால் 6 மாத சிறை தண்டனையோ அல்லது ரூ.2 ஆயிரம் அபராதமோ அல்லது இரண்டும் சேர்த்து விதிக்கப்படும்’’ என்றார்.