லிபியா கலவரத்தில் மேலும் ஒரு தமிழர் பலி

நெல்லை, பிப்.25- லிபியா நாட்டில் நடந்து வரும் கலவரத்தில் சிக்கி நெல்லை மாவட்டத்தைச் சேர்ந்த மேலும் ஒரு தொழிலாளி பலியானார்.

மோதல்

லிபியா நாட்டில் அதிபர் கடாபிக்கு எதிராக கலவரம் நடந்து வருகிறது. போராட்டத்தை அடக்குவதற்கு அதிபர் ராணுவத்தை ஏவியுள்ளார். இதனால் இருதரப்பு மோதலில் உயிரிழப்புகள் ஏற்படுகின்றன. நெல்லை மாவட்டத்தில் இருந்து அங்கு வேலைக்கு சென்றவர்களும் இந்த கலவரத்தில் சிக்கிக் கொண்டனர்.

நெல்லை மாவட்டம் சிவகிரி தாலுகா தலைவன் கோட்டை கிராமத்தைச் சேர்ந்த முருகையா (வயது 40), ஆலங்குளம் தாலுகா நாகல்குளம் அசோக்குமார் (24) உள்பட சுமார் 30 பேர் லிபியா நாட்டுக்கு வேலைக்கு சென்றனர்.

குண்டு வீசி தாக்குதல்

அவர்கள் அங்குள்ள மின் கோபுரங்கள் காற்றாலைகள் அமைக்கும் நிறுவனத்தில் தொழிலாளர்களாக வேலை செய்து வந்தனர். அந்த நிறுவனத்தின் கூடாரங்களில் தங்கி வேலைக்கு சென்று வந்தனர். இந்தநிலையில் கடந்த சில நாட்களுக்கு முன்பு நெல்லை மாவட்ட தொழிலாளர்கள் தங்கி இருந்த கூடாரத்தை ஒரு கும்பல் சுற்றி வளைத்தனர்.

அப்போது கலவர கும்பல் குண்டுகளை வீசியும் துப்பாக்கியால் சுட்டும் தாக்குதல் நடத்தினர். இதில் தலைவன் கோட்டை கிராமத்தைச் சேர்ந்த முருகையா சிக்கி உயிரிழந்தார். ஆலங்குளம் தாலுகா நாகல்குளத்தைச் சேர்ந்த அசோக்குமார் (24) என்பவர் படுகாயம் அடைந்தார். அங்குள்ள ஒரு ஆஸ்பத்திரியில் சிகிச்சை பெற்று வந்தார்.

மேலும் ஒருவர் பலி

ஆஸ்பத்திரியில் சிகிச்சை பெற்று வந்த அசோக்குமார் சிகிச்சை பலனின்றி நேற்று இந்திய நேரப்படி 11-45 மணிக்கு பரிதாபமாக இறந்தார்.

அசோக்குமார் இறந்த தகவல் நாகல்குளத்தில் உள்ள அவரது பெற்றோருக்கு நேற்று தெரிவிக்கப்பட்டது. இதை கேட்ட அவரது பெற்றோர்களும், உறவினர்களும் கதறி அழுதனர். ஊரே சோகத்தில் மூழ்கியுள்ளது.

தாக்குதலில் காயம் அடைந்த களப்பாகுளம் முத்துக்குமார், தண்டுவடத்தில் காயம் அடைந்து அங்குள்ள ஆஸ்பத்திரியில் சிகிச்சை பெற்று வருகிறார்.

மிகவும் வருத்தமான செய்தி இது.