மனைவிகள் இலவசம்

தாமு · தாமு Thu Apr 07, 2011 7:46 am

தமிழக சட்டசபை தேர்தலை முன்னிட்டு, "தேர்தல் அறிக்கை' என்ற பெயரில், வாக்குறுதிகளை வெளியிடுகின்றன அரசியல் கட்சிகள். அவற்றை பார்க்கும்போது, சிரிப்பும், அதேசமயம், அவர்கள் எந்த அளவுக்கு மக்களை முட்டாளாக நினைத்துவிட்டனர் என்ற வேதனையும் ஏற்படுகிறது.

நாட்டில் மின் தேவையை நிறைவு செய்து, வேலைவாய்ப்பை பெருக்கி, சர்க்கரை மற்றும் பஞ்சு ஆலைகள் திறக்க வழி செய்யப்படும், நீர் ஆதாரம் பெருக்கப்படும், அரசு அலுவலகங்களில் உள்ள காலி பணியிடங்கள் நிரப்பப்படும், பட்டா கேட்டு விண்ணப்பித்தால், உடனடியாக வழங்கப்படும். வருவாய் சான்றிதழ், ஜாதிச் சான்றிதழ், இருப்பிடச் சான்றிதழ்கள், விண்ணப்பித்த 10 நாளில் வழங்கப்படும், ரேஷன் கார்டு ஒரு வாரத்தில் வழங்கப்படும்.

தமிழகத்தில் உள்ள நதிகளை இணைப்போம், கால்வாய்கள் தூர் எடுக்கப்படும், குளங்கள் மராமத்து செய்வோம், குடிநீர் இணைப்புகள் வழங்குவோம் என, எந்த அரசியல் கட்சிகளாவது, தொலைநோக்குப் பார்வையுடன், நாட்டின் தேவையை நிறைவு செய்யும் வாக்குறுதிகளைத் தந்துள்ளதா?

ஒரு கட்சி, பேறு கால விடுப்பு நான்கு மாதம் என்றால், இன்னொரு கட்சி ஆறு மாதம் தருவேன் என்கிறது. ஒரு கட்சி, கிரைண்டர் அல்லது மிக்சி இலவசம் என்றால், இன்னொரு கட்சி, மின் விசிறி, மிக்சி, கிரைண்டர் இலவசம் என்கிறது.

கர்ப்பிணி பெண்களுக்கு 10 ஆயிரம் என்றால், 12 ஆயிரம் தருவேன் என்கிறது. ஆடு, மாடு, வீடு இலவசம் என்ற இனிப்பை மக்கள் நாக்கில் தடவி, ஓட்டுகளை பெற, தேர்தல் அறிக்கை போர் நடத்துகின்றன. இவர்களை விட்டால் திருமண வயதுள்ள வாலிபர்களுக்கு இலவச திருமணம் நடத்தப்படும் என்பார்கள் போலிருக்கிறது.

விருந்து என்ற பெயரில், விஷத்தை அல்லவா தருகின்றனர். அரசு பணத்தை, இப்படி தவறான வழியில் செலவிடலாமா?இலவசங்களால், நாட்டின் வளம் பெருகுமோ இல்லையோ, நாடாளும் கட்சிகளின் வளம் பெருகும் என்பதில் சந்தேகமில்லை.வாக்காளர்களே சிந்திப்பீர்!

நன்றி திரு.லட்சுமணன், Ex.DEO , சென்னை