தமிழக தேர்தலில் முக்கிய தலைவர்களின் வெற்றி-தோல்வி

காங்கிரஸ், பா.ம.க., பா.ஜ.க. தலைவர்கள் தோற்றனர்

தமிழக சட்டசபை தேர்தலில் 18 அமைச்சர்கள், மற்றும் காங்கிரஸ், பா.ம.க., பா.ஜனதா கட்சியின் மாநில தலைவர்கள் இந்த தேர்தலில் தோல்வியை தழுவினார்கள்.

தோல்வி அடைந்த அமைச்சர்கள் விவரம் வருமாறு-

அமைச்சர் அன்பழகன்

1. க.அன்பழகன் (வில்லிவாக்கம்). அ.தி.மு.க. வேட்பாளர் ஜே.சி.டி.பிரபாகரிடம், 10 ஆயிரத்து 782 ஓட்டு வித்தியாசத்தில் தோல்வி அடைந்தார்.

2. வீரபாண்டி ஆறுமுகம் (சங்ககிரி). சேலம் மாவட்டத்தில் உள்ள இந்த தொகுதியில், தி.மு.க. மூத்த தலைவர்களில் ஒருவரான அமைச்சர் வீரபாண்டி ஆறுமுகம், அவருடைய அண்ணன் மகளும், அ.தி.மு.க.வை சேர்ந்த முன்னாள் அமைச்சருமான விஜயலட்சுமி பழனிச்சாமியிடம் 35 ஆயிரத்து 328 ஓட்டுகள் வித்தியாசத்தில் தோல்வியை தழுவினார்.

பொன்முடி

3. பொன்முடி (விழுப்புரம்). அ.தி.மு.க. வேட்பாளர் சி.வி.சண்முகத்திடம் தோல்வி அடைந்தார்.

4. கே.கே.எஸ்.எஸ்.ஆர்.ராமச்சந்திரன் (அருப்புக்கோட்டை). அ.தி.மு.க. வேட்பாளர் வைகைச்செல்வனிடம் 10 ஆயிரத்து 638 ஓட்டு வித்தியாசத்தில் தோல்வி அடைந்தார்.

5. பொங்கலூர் பழனிச்சாமி (கோவை தெற்கு). இவர், தன்னை எதிர்த்து போட்டியிட்ட அ.தி.மு.க. வேட்பாளர் சேலஞ்சர் துரை என்கிற துரைசாமியிடம் 30 ஆயிரம் ஓட்டுகள் வித்தியாசத்தில் தோல்வி அடைந்தார்.

தா.மோ.அன்பரசன்

6. எம்.ஆர்.கே.பன்னீர்செல்வம் (குறிஞ்சிப்பாடி). அ.தி.மு.க. வேட்பாளர் சொரத்தூர் ராஜேந்திரன் இந்த தொகுதியில் வெற்றி பெற்றார்.

7. தா.மோ.அன்பரசன் (பல்லாவரம்). இந்த தொகுதியில் அ.தி.மு.க. வேட்பாளர் ப.தன்சிங் 17 ஆயிரத்து 374 ஓட்டுகள் வித்தியாசத்தில் வெற்றி பெற்றார்.

கே.பி.பி.சாமி

8. கே.பி.பி.சாமி (திருவொற்றியூர்). இந்த தொகுதியில் அ.தி.மு.க. வேட்பாளர் கே.குப்பன் வெற்றி பெற்றார்.

9. சுரேஷ்ராஜன் (கன்னியாகுமரி). அ.தி.மு.க. வேட்பாளர் பச்சைமாலிடம் 15 ஆயிரத்து 804 ஓட்டு வித்தியாசத்தில் தோல்வி அடைந்தார்.

10. தமிழரசி (மானாமதுரை-தனி). அ.தி.மு.க. வேட்பாளர் ம.குணசேகரன் வெற்றி பெற்றார்.

11. கீதாஜீவன் (தூத்துக்குடி). அ.தி.மு.க. வேட்பாளர் சித.செல்லப்பாண்டியன் வெற்றி பெற்றார்.

12. வெள்ளக்கோவில் சாமிநாதன் (மடத்துக்குளம்). அ.தி.மு.க. வேட்பாளர் சி.சண்முகவேலு அவரை தோற்கடித்தார்.

கே.என்.நேரு

13. கே.என்.நேரு (திருச்சி மேற்கு). அ.தி.மு.க. வேட்பாளர் மரியம் பிச்சையிடம், 6 ஆயிரத்து 892 ஓட்டு வித்தியாசத்தில் தோல்வி அடைந்தார்.

14. எஸ்.என்.எம். உபயதுல்லா (தஞ்சாவூர்). அ.தி.மு.க. வேட்பாளர் ரங்கசாமி வெற்றி பெற்றார்.

15. என்.செல்வராஜ் (மணச்சநல்லூர்). இந்த தொகுதியில் அ.தி.மு.க. வேட்பாளர் டி.பி.பூனாட்சி 19 ஆயிரத்து 190 ஓட்டு வித்தியாசத்தில் வெற்றி பெற்றார்.

பூங்கோதை

16. உ.மதிவாணன் (கீழ்வேளூர்-தனி). நாகை மாவட்டத்தைச் சேர்ந்த இந்த தொகுதியில், மார்க்சிஸ்ட் கம்யூனிஸ்டு வேட்பாளர் வி.பி.மகாலிங்கம், 724 ஓட்டுகள் வித்தியாசத்தில் வெற்றி பெற்றார்.

17. பரிதி இளம் வழுதி (எழும்பூர்). தே.மு.தி.க. வேட்பாளர் நல்லதம்பியிடம் 202 ஓட்டு வித்தியாசத்தில் தோல்வி அடைந்தார்.

18. பூங்கோதை (ஆலங்குளம்). இவரை அ.தி.மு.க. வேட்பாளர் பி.ஜி.ராஜேந்திரன் 279 ஓட்டு வித்தியாசத்தில் தோற்கடித்தார்.

சபாநாயகர் ஆவுடையப்பன்

தி.மு.க. தலைவர்களில் ஒருவரும், சட்டசபை சபாநாயகருமான ஆவுடையப்பன் அம்பாசமுத்திரம் தொகுதியில் அ.தி.மு.க. வேட்பாளர் இசக்கி சுப்பையாவிடம் 24 ஆயிரத்து 609 ஓட்டுகள் வித்தியாசத்தில் தோல்வி அடைந்தார்.

தி.மு.க.வை சேர்ந்த துணை சபாநாயகர் வி.பி.துரைசாமி, சேலம் மாவட்டம் ராசிபுரம் தொகுதியில் அ.தி.மு.க.வை சேர்ந்த முன்னாள் அமைச்சர் தனபாலிடம் 24 ஆயிரத்து 717 ஓட்டுகள் வித்தியாசத்தில் தோல்வி அடைந்தார்.

தங்கபாலு தோல்வி

காங்கிரஸ், பா.ம.க. மற்றும் பா.ஜனதா மாநில தலைவர்களும் தோல்வியை தழுவினார்கள்.

தமிழக காங்கிரஸ் தலைவர் தங்கபாலுவை மைலாப்பூரில் அ.தி.மு.க. வேட்பாளர் ராஜலட்சுமி 29 ஆயிரத்து 204 ஓட்டு வித்தியாசத்தில் தோற்கடித்தார்.

பா.ம.க. தலைவர் ஜி.கே.மணி மேட்டூர் தொகுதியில் தே.மு.தி.க. வேட்பாளர் எஸ்.ஆர்.பார்த்திபனிடம் தோல்வி அடைந்தார்.

பொன்.ராதாகிருஷ்ணன்

பா.ஜனதா தலைவர் பொன்.ராதாகிருஷ்ணன் நாகர்கோவில் தொகுதியில் தோல்வி அடைந்தார். இந்த தொகுதியில் அ.தி.மு.க. வேட்பாளர் நாஞ்சில் முருகேசன் 58819 ஓட்டுகள் பெற்று வெற்றி பெற்றார்.

தி.மு.க. வேட்பாளர் மகேஷ் 52092 ஓட்டுகள் பெற்று இரண்டாம் இடத்தையும், பொன் ராதாகிருஷ்ணன், 33623 ஓட்டுகள் பெற்று 3-வது இடத்தையும் பிடித்தனர்.

திருநாவுக்கரசர்

மூவேந்தர் முன்னேற்ற கழக தலைவர் ஸ்ரீதர் வாண்டையார் சிதம்பரம் தொகுதியில் மார்க்சிஸ்ட் கம்யூனிஸ்டு கட்சி வேட்பாளர் பாலகிருஷ்ணனிடம் தோல்வி அடைந்தார்.

கொங்கு நாடு முன்னேற்ற கழக பொதுச் செயலாளர் இ.ஆர்.ஈஸ்வரன் சூலூர் தொகுதியில் தே.மு.தி.க. வேட்பாளர் பனப்பட்டி தினகரனிடம் தோல்வி அடைந்தார்.

காங்கிரஸ் தலைவர்களில் ஒருவரான திருநாவுக்கரசர், அறந்தாங்கி தொகுதியில், அ.தி.மு.க. வேட்பாளர் ராஜநாயகத்திடம் 16 ஆயிரத்து 56 ஓட்டு வித்தியாசத்தில் தோல்வி அடைந்தார்.

கருணாநிதி-ஜெயலலிதா வெற்றி

சட்டசபை தேர்தலில், தமிழக முதல்-அமைச்சர் கருணாநிதி, அ.தி.மு.க. பொதுச்செயலாளர் ஜெயலலிதா மற்றும் பல்வேறு அமைச்சர்களும் வெற்றி பெற்றனர்.

திருவாரூர் தொகுதியில் போட்டியிட்ட முதல்-அமைச்சர் கருணாநிதி, அவரை எதிர்த்து போட்டியிட்ட அ.தி.மு.க. வேட்பாளர் குடவாசல் ராஜேந்திரனை 50 ஆயிரத்து 249 ஓட்டு வித்தியாசத்தில் தோற்கடித்து வெற்றி பெற்றார்.

அ.தி.மு.க. பொதுச்செயலாளர் ஜெயலலிதா, ஸ்ரீரங்கம் தொகுதியில் தி.மு.க. வேட்பாளர் ஆனந்த்தை தோற்கடித்தார்.

துரைமுருகன்

அமைச்சர் துரைமுருகன், காட்பாடி தொகுதியில், அ.தி.மு.க. வேட்பாளர் எஸ்.ஆர்.கே.அப்பு என்கிற ராதாகிருஷ்ணனை விட 2,973 ஓட்டுகள் அதிகம் பெற்று வெற்றி பெற்றார்.

பாளையங்கோட்டை தொகுதியில், அமைச்சர் டி.பி.எம்.மைதீன்கான் 608 ஓட்டு வித்தியாசத்தில் மார்க்சிஸ்ட் கம்யூனிஸ்டு கட்சி வேட்பாளர் வி.பழனியை தோற்கடித்தார்.

தங்கம் தென்னரசு

திருச்சுழி தொகுதியில், அமைச்சர் தங்கம் தென்னரசு, அவரை எதிர்த்து போட்டியிட்ட மூவேந்தர் முன்னேற்ற கழக வேட்பாளர் இசக்கிமுத்துவை 19 ஆயிரத்து 952 ஓட்டு வித்தியாசத்தில் தோற்கடித்தார்.

திருவாடானை தொகுதியில் அமைச்சர் சுப தங்கவேலன், 927 ஓட்டு வித்தியாசத்தில் தே.மு.தி.க. வேட்பாளர் முஜிபுர் ரகுமானை தோற்கடித்தார்.

53 ஆயிரம் ஓட்டு வித்தியாசத்தில்

திண்டுக்கல் மாவட்டம் ஆத்தூர் தொகுதியில் அமைச்சர் ஐ.பெரியசாமி, தே.மு.தி.க. வேட்பாளர் பாலசுப்பிரமணியை 53 ஆயிரத்து 932 ஓட்டு வித்தியாசத்தில் தோற்கடித்தார்.

குன்னூர் தொகுதியில், அமைச்சர் கா.ராமச்சந்திரன், இந்திய கம்யூனிஸ்டு கட்சி வேட்பாளர் ஏ.பெள்ளியை 9,292 ஓட்டு வித்தியாசத்தில் வெற்றி பெற்றார்.

புதிய தமிழகம் கட்சி தலைவர் டாக்டர் கிருஷ்ணசாமி, ஒட்டப்பிடாரம் தொகுதியிலும், இந்திய குடியரசு கட்சி தலைவர் செ.கு.தமிழரசன் கே.வி.குப்பம் தொகுதியிலும், கொங்கு இளைஞர் பேரவை தலைவர் தனியரசு பரமத்தி வேலூர் தொகுதியிலும் வெற்றி பெற்றனர்.

தினதந்தி