ஆடி அமாவாசை

ஆடி மாதம் காவிரி பொங்கி வரும் ஆடி பெருக்கு சிறப்பு பெற்றது.ஆடி மாதத்தில் தான் பெண் தெய்வங்களாகிய மாரியம்மன் திருவிழா நடத்தப்படும் மாதம் ....சித்தர்களின் சித்திகளுக்கு பல அபூர்வ மற்றங்கள் ஏற்படுத்தி தரும் மாதம்...பித்ருக்களை வழிபட ஏற்ற காலம் ஆடி மாதம் என இந்த மாதமே ஒரு புண்ணிய காலமாக ஜோதிட சாஸ்திரம் சொல்கிறது.

தினசரி வாழ்வில் பல சோதனைகளை,தடைகளை சந்திக்கிறோம்.இவற்றில் பல தோல்விகளுக்கு காரணமே தெரியாது.எதுக்கு இவ்வளவு கஷ்டம் நமக்கு மட்டும் வருது என வேதனைப்படுபவர்கள் பலர்.அவர்களுக்கு நான் சொல்லும் ஆலோசனை என்னவென்றால் உங்கள் முன்னோர்களின் ஆத்மா சாந்தியடையாமல் அவர்களின் ஆசி உங்கள் வம்சத்துக்கு கிடைக்காமல் இருந்தால் உங்கள் வம்சத்தில் பிறக்கும் ஆண்கள்,பெண்கள் கடும் துன்பத்திற்கு ஆளாவார்கள்.பெண்களுக்கு மண வாழ்க்கை முறிவு,ஆண்களுக்கு தொழில் பாதிப்பு,கடன்,வேலை செய்யுமிடத்தில் பல பிரச்சனைகள் என சந்திப்பார்கள்.

இதை தவிர்க்க உங்கள் வம்சத்தில் உங்களுக்கு முன்னால் பிறந்து வாழ்ந்த உங்கள் முன்னோர்களை நினைத்து அவர்களுக்காக காவிரி போன்ற ஆற்றின் கரைகளிலோ,ராமேஸ்வரம்,தேவி பட்டினம் போன்ற கடல் கரைகளிலோ பித்ரு பூஜை,பித்ரு பரிகாரம்,பிண்டம் வைத்து வழிபாடு செய்தல் நலம்.

பித்ரு பூஜைக்காக லட்சக்கணக்கிலோ ஆயிரக்கணக்கிலோ செலவு செய்ய வேண்டாம்.எள்,மைதாமாவு,வாழைக்காய் என சில பொருட்களை பிராமணர்களிடம் கொடுத்து இதற்கு முன் வாழ்ந்த என் வம்சத்தார் 32 தலைமுறையினருக்கு ஒரே சமயத்தில் ஆத்ம சாந்தி செய்யலாம்.இதை ஆடி அமாவாசையில் செய்தால் இந்த பரிகாரம் உடனே உங்கள் முன்னோர்களுக்கு சென்று சேரும்.மகிழ்ச்சியில் உங்களை ஆசிர்வாதிப்பார்கள்.

அதன் பின் வீடு வந்து மதியம் காக்கைக்கு சாதம் வைத்து பிறகு உண்ணவும்.அன்று மாமிசமோ,மதுவோ எடுத்துக்கொள்ளக்கூடாது.அன்றைய தினம் இரவு உங்கள் வீட்டிற்கு உங்கள் முன்னோர் வருவர்.நீங்கள் உங்கள் தாத்தா,பாட்டியிடம் அதிக பிரியம்,பாசத்தோடு இருந்தீர்களா..?அவர்கள் நிச்சயம் அன்று இரவு உங்களை தேடி உங்கள் வீட்டிற்கு வருவார்கள்.உங்கள் தலையை தொடுவார்கள்.இது அனுபவ உண்மை.அவர்கள் திருப்தியாக இருந்தால் இது நடக்கும்.

உங்கள் குடும்பத்தினர் யாராவது விபத்து போன்ற அகால மரணம் அடைந்து இருந்தால் அவர்களுக்கு ஆடி அமாவாசை அன்று கண்டிப்பாக பிண்டம் வைத்து வணங்க வேண்டும்.அப்போதுதான் அவர்கள் உலகில் அவரது ஆத்மா சித்ரவதை படாமல் இருக்கும்.ஆத்ம சாந்தியும் உண்டாகும்.இல்லையெனில் அவர்களின் சிதைந்த உடலுக்கு திரும்ப அவர்கள் போராடுவார்கள்.தங்கள் குடும்பத்தாரோடு பேச மிகவும் கஷ்டப்படுவார்கள்.கண்ணீர் வடிப்பார்கள்.தொட முடியாமல்,தொடர்பு கொள்ள முடியாமல் வேதனையில் துடிப்பார்கள்.அவர்களுக்கு கடவுளின் மடியில் தஞ்சம் புக நீங்கள் செய்யும் பிண்ட பூஜை மிக உதவியாக இருக்கும்.என்ன நம்ப முடியவில்லையா.இது முற்றிலும் உண்மை.

தாய்,தந்தை,தாத்தா,பாட்டிக்கு மட்டும்தான் பித்ரு பூஜை செய்யணுமா என்றால் இல்லை.இந்த உலகில் இறந்த எந்த மனிதருக்கும் நீங்கள் தர்ப்பணம் கொடுக்கலாம்.இதனால் அந்த உயிரின் ஆத்மா சாந்தியடையும் என சாஸ்திரம் சொல்கிறது.இலங்கை தமிழர்களுக்காகவும் கொடுக்கலாம்.

ராமேஸ்வரம்,பவானி கூடுதுறை,திருச்சி அம்மா மண்டபம்,கொடுமுடி மகுடேஸ்வரர் கோயில்,சதுரகிரி மலை,மேட்டூர்,போன்ற இடங்களில் கடும் நெருக்கடி இருக்கும்.அதிகாலை சென்று விடுங்கள்.அய்யர் பெரிய லிஸ்ட் கொடுப்பார்.முடிந்தால் செய்யுங்கள்.சிக்கனமாக செய்தால்,பித்ரு பூஜைக்கு அதிக பட்சம் 400 ரூபாய் தான் செலவாகும் .

இன்று ஆடி அமாவாசை

நன்றி: நல்ல நேரம்