தாலி

அலங்காரம் பண்ணிவிட்ட தோழிகள் அனைவரும் நகர்ந்துகொள்ள, புவனா தன் முழு உருவத்தையும் கண்ணாடிக்கு கொடுத்தாள்.

அவளது விழிகளை அவளாலேயே நம்ப முடியவில்லை

நான் இவ்வளவு அழகா ? இத்தனை நாளும் இந்த அழகு எங்கே போயிருந்தது ?

நேற்றுவரை பண்ணையார் மகள் மகேஸ்வரிக்கு பணிப்பெண்ணாய் கூஜாத் தூக்கியவள், இன்று சொக்கம்பட்டி பண்ணையாரின் மருமகளாய் ஆகிறாள் என்றால் சும்மாவா ? நினைத்துக்கூட பார்க்தாதவாறு, திடீரென குருட்டு அதிர்ஷ்டத்தால் கிடைத்த சம்மந்தமல்லவா ? புவனா சந்தோஷத்தில் தனக்குள்ளேயே தத்தளித்தாள்.

பண்ணையார் மகள் மகேஸ்வரியை தன் மகனுக்கு பேசி முடிக்க வந்த சொக்கம்பட்டி பண்ணையார், மகேஸ்வரிக்கு பக்கத்தில் பவ்யமாய் நின்ற புவனாவைப் பார்த்ததும் சட்டென தீர்மானித்தார் "என் மருமகள் இவள்தான்".

எந்தவித வசதியுமில்லாத புவனாவை எதையும் எதிர்பார்க்காமல் தன் மருமகளாக்கிக்கொள்ள சட்டு புட்டென செயலில் இறங்கினார். விளைவு ... இதோ சர்வ அலங்காரங்கலோடு மணப்பெண்ணாய் புவனா.

முகூர்த்த நேரம் நெருங்குது பொண்ண கூட்டிட்டு வாங்கோ, புரோகிதர் குரல் கொடுக்க ... பூக்களால் அலங்கரிக்கப்பட்ட மணவறையை நோக்கி தோழியர் புடைசூழ அன்னம்போல் நடந்தாள் புவனா.

கெட்டிமௌம் .. கெட்டிமேளம் .. யாரோ குரல் கொடுக்க மங்கல இசை பின்னனியில், வாட்ட சாட்டமாய் அமர்ந்திருந்த அவன் , தாலிக்கயிற்றை கையிலெடுத்து புவனாவின் கழுத்துக்கு கொண்டுபோக ..

நிறுத்துங்க .. எனக்கொரு ஞாயித்த சொல்லிட்டு தாலிய கட்டுங்க.

சற்றும் எதிர்பாராத விதமாய் அக்ரோஷமாய் குரல்கொடுத்த மகேஸ்வரியின் குரலுக்கு அந்த கல்யாண மண்டபமே ஸ்தம்பித்தது..

ஏம்மா . . . உனக்கென்ன கிறுக்கா பிடிச்சிருக்கு ஆவேசமாய் கேட்டார் சொக்கம்பட்டி பண்ணையார்.

கிறுக்கு எனக்கில்ல உங்களுக்குத்தான், என்னை பெண் பார்க்க வந்துட்டு. இவளை மணப் பெண்ணாய் ஆக்குனா எப்படி ? என்ன ஆனாலும் சரி புவனாவின் கழுத்தில் தாலி ஏற நான் அனுமதிக்கமாட்டேன் , - என அவள் மேல்மூச்சு கீழ்மூச்சு வாங்க பேசி முடிக்கவும், அந்த படத்தின் டைரக்டர் விக்னேஷ்வர் கட்கட் என்று சொல்லவும் சரியாக இருந்தது.

சென்ற மாத விபத்தில் தன் கணவனை இழந்திருந்த நடிகை தேவகி .. அதான் புவனாவாக நடித்த தேவகி, ஷீட்டிங்கிலும் கூட தன் கழுத்துக்கு தாலிபாக்கியம் இல்லாமல் போனதை எண்ணிக் கண் கலங்கியவாறு மேக்கப் ரூமை நோக்கி நடந்தாள்.

த. அமுதா

ஒரு நடிகயின் கதை அருமை

ஒரு நிதர்சனம்....

"சென்ற மாத விபத்தில் தன் கணவனை இழந்திருந்த நடிகை தேவகி .. அதான் புவனாவாக
நடித்த தேவகி" என்பதைப் பார்த்தவுடன்....

முடிவு எனக்கு வேறுவிதமாக பட்டது! ஆனால்,

"ஷீட்டிங்கில் தன் கழுத்துக்கு தாலிபாக்கியம் இல்லாமல்
போனதை எண்ணிக் கண் கலங்கியவாறு மேக்கப் ரூமை நோக்கி நடந்தாள்."

என்றூ அருமையாக முடித்து வைத்து உள்ளீர்கள்.. மிகவும் அருமையான முடிவு!!!