கவிதை என்பது

நியாஸ் அஷ்ரஃப் · 16/06/2010

கவிதை
இருளுக்கு எதிராக
தீக்குச்சி கிழிக்கிறது
இல்லை
இருள் என்பது
குறைவான ஒலியென்று சொல்லி
உடன்படவைக்கிறது.. !

உலகக் கவிதைகளுக்கெல்லாம்
பொதுவான குணம் ஒன்று உள்ளது, அது
மனிதகுலம் சோகப்படும்போது கண்ணீர் வடிப்பது
தாகப்படும்போது தண்ணீர் கொடுப்பது

விஞ்ஞானம் விளக்கு வைத்து தேடுவதை
கண்களை மூடி கண்டறிகிறது கவிதை

மழையில் நனைந்து பார்க்க
மலரப்போகும் மலர்களில் மனம் கரைய
வானவில் ரசிக்க
வாழ்வின் வலிதாங்க
இலையுதிர்கால கிளைகளில் முட்டும்
முதல் தளிருக்குக் காத்திருக்க
சக உயிர்களை நேசிக்க
சேமித்த கண்ணீரை அன்புக்கு செலவழிக்க
கற்றுத்தரும் கடமை இருக்கிறது கவிதைக்கு..

- வைரமுத்துவின் பெய்யெனப் பெய்யும் மழை என்னும் புத்தகத்திலிருந்து