ஆண்களுக்கு ஆபத்து: தர்மபுரி முழுவதும் இன்று வீடுகளில் விளக்கு ஏற்றி வழிபட்ட பெண்கள்

ஆண்களுக்கு ஆபத்து: தர்மபுரி முழுவதும்
இன்று வீடுகளில் விளக்கு ஏற்றி வழிபட்ட பெண்கள்

சந்திரகிரகணத்தால் ஆண்களுக்கு ஆபத்து என்று தகவல் பரவியதால் தர்மபுரி பகுதியில் இன்று காலை வீடுகளில் பெண்கள் விளக்கு ஏற்றி வழிபட்டனர். தமிழகத்தில் நேற்று சந்திர கிரகணம் முழுமையாக தெரிந்தது. நேற்று மாலை 6-14 மணிக்கு தொடங்கிய சந்திரகிரகணம் இரவு 9-47 மணி வரை நீடித்தது.

சேலம், நாமக்கல் தர்மபுரி, கிருஷ்ணகிரி பகுதிகளிலும் சந்திர கிரகணம் தெளிவாக தெரிந்தது. இதை ஏராளமான பொது மக்கள் வெறும் கண்ணால் பார்த்து மகிழ்ந்தனர். சந்திர கிரகணத்தினால் நேற்று மாலை முதல் இரவு 9-15 மணி வரை சிலர் சாப்பிடாமல் இருந்தனர்.

அய்யப்ப பகதர்களும் வழக்கமாக நடத்தும் பஜனைகள் மற்றும் பூஜைகளை நடத்தவில்லை. இரவு 10 மணிக்கு மேல் குளித்து விட்டு பூஜையை நடத்தினார்கள். சந்திகிரகணம் காரணமாக கோவில்கள் மூடப்பட்டன. சந்திரகிரகணம் முடிந்த பிறகு நடைதிறக்கப்பட்டு கோவிலில் பரிகார பூஜைகள் நடத்தப்பட்டது.

இந்த சந்திர கிரகணத்தினால் ஆண்களுக்கு ஆபத்து என்று தர்மபுரி மாவட்டம் முழுவதும் தகவல் பரவியது. இதனால் இன்று காலை பெண்கள் தங்களது வீடுகளிலும், வீட்டு முன்பு நிலைக்கதவிற்கு கீழேயும் விளக்கு ஏற்றி வழிபட்டனர்.

சிலர் வெற்றிலை பாக்கு மற்றும் மஞ்சளில் பிள்ளையார் பிடித்து வைத்தும், விளக்கு ஏற்றினார்கள். தர்மபுரி நகரில் செந்தில் நகர், இலக்கியம்பட்டி, கலெக்டர் அலுவலக பகுதி உள்பட பல்வேறு பகுதிகளில் இந்த பூஜையை பெண்கள் நடத்தினார்கள்.

நக்கீரன்