`பத்து மிளகு இருந்தால், பகைவர் வீட்டிலும் சாப்பிடலாம்', இன்று தேசிய மருத்துவர் தினம் உங்கள் டாக்டருக்கு வாழ்த்து சொல்லுங்கள்

`பத்து மிளகு இருந்தால், பகைவர் வீட்டிலும் சாப்பிடலாம்',
இன்று தேசிய மருத்துவர் தினம்
உங்கள் டாக்டருக்கு வாழ்த்து சொல்லுங்கள்


நம்முடைய நலனில் அக்கரை செலுத்துபவர்கள் பெற்றோர்கள், ஆசிரியர்கள் மற்றும் மருத்துவர்கள். இவர்களை கவுரவிப்பதற்காக ஆண்டுக்கு ஒரு நாள் அன்னையர் தினம், தந்தையர் தினம், ஆசிரியர் தினம் மற்றும் மருத்துவர் தினம் கொண்டாடப்பட்டு வருகிறது.

அன்றைய தினத்தில் அவர்களுடைய அன்புக்காகவும், அர்ப்பணிப்புக்காகவும், தியாகத்திற்காகவும் வாழ்த்துக்களும் நினைவு பரிசுகளும் வழங்கப்படுகிறது. ஒவ்வொரு ஆண்டும் ஜுலை-1 ந்தேதி நம் நாட்டில் தேசிய மருத்துவர் தினம் கொண்டாடப்படுகிறது.

உணவே மருந்து:

நாம் தினசரி பயன்படுத்தும் ஒரு சில உணவுப் பொருள்களும் இயல்பாகவே மருத்துவக் குணங்களை பெற்றிருக்கின்றன. குறிப்பாக மஞ்சள், இஞ்சி, பூண்டு, மிளகு, சீரகம், வெந்தயம் போன்றவையாகும்.

இதனால் தான், `பத்து மிளகு இருந்தால், பகைவர் வீட்டிலும் சாப்பிடலாம்', என்று முன்னோர்கள் கூறினர். அத்துடன் மருத்துவக்குணம் கொண்ட பொருட்கள் வீட்டில் இருப்பதால் அவற்றை `வீட்டுக்குள் டாக்டர்கள்' என்கின்றனர். நம்முடைய உணவே மருந்தாக இருப்பதால் அவற்றை முறையாக சாப்பிட்டாலே டாக்டர்களை சந்திக்க வேண்டியதை குறைத்துக் கொள்ளலாம் என்று முன்னோர்கள் கூறி உள்ளனர்.

அதேபோல் `பசிக்கு ருசி தெரியாது, ருசிக்கு வரப்போகும் நோய் தெரியாது' என்பதால் உணவு முறைகளைப் பற்றி முன்னோர்கள் தெளிவான வழிமுறைகளை வகுத்துள்ளனர். ஆனால் அதை நாம் பின்பற்றாமல் எங்கே உணவு கிடைத்தாலும், என்ன உணவு கிடைத்தாலும் சாப்பிடும் பழக்கத்தை கடைப்பிடிப்பதால் அடிக்கடி மருத்துவர்களை சந்திக்க வேண்டிய நிலை ஏற்படுகிறது. இருந்தாலும் நாகரிக காலத்தில் ஒவ்வொரு குடும்பத்தினரும் தங்களுக்கு என்று ஒரு ` குடும்ப டாக்டர்` களை நியமித்துக் கொள்வது காலத்தின் கட்டாயமாக உள்ளது.

மேற்கு வங்க முதல்-அமைச்சர்

மேற்கு வங்க மாநிலத்தின் தோற்றுவிக்கப்பட்டு இரண்டாவது முதல்-மந்திரியாக இருந்தவர் பிடன் சந்திர ராய் (பி.சி.ராய்). 1882-ம் ஆண்டு ஜுலை 1-ந் தேதி பிறந்த இவர், நாட்டிலேயே தலைசிறந்த மருத்துவராக இருந்துள்ளார். (1948-ம் ஆண்டு ஜனவரி 14-ந் தேதி முதல் 1962 ஜுலை 1-ந் தேதி வரை) 14 ஆண்டுகள் மேற்கு வங்க மாநில முதல்வராக திறம்பட பணியாற்றி உள்ளார். மருத்துவத்துறையில் திறம்பட பணியாற்றி பல்வேறு சாதனைகளை படைத்ததுடன், தன்னலம்பாராது பிறர்நலன் கருதி மகத்தான மருத்துவச்சேவை செய்ததால், மத்தியஅரசு 1961-ம் ஆண்டு பிப்ரவரி 4-ந் தேதி பிடன் சந்திர ராய்க்கு பாரத ரத்னா விருது வழங்கி கவுரவித்தது.

இந்திய மருத்துவத்துறைக்கு பெருமை தேடி தந்த பிடன் சந்திர ராய் தன்னுடைய 80-வது வயதில், அதாவது 1962-ம் ஆண்டு ஜுலை 1-ந் தேதி இறந்தார். அவர் செய்த மருத்துவ சேவையை நினைவு கூறும் வகையில் இந்திய மருத்துவக்கழகம் அவருடைய பிறந்த நாளும், இறந்த நாளும் ஜுலை 1-ந்தேதி வருவதால், அன்றைய தினத்தை `தேசிய மருத்துவர் தினமாக' அனுசரித்து வருகிறது. தொடர்ந்து மருத்துவத்துறையில் சேவையாற்றி வருபவர்களுக்கு `டாக்டர் பி.சி.ராய்' விருது தற்போது வழங்கப்பட்டு வருகிறது. மருத்துவர் தினம் நாட்டுக்கு நாடு வேறுப்படுகிறது.

மருத்துவர்தின வாழ்த்துக்கள்

`நோயற்ற வாழ்வே குறைவற்ற செல்வம்' இந்த கருத்தை மையமாக கொண்டு உடல்நலன் காக்கும் பணியில் நம் மருத்துவர்கள் செயல்படுகின்றனர்.

தன்னலம் பாராது பிறர்நலம் கருதி, சுயநலம் இல்லாமல் மகத்தான மருத்துவ சேவையை மனித நேயத்துடன் சேவை ஆற்றும் மருத்துவர்களை வாழ்த்தும் தினமாகவும், மருத்துவத்துறையை மேம்படுத்தும் தினமாகவும் அரசு பல்வேறு நடவடிக்கைகளையும் எடுத்து வருகிறது. எனவே இன்று உங்கள் டாக்டருக்கு தேசிய மருத்துவர்தின வாழ்த்துக்களை கூறலாம்.

மருத்துவர்தின வாழ்த்துக்கள்

மருத்துவர் தின வாழ்த்துக்கள்

தன்னலம் கருதாமல் பிறர்நலம் பேணும் மருத்துவர்கள் அனைவருக்கும் "மருத்துவர் தின வாழ்த்துக்கள்"

நல்ல மருத்துவர்களுக்கு வாழ்த்துகள்.

அப்ப பத்து மிளகோட வடை, பாயசம் சாப்பிட நீங்க ரெடியா ராஜா?