மூளையில் ஆபரேஷன் செய்து குழந்தையின் சிரிப்பு நோயை குணப்படுத்திய ஜிப்மர் டாக்டர்கள்

சென்னையை சேர்ந்த தம்பதிகளின் ஒரு வயது பெண் குழந்தை அடிக்கடி திடீரென சிரிக்க தொடங்கியது. அப்போது நிதானத்தை இழந்தும் செயல்பட்டது. இதனால் சந்தேகமடைந்த பெற்றோர் குழந்தையை சென்னையில் உள்ள குழந்தைகள் மருத்துவரிடம் பரிசோதித்தனர். அவர் நரம்பியல் நிபுணர்களிடம் காண்பிக்குமாறு அறிவுருத்தினார்.

இதனையடுத்து புதுவை ஜிப்மர் மருத்துவமனைக்கு குழந்தையை அழைத்து வந்தனர். ஜிப்மர் டாக்டர்கள் குழந்தையை பரிசோதித்ததில் மூளையில் அரிய வகை கட்டி இருப்பது தெரியவந்தது. இத்தகைய கட்டி ஆபத்தானது. வலிப்பு நோயை உண்டாக்குவதோடு மூளை வளர்ச்சியையும் பாதிக்கும். இதனை மருந்துகளால் சரி செய்ய இயலாது என்பதால் அறுவை சிகிச்சை செய்ய ஜிப்மர் டாக்டர்கள் முடிவு செய்தனர். இதற்கு பெற்றோரும் அனுமதி அளித்தனர்.

இதனையடுத்து டாக்டர் ரூபேஷ்குமார் தலைமையில் டாக்டர்கள் அறுவை சிகிச்கை செய்தனர். மைக்ரோஸ்கோப் மூலம் 4 மணி நேரம் நடந்த அறுவை சிகிச்சைக்கு பின் கட்டி முற்றிலும் அகற்றப்பட்டது. அறுவை சிகிச்சைக்கு பின் குழந்தை நன்றாகி குணமடைந்தது.

மேலும் சிரிக்கும் வலிப்பு நோயும் முற்றிலும் நின்று போனது. இதுகுறித்து டாக்டர் ரூபேஷ்குமார் கூறியதாவது:-

முளையில் முக்கிய பகுதியான சைதபோதயாமஸ் என்ற பகுதியில் கட்டி ஏற்பட்டுள்ளது. இந்த பகுதியை சுற்றிலும் முக்கிய நரம்புகளும், ரத்த குழாய்களும் உண்டு. இந்த இடத்தில் உள்ள கட்டியை அகற்றுவது சவாலானது. ஆபத்தானது. இருப்பினும் மைக்ராஸ்கோப் உதவியுடன் 4 மணி நேரம் அறுவை சிகிச்சை செய்து கட்டி அகற்றப்பட்டது. இதனால் மூளை வளர்ச்சி குறைபாட்டில் இருந்தும் குழந்தை தப்பியது.

இவ்வாறு டாக்டர் ரூபேஷ்குமார் கூறினார்.

அறுவை சிகிச்சை செய்த டாக்டர்கள் குழுவினருக்கு குழந்தையின் பெற்றோர் நன்றி தெரிவித்தனர்.................. நன்றி ........

மாலைமலர்