மூன்று நாள் தொடர் விடுமுறையால் தமிழக குடிமகன்கள் திணறல்

**ராஜா** · **ராஜா** Sun 27 Jan 2013 - 13:08

சென்னை :மிலாது நபி, குடியரசு தினம், வள்ளலார் தினத்தை முன்னிட்டு, மூன்று நாட்களுக்கு, "டாஸ்மாக்' கடைகள் மூடப்பட்டதால், குடிமகன்கள் சரக்கு கிடைக்காமல் திணறினர். ஆனால், ஐகோர்ட் தடையால், மேல்தட்டு வர்க்கத்தினருக்காக, "பெக்' கணக்கில் விற்கப்படும், நட்சத்திர ஓட்டல்கள், கிளப்களில் மட்டும், சரக்கு தாராளமாய் கிடைத்தது.

தமிழகத்தில், நட்சத்திர ஓட்டல், கிளப்களில், "பார்'கள் உள்ளன. கிளப்களில், பல லட்சம் பணம் கட்டி உறுப்பினர்களாக உள்ளவர்களுக்கு மட்டுமே, அனுமதி உண்டு. நட்சத்திர ஓட்டல்களில் செயல்படும் "பார்'களுக்கு, மேல்தட்டு மக்கள் மட்டுமே செல்ல முடியும். உடலுழைப்பு களைப்பு தீரவும், "மப்பில்' மிதப்போருக்கும், டாஸ்மாக் சரக்கு தான் சொர்க்கம்.ஆனால், ஜனவரி மாதத்தில், ஏற்கனவே பொங்கல், திருவள்ளுவர் தினம் என, தொடர்ச்சியாக வந்த "டாஸ்மாக்' விடுமுறையால், குடிமகன்கள் தவித்துப் போயினர். தொடர்ந்து, மிலாது நபி, குடியரசு தினம், வள்ளலார் தினம் என, அடுத்தடுத்து வந்த விடுமுறையால், டாஸ்மாக் பக்கம் குடிமகன்கள் திரும்ப முடியாமலேயே போய் விட்டது.தமிழகம் முழுவதும், செயல்பட்டு வரும், 1,500க்கும் மேற்பட்ட ஓட்டல் பார்கள் மற்றும்கிளப்களுக்கு கூடுதல் விடுமுறைகளை, தமிழக அரசு கடந்தாண்டு அக்டோபர் மாதம் வெளியிட்ட அரசாணை மூலம் உறுதி செய்தது. கிளப் பார்களுக்கு, கூடுதலாக, ஐந்து நாட்கள் விடுமுறை,
நட்சத்திர ஓட்டல் பார்களுக்கு, கூடுதலாக ஏழு நாட்கள் விடுமுறையை அறிவித்தது.
அரசின் இந்த உத்தரவை எதிர்த்து, ஓட்டல்கள் சங்கத்தினர், கோர்ட்டிற்கு போய், அதில் வெற்றியும் கண்டனர். விளைவு, டாஸ்மாக் விடுமுறை தினங்களிலும், நட்சத்திர ஓட்டல்கள், கிளப்களில் சிலவற்றை தவிர, பெரும்பான்மையானவை திறந்திருந்தன. இதனால், பாதிக்கப்பட்டது, டாஸ்மாக் கடையை நம்பியிருந்த ஏழை, "குடி'மகன்கள் மட்டுமே. இதனால், பலரும் டாஸ்மாக் மது பாட்டில்களை பதுக்கி வைத்து விற்பனைசெய்து வருகின்றனர். மோப்பம் பிடித்த போலீசார், "ரெய்டு' நடத்தி, மது பாட்டில்களை பிடித்து, பதுக்கியவர்களை கைது செய்தனர்.இதிலும் பிடிபட்டது, கொஞ்சம் தான்; இதிலும், 65லிருந்து, 100 ரூபாயுள்ள குவார்ட்டர் பாட்டில்கள், 150லிருந்து, 250 ரூபாய் வரை விற்கப்பட்டுவருகிறது. இதுபோன்ற விற்பனையால், அரசுக்கு நஷ்டமே.அதே போல், தாராளமாக புதுச்சேரி சரக்கும், தமிழகத்திற்கு கொண்டு வந்து விற்கப்பட்டுள்ள சம்பவமும் நடந்துள்ளது.