நேற்றும் இன்றும் !! (கிரிகாசன்)

**kirikasan** · **kirikasan** Fri Mar 01, 2013 1:28 pm

1.செத்தாற் சிரிப்பாயோ??

செத்தேனாம் என்றாற்
....சிரித்திடவோ யன்னைநீ சித்தங் கொண்டாய்
எத்தேனும் பாகுடனே
....இனிப்புங் கலந்துன்னை இரந்துகொள்வேன்
வித்தேனோ என்னில்
....விரும்பித் தமிழூன்றி விளைத்தா யின்றோ
கத்தேனோ ஒவென்று
....கத்திக் கதறுமுயிர் காவாயோ சொல்

உற்றேனோ உள்ளத்தே
....யுருகித் தமிழ்சொல்லும் உணர்வையீந்தாய்
சற்றேனும் நெஞ்சத்
....தழல் தனை ஆற்றென்னச் சஞ்சலத்தில்
பற்றேனோ என்றேதீ
....பற்றவே கூற்றுவன் பாதாளத்தில்
நிற்போனைக் கொண்டுடலும்
....நீறாக்கி நீரிடவோ நெஞ்சங்கொண்டாய்

கற்றேனோ யின்பங்கொள்
....கவிசெய்யும் சொற்கூட்டக் கலையைஎங்கும்
சொற்தேனோ கொள்ளச்
....சுவைமிக்க பாமலர்கள் செய்யும் வண்ணம்
பற்றேனோ கொண்டென்னில்
....பரவச வுணர்வீந்து பாடவைத்தாய்
முற்றேனோ வைத்திடவும்
....முடிவுசெய்தாயின்று மூலப் பொருளே

சொல்லுஞ் சுவைக்கரும்பில்
....சுற்றிமலர் பூந்தமிழின் சோலைப்பூக்கள்
வில்லுங் கணையென்றே
....வித்தகனாய் வைத்துமங் கதன்போ லென்னை
அல்லும் பகற்கணைகள்
....அள்ளியெறி என்றுவிதி யாக்கிப் பின்னே
சொல்லுன் தூயமனம்
....தீயெண்ணங் கொள்ளெனச் செய்தவர் யார்?

எள்ளு மிவன் என்றே
....யெண்ணியுன் திருப்பாதம் கொண் டுதைத்து
தெள்ளென் சுவைப்பாவைத்
....தீட்டிய நல்லோவியம் திங்கள்வானில்
உள்ளதெனப் பிரகாச
....ஒளிசெய்தாற் போலென்னை உணரவைத்துக்
கொள்ளக் குறையாகித்
....தேயென்று கொடும்வரத்தைக் கொடுத்ததேனோ

அள்ளித்தா எனதன்பின்
....அன்னையிலும் மேலான அருட்சுடரே
கொள்ளத் தணல்மீது
....குற்றுயிராய் கிடவென்று கூறல்விட்டு
வெள்ளி தாரகையாய்
....வானத்தின் கதிரெறிக்கும் வீச்சாய்சக்தி
துள்ளித்தான் கொண்டோடிச்
....சுந்தரமாய் தூயதமிழ் செய்யென்றாக்காய்
*******

**kirikasan** · **kirikasan** Fri Mar 01, 2013 1:31 pm

2. சிரிப்பில் மலர்ந்தேனோ

துள்ளி எழுந்துவிட்டேன் - மலர்த்
தோட்டத்து வண்ணமென
அள்ளி குளித்துவிட்டேன் - அருள்
யாக்கையில் தேக்கமுற
வெள்ளிமுளைத்தவிடி - காலை
வேளையில் தேறிவிட்டேன்
கள்ளி அவள் நிஜம்தான் - எந்தன்
காலத்தை யீந்தவளாம்

புள்ளி மயில் விரித்தால் - அந்தப்
பொன்னெழிற் தோகையிலே
தள்ளி கிடந்தலைகள் - அது
தாங்கிடும் பொய்கையிலே
பள்ளிக் கலைவகுப்பில் - அந்த
பாலகர் புன்சிரிப்பில்
உள்ளவள் என்னிடையே - ஏனோ
உள்ளம் அழவும்செய்வாள்

நள்ளிரவின் கருமை - பின்னர்
நாளிற் பகலொளியை
அள்ளி யளிப்பவளோ - கவி
ஆற்றலும் ஈந்தபின்னெ
பிள்ளையெனை அணுகி - அன்பில்
பேச்சின்றி நுள்ளுவதாய்
கொள்ளி அனல் சுடும்போல் - வலி
கொள்ளவும் செய்திடுவாள்

வள்ளமதில் கடலில் - எனை
வைத்துப் பயணமிட்டாள்
உள்ளமதில் சுடரை - அன்று
ஓங்கிடச் செய்தவளோ
வெள்ளமெனத் அருள்வாள் - பின்னர்
வேடிக்கையாய் அடிப்பாள்
பிள்ளையென் றாகிவிட்டேன் - இவள்
பாசத்தை ஏதுசொல்வேன்

**இளமாறன்** · **இளமாறன்** Fri Mar 01, 2013 2:39 pm

கற்றேனோ யின்பங்கொள்
....கவிசெய்யும் சொற்கூட்டக் கலையைஎங்கும்
சொற்தேனோ கொள்ளச்
....சுவைமிக்க பாமலர்கள் செய்யும் வண்ணம்
பற்றேனோ கொண்டென்னில்
....பரவச வுணர்வீந்து பாடவைத்தாய்
முற்றேனோ வைத்திடவும்
....முடிவுசெய்தாயின்று மூலப் பொருளே சூப்பருங்க

Sponsored content · Sponsored content

நேற்றும் இன்றும் !! (கிரிகாசன்)

நேற்றும் இன்றும் !! (கிரிகாசன்)

Re: நேற்றும் இன்றும் !! (கிரிகாசன்)

Re: நேற்றும் இன்றும் !! (கிரிகாசன்)

Re: நேற்றும் இன்றும் !! (கிரிகாசன்)

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக