முன்னுரைக்குப் பதிலாக- மனுஷ்யபுத்திரன்

Rangarajan Sundaravadivel · Rangarajan Sundaravadivel Sun Apr 14, 2013 9:03 am

இந்தக் கவிதைகள்
துயருற்ற ஆன்மாவின்
கடைசிக்குரல்
என்று எழுதும்
இலக்கிய விமர்சகரோ

இந்தக் கவிதைகள்
தீவிரமான மனச் சிதைவு
மற்றும் ஆளுமைச் சிக்கலின்
விளைவுகள் என்று முடிவு செய்யும்
உளவியல் மருத்துவரோ

இந்தக் கவிதைகள்
நீதிக்காக ரத்தம் சிந்துபவை
என்று நம்பும்
சமூகப் போராளியோ

இந்தக் கவிதைகள்
ரகசியமாக மறைக்கப்பட்ட கண்ணீரைத்
தொட்டுத் திறப்பவை என
கைகளைப்பற்றிக் கொள்ளும்
வாசகனோ

இந்தக் கவிதைகள்
தீராக் காதலின்
முடிவற்ற நடனம் என முத்தமிடும்
ரசிகையோ

ஒருபோதும் அறியவே இல்லை
இந்தக் கவிதைகளை எழுதுகிறவன்
ஒரு கவிஞனே அல்ல
ஒரு மகத்தான நடிகன் என்பதை.