திருப்தி இல்லாத எலி!

**சிவா** · **சிவா** Sun Sep 14, 2014 12:45 am

ஒரு நகரத்தில் மந்திர, தந்திரம் அறிந்த ஒரு சாமியார் வசித்து வந்தார். அவரிடம் ஒரு எலி வந்தது. அவரைப் பார்த்து, ""மகாத்மாவே, எனக்கு பூனைகளைக் கண்டால் மிகவும் பயமாக இருக்கிறது. அதனால் என் வலையை விட்டு என்னால் வெளியே வர முடியவில்லை. தயவுசெய்து என் மீது கருணை வைத்து என்னைப் பூனையாக மாற்றிவிடுங்கள். அப்போதுதான் நான் நிம்மதியாக வெளியே சுற்ற முடியும்'' என்றது.

எலி கூறியதைக் கேட்டவுடன், சாமியாருக்கு எலி மீது இரக்கம் ஏற்பட்டது. அதனால் தன்னுடைய மந்திர சக்தியினால் அந்த எலியைப் பூனையாக மாற்றிவிட்டார். பூனையாக மாறிய அந்த எலி, சாமியாருக்கு நன்றி கூறிவிட்டு மகிழ்ச்சியாகச் சென்றது.

சில நாள்களுக்குப் பிறகு, பூனையாக மாறிய அந்த எலி, சாமியாரிடம் வந்து, ""எனக்கு இப்போது பூனைகளைக் கண்டால் பயமில்லை. ஆனால், நாய்கள் மிகவும் தொல்லை தருகின்றன. நாய்களைப் பார்த்தால்தான் பயமாக இருக்கிறது. எனவே என்னை நாயாக மாற்றிவிடுங்கள்'' என்றது. உடனே சாமியார் அதை நாயாக மாற்றினார்.

சில நாள்களுக்குப் பிறகு நாயாக மாறிய அந்த எலி, மீண்டும் சாமியாரிடம் வந்து, சுவாமி, ""நான் நாயாக இருந்தாலும் காட்டுக்குச் செல்ல முடியவில்லை. காரணம். அங்கே ஒரு பயங்கரமான கொடிய சிங்கம் வசிக்கிறது. அதைப் பார்த்தால் எனக்கு மிகவும் பயமாக இருக்கிறது. அதனால், என் மேல் கருணை வைத்து நீங்கள் என்னையும் ஒரு சிங்கமாக மாற்றிவிட்டால், உங்களுக்குப் புண்ணியமாகப் போகும்'' என்றது.

சாமியார் இந்த முறை விருப்பமில்லாமலேயே நாயாக இருந்த அந்த எலியைச் சிங்கமாக மாற்றினார்.

சிங்கமாக மாறிய அந்த எலி கர்ஜித்துக்கொண்டே, காட்டுக்குள் சென்று விட்டது.

சிங்கமாக மாறியபிறகும் கூட அதற்கு திருப்தி ஏற்படவில்லை. அது மீண்டும் சாமியாரிடம் வந்து, ""சுவாமி, சொல்லப்போனால் காட்டில் நான்தான் மிகுந்த பலசாலியாக இருக்கிறேன். ஆனாலும் வேட்டையாடுபவர்களைக் கண்டால் எனக்கு மிகவும் பயமாக இருக்கிறது.

நீங்களே சொல்லுங்கள்... இப்போது நான் என்ன செய்வது?'' என்று கூறி வருத்தப்பட்டது.

எலிக்கு இருந்த சின்னச் சின்ன ஆசைகளை அறிந்த, அந்தச் சாமியார் மிகவும் சோர்ந்து போனார்.

சிங்கமாக இருந்த எலியை மீண்டும் பழைய படியே எலியாக மாற்றிவிட்டு, ""இனி, உனக்கு எதுவும் ஆகாது. உனக்குள்ளே எலியினுடைய ஆத்மாதான் இருக்கிறது. அதனால் நீ எலியாகவே இரு'' என்றார்.

எலி பழையபடி தன் உருவத்தைப் பெற்றுக்கொண்டு, சாமியாரிடம் ஒன்றும் பேசாமல் அங்கிருந்து சென்றுவிட்டது.

சிறுவர்களே.... இக்கதையிலிருந்து நாம் கற்றுக்கொள்ளும் பாடம் இதுதான்: திருப்தி இல்லாதவர்கள் யாராக மாறினாலும், எங்கு இருந்தாலும் நிம்மதியாக வாழ முடியாது. "போதும் என்ற மனமே பொன்செய்யும் மருந்து' என்ற பழமொழிக்கு ஏற்ப வாழக் கற்றுக்கொண்டால், நமக்கு எந்நாளும் துன்பம் இல்லை.

வடமொழி நாடோடிக் கதை-தமிழில்