80 சதவீத இணையதள மருத்துவ தகவல்கள் நம்பகமானதல்ல

**சிவா** · **சிவா** Wed Sep 09, 2015 6:04 am

இணையதளத்தில் உள்ள 80 சதவீத மருத்துவத் தகவல்கள் நம்பகமானதல்ல என, சென்னை ராஜீவ் காந்தி அரசு பொது மருத்துவமனை இரைப்பை குடல் அறுவைச் சிகிச்சைத் துறைத் தலைவர் டாக்டர் எஸ்.எம். சந்திரமோகன் கூறினார்.

இந்தத் துறையின் சார்பில் சுதந்திர தின விழா சனிக்கிழமை நடைபெற்றது. அதில், "இணையதள மருத்துவ அறிவு வரமா? சாபமா?' என்ற தலைப்பில் விவாதம் நடைபெற்றது.

இணயதளத்தில் மருத்துவத் தகவல்களை வெளியிடுவது பயனுள்ளதாக இருப்பதாக ஒரு தரப்பினரும், இணையதளத்தில் உள்ள மருத்துவத் தகவல்களால் குழப்பமும் அதைப் பின்பற்றினால் பின்விளைவுகளும் ஏற்படுவதாக மற்றொரு தரப்பினரும் தெரிவித்தனர்.

இதுகுறித்து டாக்டர் எஸ்.எம். சந்திரமோகன் கூறியது:

இணையதளத்தில் வெளியிடப்படும் கருத்துகளில் 20 சதவீதம் மட்டும் நம்பகத் தகுந்ததாகும். 80 சதவீத தகவல்கள் தவறான கருத்துகளே ஆகும். மேலும் ஒரு மருத்துவம் தொடர்பான ஒரு கட்டுரை அல்லது தகவல், அது வெளியிடப்பட்ட சமயத்தில் சரியானதாக இருந்திருக்கலாம்.

அந்தத் தகவலை பத்து ஆண்டுகள் கழித்து ஒருவர் படிக்கும் நிலையில், அந்த நேரத்தில் அது பொருந்தாததாகிவிடும். எனவே, இணையதளத்தில் தகவல்களைப் பெற்றுக் கொள்ளலாம்.

அதில் கூறப்படும் சிகிச்சைகள், மருத்துவ முறைகளை மருத்துவர்களின் ஆலோசனை இல்லாமல் பின்பற்றக்கூடாது என்று அவர் தெரிவித்தார்.