தமிழா!! உணர்வால் நீ தமிழன்!

தமிழா!! உணர்வால் நீ தமிழன்!
பாண்டியன் நெடுஞ்செழியன் , தான் கூறிய தீர்ப்பு தவறென்றுணர்ந்த கணம் , அந்த அரசவையிலேயே உயிரை மாய்த்துக் கொள்கிறான். சேரன் பெருஞ்சேரல் , இமயமலையில் வெற்றிக்கோடியை நாட்டியுள்ளான். கரிகால்வளவன், ஆக்க பூர்வ சிந்தனையில், கல்லணையை கட்டுகிறான்.மாமல்லன், சிற்பக்கலையில் உலகிற்கே எடுத்துக்காட்டாக மாமல்லபுரத்தை உருவாக்கினான். இராசராச சோழன், வானுயர்ந்த தஞ்சை பெரிய கோயிலைக்கட்டி, வான் புகழடைந்தான். அவன் மகன், இராசேந்திர சோழன், இந்திய துணைக்கண்டத்தில் பெரும் பகுதியையும், தென் கிழக்கு ஆசியாவையும் தன் குடையின் கீழ் கொண்டு வந்தான். அதியமான் , தனக்கு கிடைத்த அரிய நெல்லிக்கனியை, தான் உண்டு, ஆயுளை நீட்டித்துக்கொள்வதைவிட, ஔவையார் உண்டால், தமிழகம் பயன் பெறும் என்று , எண்ணி,ஔவைக்கு கனியை அளித்து வள்ளல் என பெயர் பெறுகிறான். சாலையோரத்தில் விட்டுச்சென்ற தன் தேரின் மேல் படர்ந்த மலர்க்கொடியை அறுத்தெறிய மனமில்லாமல் , தேரை அந்த தாவரத்திற்கு விட்டுச் சென்று, வரலாற்றில் தன் மென்மையான மனதிற்காக இடம் பிடிக்கிறான் பாரி வள்ளல்....இந்த பதிவில் இடம் கொள்ளாது , நம் மூதாதையரின் புகழ் பாட. மெய் சிலிர்க்கும் நிகழ்வுகள் , சாதனைகள். தமிழர் பழம் பெருமை, மிகவும் அருமை.
தமிழா, இவர்கள் வழிவந்தவன் நீ ,
இவர்களின் உயிர் அணுக்கள்(gene) உன்னிடம் உள்ளது உண்மை. மேற்கூறியது வரலாறு. வரலாறு சோறு போடாது! பழம் பெருமை பேசி அதில் குளிர் காயாதே!!நீ உன் வரலாற்றை அவர்கள் வழி எழுது.ஆதலால், நீயும், உன் திறமையை உலகிற்கு காண்பிக்க முயற்சி செய். உன் கடமைகளை ஔவை கூற்றிற்கிணங்க "செய்வன திருந்தச்செய்".
நெடுஞ்செழியன் போல் அறம் சார்ந்த வாழ்க்கை வாழ்!! கரிகாலனை போல ஆக்க பூர்வமான செயலில் இறங்கு. பாரி போல் மற்றவர்களின் உணர்வை மதி.வீரத்திற்கு உதாரணமான, இராசேந்திர சோழன், மதுவை தொட்டதில்லை. உன் வீரம் முழுமையாக வெளிப்பட வேண்டுமெனில், மதுவை தொடாதே!!!. குண்டு சட்டியை விட்டு எல்லைகள் கடந்து உன் வாழ்க்கை பயணத்தில் வீறு நடை போடு, பெருஞ்சேரல் போல்!!!
செயலில் இறங்கு! செயல்படு. செயலால் நான் தமிழன் என காட்டு.இவன்தான் தமிழன் என உலகிற்கு மார் தட்டிச்சொல். வாழ்த்துக்கள் ! வெற்றி உனக்கே!!!