நகைக்கடை போராட்டம் வாபஸ்!

18 நாள் 'ஸ்டிரைக்'கால் நகைக்கடைகளுக்கு இழப்பு ரூ.70 ஆயிரம் கோடி:போராட்டம் வாபஸ் ஆனதால் குறைந்தது பாதிப்பு!

புதுடில்லி:தங்க நகைகளுக்கு, 1 சதவீதம் கலால் வரி விதிக்கும் முடிவை எதிர்த்து, நகைக்கடை உரிமையாளர்கள், 18 நாட்களாக நடத்திய வேலைநிறுத்த போராட்டத்தால், அந்த துறைக்கு, 70 ஆயிரம் கோடி ரூபாய் இழப்பு ஏற்பட்டுள்ளதாக கணக்கிடப்பட்டு உள்ளது. 'நகைக்கடை உரிமையாளர்களை, கலால் வரித்துறையினர் துன்புறுத்த மாட்டர்' என, மத்திய அரசு உறுதியளித்ததை அடுத்து, இந்த போராட்டம் வாபஸ் பெறப்பட்டுள்ளது.

உலகில், தங்க நகைகளுக்கு அதிக கிராக்கி உள்ள இரண்டாவது நாடு, இந்தியா. இதனால், வெளிநாடுகளில் இருந்து கணிசமான அளவில் தங்கம் இறக்குமதி செய்யப்படுகிறது. இது, அன்னிய செலாவணியை பாதிக்கிறது. இதனால் தங்கம் இறக்குமதியை கட்டுப்படுத்த, மத்தியில் ஆட்சியில் இருந்த முந்தைய அரசுகள், இறக்குமதிக்கு வரி உள்ளிட்ட பல கட்டுப்பாடுகளை
விதித்தன.

கலால் வரி:இந்நிலையில், மத்தியில் ஆட்சியில் உள்ள பா.ஜ., தலைமையிலான தே.ஜ., கூட்டணி அரசு, பிப்., 29ல் பார்லிமென்டில் தாக்கல் செய்த, 2016 - 17ம் நிதியாண்டுக்கான பட்ஜெட்டில், தங்க நகைகளுக்கு, 1 சதவீதம் கலால் வரி விதிக்க இருப்பதாக அறிவித்தது.
இந்த வரியை திரும்பப் பெறக்கோரி, நகைக்கடை உரிமையாளர்கள் தொடர் போராட்டங்களை நடத்தினர். இருப்பினும், 'கலால் வரி விதிக்கும் முடிவை திரும்பப் பெறப் போவதில்லை' என, நிதி அமைச்சர் அருண் ஜெட்லி திட்டவட்டமாக மறுத்துவிட்டார்.

மூவர் குழு:இந்த சூழ்நிலையில், நகைகள் ஏற்றுமதி வளர்ச்சி கவுன்சில், இந்திய நகைக்கடை உரிமையாளர்கள் சங்கம் உள்ளிட்ட பல்வேறு சங்கங்களின் பிரதிநிதிகள், மத்திய நிதி அமைச்சர் அருண் ஜெட்லியை, நேற்று முன்தினம் சந்தித்து பேசினர். அதேபோல, பா.ஜ., தலைவர் அமித் ஷா, மத்திய அமைச்சர் பீயுஷ் கோயல் ஆகியோரையும் சந்தித்து பேசினர். அப்போது, 'நகைகளுக்கு கலால் வரி விதிப்பது தொடர்பான பிரச்னைகள் குறித்து ஆய்வு செய்வதற்கு, பிரபல பொருளாதார வல்லுனரும், பொருளாதார விவகாரங்களுக்கான முன்னாள் தலைவருமான அசோக் லஹிரி தலைமையில், மூன்று பேர் கொண்ட குழு அமைக்கப்படும்; 60 நாட்களில் இக்குழு அரசுக்கு அறிக்கை அளிக்கும்' என, அரசு தரப்பில் தெரிவிக்கப்பட்டது.மேலும், 'கலால் வரித்துறை அதிகாரிகள், நகைக்கடை உரிமையாளர்களை துன்புறுத்தமாட்டர்' என, உறுதியும் அளிக்கப்பட்டது.

'ஸ்டிரைக்' வாபஸ்:இதையேற்ற நகைக்கடை உரிமையாளர்கள், 18 நாட்களாக நடத்திய வேலை
நிறுத்த போராட்டத்தை, நேற்று முன்தினம் இரவு வாபஸ் பெற்றனர்.

இழப்பு:நகைக்கடை உரிமையாளர்கள் நடத்திய, 18 நாட்கள் போராட்டத்தால், அந்த துறைக்கு, 70 ஆயிரம் கோடி ரூபாய் வரை இழப்பு ஏற்பட்டுள்ளதாக, நகைகள் ஏற்றுமதி வளர்ச்சி கவுன்சில் தெரிவித்துள்ளது.

கவுன்சில் தலைவர் பிரவீன் சங்கர் பாண்டியா கூறுகையில், ''இந்த துறையை நம்பி, 45 லட்சம் பேர் உள்ளனர். மொத்த உள்நாட்டு உற்பத்தியில், 3.5 சதவீதம் என்றளவில், 3.15 லட்சம் கோடி ரூபாய் பங்களிப்பை வழங்குகிறது,'' என்றார்.தமிழகத்தில் இழப்பு எவ்வளவு?
சென்னை தங்கம் மற்றும் வைர நகை வியாபாரிகள் சங்க தலைவர் ஜெயந்திலால் சலானி கூறியதாவது:தங்க நகை மீது விதிக்கப்பட்ட கலால் வரிக்கு எதிர்ப்பு தெரிவித்து, தமிழகம் மற்றும் புதுச்சேரியில் உள்ள, 35 ஆயிரம் நகைக் கடைகள், 18 நாட்களாக மூடப்பட்டன. இதனால், தங்கம் சார்ந்த தொழில்களில், 6,500 கோடி ரூபாய் மதிப்பிற்கு வியாபாரம் பாதிக்கப்பட்டது.
இவ்வாறு அவர் கூறினார்.

விற்பனையில் வீழ்ச்சி:இரண்டு லட்சம் ரூபாய் மற்றும் அதற்கு மேல் நகைகள் வாங்குவோர், 'பான்' எண்ணை குறிப்பிட வேண்டியது கட்டாயமாக்கப்பட்டது. அதற்கும், நகைக்கடை உரிமையாளர்கள் எதிர்ப்பு தெரிவித்துஉள்ளனர்

தங்க நகைகளுக்கு கலால் வரி விதிக்க, 2012ல் முடிவெடுக்கப்பட்டது. அப்போது நகைக்கடை உரிமையாளர்கள் நடத்திய போராட்டம் காரணமாக, அந்த வரி விதிப்பு வாபஸ் பெறப்பட்டது
2016 - 17ம் நிதியாண்டுக்கான பட்ஜெட்டில், தங்கத்துக்கான இறக்குமதி வரி குறைக்கப்படும் என்ற எதிர்பார்ப்பு நிலவியது. ஆனால் கலால் வரி விதிக்கப்பட்டது, அந்த துறையினரை அதிர்ச்சிக்கு உள்ளாக்கியதுகலால் வரி அறிவிப்பு மற்றும் விலை உயர்வு காரணமாக, தங்கம் விற்பனை பெருமளவில் குறைந்துள்ளது.

தினமலர்

எத்தனை கோடிக்கு 'பெட்டிகள்' கை மாறியதோ?.............