கொத்தமங்கலத்தில் விவசாய ஆழ்குழாய் கிணற்றில் எண்ணெய் வாசனையுடன் தண்ணீர் வந்ததால் பரபரப்பு

எண்ணெய் வாசனையுடன் தண்ணீர் வந்ததால் பரபரப்பு


கொத்தமங்கலம் கிராமத்தில் விவசாயத்திற்கு பயன்படுத்தப்படும் ஆழ்குழாய் கிணற்றில் இருந்து திடீரென எண்ணெய் வாசனையுடன் தண்ணீர் நிறம் மாறி வந்ததால் பரபரப்பு ஏற்பட்டது.
புதுக்கோட்டை மாவட்டம், கீரமங்கலம் அருகில் உள்ள கொத்தமங்கலத்தை சேர்ந்தவர் ரவிச்சந்திரன்(40) விவசாயி. இவர், மாரியம்மன் கோயில் அருகில் உள்ள தனது வயலில் பாசனத்திற்காக கடந்த 7 ஆண்டுகளுக்கு முன்பு சுமார் 300 அடி வரை ஆழ்குழாய் கிணறு அமைத்து அதில், மின் மோட்டார் வைத்து, தனது விவசாய நிலத்தில் விவசாயம் செய்து வருகிறார். தற்போது கடலை விவசாயத்திற்கு கடந்த சில தினங்களாக, தண்ணீர் பாய்ச்சி வந்துள்ளார்.
இப்பகுதிகளில், விவசாயிகளுக்கு இலவசமாக வழங்கப்படும் மும்முனை மின்சாரம் மாலை 3 மணி முதல் 6 மணி வரையும், இரவு 10 மணி முதல் காலை 6 மணி வரைக்கும் இருக்கும். இந்நிலையில், ஞாயிற்றுக் கிழமை மாலையில் கடலைக்கு தண்ணீர் பாய்ச்சமோட்டார் போட்ட போது, தண்ணீர் நிறம் மாறியதுடன் எண்ணெய் வாசனையுடன் மிகவும் சூடாக வந்துள்ளது. அந்த தண்ணீரில் கை வைத்தால் எரிச்சல் ஏற்பட்டுள்ளது.
இதனை பார்த்த ரவிச்சந்திரன் அதிர்ச்சியடைந்து தண்ணீரை விவசாயத்திற்கு பாய்ச்சாமல், வாளி, ட்ரம்களில் பிடித்து வைத்துள்ளார். இதுபற்றி அறிந்த வருவாய் துறையினர் விசாரணை செய்து வருகின்றனர். மேலும் விவசாய ஆழ்குழாய் கிணற்றில் எண்ணெய் வருவதாக தகவல் பரவியதால் அப்பகுதி பொதுமக்கள் வந்து பார்த்துச் சென்றதால் பரபரப்பு ஏற்பட்டது.
நன்றி
நக்கீரன்