ரூ.5,000 கோடி கடன் மோசடி: ஸ்டெர்லிங் பயோடெக் இயக்குநருக்கு நீதிமன்றம் அழைப்பாணை

ரூ.5,000 கோடி வங்கிக் கடன் மோசடி தொடர்பாக குஜராத்தைச்
சேர்ந்த ஸ்டெர்லிங் பயோடெக் நிறுவனத்தின் இயக்குநர்
ராஜ்பூஷண் ஓம்பிரகாஷ் தீட்சித்துக்கு தில்லி நீதிமன்றம்
அழைப்பாணை அனுப்பியுள்ளது.

அமலாக்கத் துறை சிறப்பு வழக்குரைஞர் நிதீஷ் ராணா
தாக்கல் செய்த இறுதிக் குற்றப்பத்திரிகையை அடிப்படையாகக்
கொண்டு, தில்லி கூடுதல் செஷன்ஸ் நீதிமன்ற நீதிபதி சதீஷ்
அரோரா அழைப்பாணை அனுப்புவதற்கு உத்தரவிட்டார்.

அதன்படி, வழக்கின் அடுத்த விசாரணை நடைபெறும்
ஆகஸ்ட் 8-ஆம் தேதியன்று ஓம்பிரகாஷ் தீட்சித், நீதிமன்றத்தில்
நேரில் ஆஜராக வேண்டும் என்று நீதிபதி உத்தரவு பிறப்பித்தார்.

இந்த வழக்கில் கைதான ஓம்பிரகாஷ் தீட்சித் தற்போது ஜாமீனில்
வெளியே உள்ளார்.

குஜராத் மாநிலத்தைச் சேர்ந்த ஸ்டெர்லிங் பயோடெக் மருந்து
தயாரிப்பு நிறுவனம், ஆந்திர வங்கி தலைமையிலான வங்கிகள்
கூட்டமைப்பிடம் இருந்து ரூ.5,000 கோடி கடன் வாங்கியது.

ஆனால், அந்த தொகையைத் திருப்பிச் செலுத்தாததால்,
அது வாராக்கடனாக மாறியது. இந்த மோசடிக்கு ஆந்திர வங்கியின்
உயரதிகாரிகளும் உடந்தையாக இருந்ததாகத் தெரிகிறது.

இந்த மோசடி தொடர்பாக, ஸ்டெர்லிங் பயோடெக் நிறுவனம்,
அதன் இயக்குநர்கள் சேதன் ஜெயந்திலால், நிதின் ஜெயந்திலால்,
தீப்தி சேதன், ஓம்பிரகாஷ் தீட்சித், விலாஸ் ஜோஷி, ஆடிட்டர்
ஹேமந்த் ஹாதி, கார்க் உள்ளிட்டோர் மீது சிபிஐ வழக்குப் பதிவு
செய்தது.

சிபிஐ பதிவு செய்த வழக்கின் அடிப்படையில், அமலாக்கத் துறை,
கருப்புப் பண மோசடி வழக்குப் பதிவு செய்து, விசாரணை நடத்தி
வந்தது.

இதையடுத்து, அமலாக்கத் துறை தனது இறுதிக் குற்றப்
பத்திரிகையை தாக்கல் செய்தது. அதில், இந்த வழக்கில் குற்றம்
சாட்டப்பட்டுள்ளவர்கள், கருப்புப் பண மோசடி சட்டத்தின் கீழ்
தண்டிக்கப்பட வேண்டியவர்கள் என்று குறிப்பிடப்பட்டுள்ளது.

அதனடிப்படையில் ஓம்பிரகாஷ் தீட்சித்துக்கு தில்லி நீதிமன்றம்
அழைப்பாணை அனுப்பியுள்ளது.

இந்த வழக்கில் குற்றம் சாட்டப்பட்டுள்ள ஆந்திர வங்கியின்
முன்னாள் இயக்குநர் அனூப் பிரகாஷ் கார்க் கடந்த பிப்ரவரி
மாதத்திலும், தில்லியைச் சேர்ந்த தொழிலதிபர் ககன் தவான்
கடந்த நவம்பர் மாதத்திலும் அமலாக்கத் துறையினரால் கைது
செய்யப்பட்டனர்.
-
---------------------------------
தினமணி

அழைப்பாணை மட்டும் தான்.நடவடிக்கை இருக்கவே இருக்காது. ஏற்கனவே அழைப்பாணை இருந்தும் போலீஸ் துணையுடன் சுற்றிக் கொண்டிருக்கிறார்கள்.

தேனீ என்று தமிழில் பெயர் மாற்றினால் சிறப்பு எய்தும்.