"கேட் கீப்பர்' மீது தாக்குதல்: திண்டுக்கல் எம்.பி.யை கண்டித்து ரயில்வே ஊழியர்கள் பணி புறக்கணிப்பு; ரயில்கள் நடுவழியில் நிறுத்தம்

**ayyasamy ram** · **ayyasamy ram** Mon Dec 03, 2018 12:25 pm

திண்டுக்கல் மாவட்டம், கொடைரோடு அருகே ஞாயிற்றுக்கிழமை
ரயில்வே "கேட் கீப்பரை' , திண்டுக்கல் மக்களவை உறுப்பினர்
உதயகுமார் தாக்கியதாகக் கூறி, ரயில்வே ஊழியர்கள் பணி
புறக்கணிப்பில் ஈடுபட்டனர்.

திருச்செந்தூரிலிருந்து பழனி வழியாக பாலக்காடு வரை செல்லும்
பயணிகள் ரயில் ஞாயிற்றுக்கிழமை மாலை 5.15 மணி அளவில்
கொடைரோடு வழியாக திண்டுக்கல் நோக்கி வந்து கொண்டிருந்தது.

இந்த ரயிலுக்காக, கொடைரோடு அடுத்துள்ள அழகம்பட்டி கடவுப்
பாதையில், கேட் கீப்பர் மணிமாறன் கேட்டை அடைத்தார்.

அப்போது, அந்த வழியாக நிலக்கோட்டையிலிருந்து ஜல்லிப்பட்டிக்கு
திண்டுக்கல் மக்களவை உறுப்பினர் மு.உதயகுமார் காரில்
வந்துகொண்டிருந்தார். கேட் மூடப்பட்டிருந்ததால், உதயகுமாரின் கார்
அங்கு நிறுத்தப்பட்டது.

ரயில் சென்றுவுடன், கேட் கீப்பர் மணிமாறினிடம் எம்.பி. உதயகுமார்
வாக்குவாதம் செய்ததாக கூறப்படுகிறது. தனது கார் வருவதை
அறிந்தே கேட்டை அடைத்துவிட்டதாக கூறி, எம்.பி உதயகுமார்
மணிமாறனை தாக்கியதாகவும் கூறப்படுகிறது.

இதுகுறித்து மணிமாறன், கொடைரோடு ரயில் நிலையத்துக்கு தகவல்
தெரிவித்தார். பின்னர், ரயில்வே நிர்வாகம் சார்பில் ரயில்வே காவல்
நிலையத்துக்கும், மதுரை கோட்ட அலுவலகத்துக்கும் தகவல்
தெரிவிக்கப்பட்டது.

இதனிடையே மணிமாறனுக்கு ஆதரவாக, அழகம்பட்டி பொதுமக்களும்
திரண்டதால் அங்கு பரபரப்பு ஏற்பட்டது. அப்போது, திண்டுக்கல்லிலிருந்து
மதுரை செல்லும் பயணிகள் ரயில் கொடைரோடு நோக்கி வந்தது.

ஆனால், கேட்டை அடைக்காமல் மணிமாறன் இருந்ததால், சிக்னல்
கிடைக்காமல் அந்த ரயில் நடுவழியில் நிறுத்தப்பட்டது. இதனை அடுத்து
அங்கு சென்ற ரயில்வே போலீஸார், மணிமாறனை சமாதானப்படுத்தினர்.

பின்னர், கேட் அடைக்கப்பட்டு, சுமார் 25 நிமிஷங்கள் கழித்து, அந்த ரயில்
புறப்பட்டுச் சென்றது.

எம்.பி. உதயகுமார் புகார்: இதனிடையே, கேட் கீப்பர் மணிமாறன்
தன்னை தாக்கியதாக கூறி எம்.பி.உதயகுமார் அம்மையநாயக்கனூர்
காவல் நிலையத்தில் புகார் அளித்துள்ளார்.

இப்பிரச்னை தொடர்பாக ரயில்வே ஊழியர்கள் சங்கம் மற்றும்
எம்.பி. உதயகுமார் இடையே பேச்சுவார்த்தைக்கு ஏற்பாடுகள் செய்யப்பட்டு
வருகின்றன. இரவு 8 மணிக்கு பணி மாற்றுவதற்கு வந்த ரயில்வே
ஊழியர்கள், கேட் கீப்பர் தாக்கப்பட்டது குறித்து அறிந்து போராட்டத்தில்
ஈடுபட்டனர்.

எம்.பி., மீது நடவடிக்கை எடுக்க கோரி, கேட்டை அடைக்காமல் பணிப்
புறக்கணிப்பில் ஈடுபட்டனர். இதனால், சென்னை செல்லும் அந்தியோதயா
விரைவு ரயில், அம்பாத்துரை அருகிலும், பாண்டியன் விரைவு ரயில்
கொடைரோடு ரயில் நிலையத்திலும் இரவு 10.15 மணி வரை நிறுத்தி
வைக்கப்பட்டது.
-
----------------
தினமணி

**பழ.முத்துராமலிங்கம்** · 27/09/2015

Code:: இப்பிரச்னை தொடர்பாக ரயில்வே ஊழியர்கள் சங்கம் மற்றும் எம்.பி. உதயகுமார் இடையே பேச்சுவார்த்தைக்கு ஏற்பாடுகள் செய்யப்பட்டு வருகின்றன. இரவு 8 மணிக்கு பணி மாற்றுவதற்கு வந்த ரயில்வே ஊழியர்கள், கேட் கீப்பர் தாக்கப்பட்டது குறித்து அறிந்து போராட்டத்தில்

எம்.பி தாக்கியிருப்பின் இது கண்டிக்கத்தக்கது.

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக