பாலம் இடிந்து விழுந்ததில் சாவு எண்ணிக்கை 50 ஆக உயர்வு?
இதுவரை 17 உடல்கள் மீட்பு

ஜெய்ப்பூர், டிச.26-
ராஜஸ்தானில் பாலம் இடிந்து விழுந்ததில் சாவு எண்ணிக்கை 50 ஆக உயரும் என்று தெரிகிறது. இடிபாடுகளில் இருந்து இதுவரை 17 பேரின் உடல்கள் மீட்கப்பட்டு உள்ளன.

ரூ.232 கோடியில் பெரிய பாலம்

ராஜஸ்தான் மாநிலத்தில் சம்பல் ஆற்றின் குறுக்கே கோடா-உதய்ப்பூர் ஆகிய நகரங்களை இணைக்கும் வகையில் குனஹரி என்ற இடத்தில் ரூ.232 கோடி செலவில் 1.4 கிலோ மீட்டர் தூரம் கொண்ட ராட்சத பாலம் கட்டப்பட்டு வருகிறது.

இதனை தனியார் கட்டுமான நிறுவனம் ஏற்றுக்கொண்டு கட்டி வருகிறது. இந்த பணியில் நாள் தோறும் 300-க்கும் மேற்பட்ட தொழிலாளர்கள் ஈடுபட்டு வருகிறார்கள்.

பாலம் இடிந்து விழுந்தது

இந்த நிலையில் நேற்று முன்தினம் பாலம் கட்டும்பணியில் ஏராளமான தொழிலாளர்கள் ஈடுபட்டிருந்தனர். அப்போது பாலத்தின் ராட்சத காங்கிரீட் தூண் ஒன்று இடிந்து ஆற்றுக்குள் விழுந்தது. அப்போது அதன்அடியில் வேலை பார்த்துக்கொண்டிருந்த 100-க்கும்மேற்பட்ட தொழிலாளர்கள் உயிருடன் ஆற்றுக்குள் புதைந்தனர்.

விபத்து பற்றிய தகவல் அறிந்ததும் மீட்புக்குழுவினர் விரைந்து வந்து இடிபாடுகளுக்குள் சிக்கியவர்களை மீட்கும் பணியில் ஈடுபட்டனர். முதலில் 6 தொழிலாளர்களின் பிணங்கள் மீட்கப்பட்டன. படுகாயம் அடைந்த 12 பேர் மீட்கப்பட்டு சிகிச்சைக்காக ஆஸ்பத்திரியில் சேர்க்கப்பட்டு உள்ளனர்.

இதுவரை 17 உடல்கள் மீட்பு

இடிபாடுகளில் சிக்கி ஆற்றுக்குள் ஏராளமானவர்கள் புதையுண்டு கிடப்பதால் மீட்பு பணியை துரிதப்படுத்த ராணுவம் மற்றும் சிறப்பு நீச்சல் பயிற்சி பெற்ற அதிரடி வீரர்கள், தீயணைப்பு வீரர்கள் வரவழைக்கப்பட்டு மீட்பு பணியில் ஈடுபடுத்தப்பட்டுள்ளனர்.
நேற்று காலை வரை மொத்தம் 17 பேரின் உடல்கள் மீட்கப்பட்டது. இன்னும் ஏராளமான தொழிலாளர்கள் இடிபாடுகளுக்குள் சிக்கியிருக்கலாம் என தெரிகிறது.

சாவு எண்ணிக்கை 50 ஆக உயர்வு?

இதனால் பாலம் இடிந்து விழுந்த விபத்தில் சாவு எண்ணிக்கை 40-ல் இருந்து 50 ஆக உயரும் என அஞ்சப்படுகிறது.
விபத்தில் காயம் அடைந்தவர்கள் 2 தனியார் ஆஸ்பத்திரிகளில் சிகிச்சைக்காக சேர்க்கப்பட்டு உள்ளனர். இதில் பல தொழிலாளர்களின் நிலைமை கவலைக்கிடமாக உள்ளது.

பலியானவர்களுக்கு ரூ. 10 லட்சம்

விபத்து நடந்த இடத்தை முதல்-மந்திரி அசோக்கெலாட் பார்வையிட்டு மீட்பு பணிகளை துரிதப்படுத்தினார். விபத்தில் பலியானவர்களின் குடும்பங்களுக்கு தலா ரூ.2 லட்சம் வழங்கப்படும் என்றும் பலத்த காயம் அடைந்தவர்களுக்கு ரூ.1 லட்சமும், சாதாரண காயம் அடைந்தவர்களுக்கு ரூ. 50 ஆயிரமும் வழங்கப்படும் என ராஜஸ்தான் அரசு அறிவித்து உள்ளது.
இதேபோல, தற்போது தேசிய நெடுஞ்சாலைத்துறை ஆணையத்தின் சார்பில் பலியான தொழிலாளர்களின் குடும்பங்களுக்கு தலா ரூ.10 லட்சம் வழங்கப்படும் என்றும் அறிவிக்கப்பட்டு உள்ளது.

2 என்ஜினீயர்கள் கைது

இந்த விபத்து தொடர்பாக அரசு முதல் கட்ட விசாரணையை தொடங்கி உள்ளது. இதுதொடர்பாக முதலில் தனியார் கட்டுமான கழகத்தின் 2 என்ஜினீயர்களை போலீசார் கைது செய்து உள்ளனர். மேலும் விசாரணை நடந்து வருகிறது.

ஊழல் எங்கும் ஊழல் , ஒரு மனித உயிரின் விலை இது தானா.

கூலித்தொழிலாளர்களின் மறைவு மிகவும் துயரமானது..