மஹா பெரியவா அருளுரை

பெரியவா சரணம் - மஹா பெரியவா அருளுரை
தியானத்தில் ஒருமுகப்படுவதற்குப் பெரிய இடைஞ்சல் என்ன? இந்த மனஸு ஓயாமல் ஆடிக் கொண்டிருப்பது தான்.
மனத்தினால் தான் எல்லா விதமான கஷ்டங்களும் உண்டாகின்றன. மனதில் ஏற்படும் ஆசையே அத்தனை கஷ்டங்களுக்கும் காரணம். 'ஆசைப்படாதே' என்று இந்த மனஸை இழுத்துப் பிடித்து வைக்க முடியவில்லை.
நாம் ' ஒரு வஸ்துவை நினை' என்று இந்த மனஸிடம் சொன்னால், அது ஏதோ சொற்ப காலம் அதை நினைப்பது போல இருந்து, வேறு எங்கோ பாய்ந்து விடுகிறது.
தியானம், சாந்தி என்றெல்லாம் நான் உபந்நியாசத்தில் சொல்கிற போது, ஒரு க்ஷணம் உங்கள் மனம் அடங்கினாற் போல் தோன்றும். ஆனால், அடுத்த க்ஷணமே மனம் எங்கோ ஓடி, சாந்தி குலைந்து போகிறது.
'பேசாமல் இரு' என்று கட்டளை போட்டு வாயை மூடிக் கொண்டு விட்டால், அது ஓரளவாவது பேசாதிருக்கிறது. ' பார்க்காதே' என்று உத்தரவு போட்டுக் கண்களை மூடிக் கொண்டு விட்டால் கண் ஓரளவாவது பார்க்காமல் இருக்கிறது.
ஆனால், இந்த மனஸிடம் மட்டும்' நினைக்காமல் இரு' என்று முட்டிக் கொண்டாலும், அது கேட்பதில்லை.
முதலில் மனஸை இப்படி, அப்படிப் போகாமல், நல்ல விஷயத்தில் நினைவைச் செலுத்தும் படிச் செய்ய வேண்டும். எண்ணெயை விட்டால் அது எப்படி பிசிர் இல்லாமல் ஒரே இழையாக விழுகிறதோ (இதைத் ' தைல தாரை' என்பார்கள்) அது மாதிரி மனம் நல்ல நினைவில் ஒருமுகப்பட்டுச் செல்ல வேண்டும்.
'ஸ்வாமி, ஸ்வாமி' என்ற நல்ல வஸ்துவை அப்படியே நினைத்துக் கொண்டிருக்கும் படி மனஸை அப்பியாசப்படுத்த வேண்டும். அதன் பிறகு 'நினைக்கிறோம்' என்பதும் போய், ஸ்வாமியிலேயே கரைந்து ஸ்வாமியாகவே ஆகி விடுவோம்..

நன்றி முகநூல் -காஞ்சி மஹான் --ஸ்ரீ ராகவேந்திரன்.