பொம்மையா நான்?

**Aathira** · **Aathira** Thu Apr 22, 2010 4:10 pm

பொம்மையா நான்?

அன்புடை இறைவ னென்பார்
யாரிவன்? முறையி னோடு

என்மன விருப்பம் கேட்டா
இந்நிலம் கொண்ர்ந்தான் என்னை?

வன்பசி நானா கேட்டேன்?
வயிறெனும் சுமையைத் தாங்கும்

துன்பெனக் கெதற்கு? என்றன்
சொல்லிதிற் சிறிதும் உண்டா?

குழவியாய், இளைஞனாய்ப் பின்
குமரனாய், முதுமை யுற்ற

கிழவனாய் நின்ற தோற்றம்
கேட்டபின் வந்த துண்டா?

உழலுவேன். மகிழ்வேன் கோடி
உணர்ச்சியில்; மனம் விரும்பி

பழகுவான் வேண்டி யானாய்ப்
படைத்தவை அவற்றுள் உண்டா?

பிறந்தது விருப்பால் இல்லை
பிறந்தபின் வாழ்வு முற்றும்

கரந்தனில் கிடைத்த தில்லை,
கழியுநாள் கழிய என்றோ

இறந்திடல் தவிர்ப்ப தில்லை
இயற்கையின் விளையாட் டிற்கு

சிறந்ததோர் பொம்மை யாநான்?
சிறுநிலை பொறுப்ப துண்டோ??

-குலோத்துங்கன்