90 புதிய கல்லூரிகளில் அண்ணா பல்கலைக்கழகம் ஆய்வு 12 ஆயிரம் என்ஜினீயரிங் இடங்கள் உயரும்

தமிழ்நாட்டில் அரசு, அரசு உதவி பெறும் மற்றும் தனியார் சுயநிதி பொறியியல் கல்லூரிகள் என மொத்தம் 452 கல்லூரிகள் உள்ளன. இந்த கல்லூரிகள் மூலம் ஒரு லட்சத்து 8 ஆயிரம் இடங்கள் கிடைக்கின்றன. இது தவிர மேலும் என்ஜினீயரிங் மற்றும் மேலாண்மை கல்லூரிகள் தொடங்க அனுமதி கேட்டு 90 பேர் அகில இந்திய தொழில் நுட்ப கவுன்சிலிடம் விண்ணப்பம் கொடுத்துள்ளனர். அதில் 50 பொறியியல் கல்லூரிகளும் 40 மேலாண்மை கல்லூரிகளும் அடங்கும்.

அவர்களுடைய விண்ணப்பங்களை பரிசீலித்து தகுதி உள்ள கல்லூரிகளுக்கு அங்கீகாரம் அளிப்பதற்கு அகில இந்திய தொழில் நுட்ப குழுமம் அண்ணா பல்கலைக்கழகத்திற்கு உத்தரவிட்டுள்ளது. இதனையடுத்து 3 பேர் வீதம் 4 குழுக்களை அண்ணா பல்கலைக்கழகம் அமைத்து ஆய்வு செய்து வருகிறது.

இதுகுறித்து சென்னை அண்ணா பல்கலைக்கழக துணை வேந்தர் டாக்டர் மன்னர் ஜவகர் கூறியதாவது:-

அண்ணா பல்கலைக்கழகம் அமைத்துள்ள குழு செவ்வாய்க்கிழமை இரவு முதல் புதன்கிழமை அதிகாலை 4.30 மணிவரை அனைத்து விண்ணப்பங்களையும் பரிசீலனை செய்தது. பரிசீலனையின் போது சில கல்லூரிகளில் தேவையான வசதிகள் செய்யப்படாதது தெரிய வந்தது. அந்த வசதிகளை சரி செய்து பல்கலைக்கழகத்திற்கு மீண்டும் விரைவில் விண்ணப்பிக்குமாறு அந்த கல்லூரிகளுக்கு உத்தர விடப்பட்டுள்ளது.

வருகிற 28-ந்தேதி அரசு ஒதுக்கீட்டு இடங்களுக்கான கலந்தாய்வு நடைபெறுகிறது. அதற்குள் அனைத்து கல்லூரிகளின் விண்ணப் பங்களும் பரிசீலிக்கப்பட்டு அவர்களுக்கு முடிவு தெரிவிக்கப்படும்.

அப்படி விண்ணப்பித்த 50 பொறியியல் கல்லூரிகளும் புதிதாக தொடங்கினால் கூடுதலாக 12,000 இடங்கள் கிடைக்கும். இதன் மூலம் கலந்தாய்வில் இடம் பெற்றுள்ள இடங்கள் 1 லட்சத்து 20 ஆயிரமாக உயரக்கூடும் என்று எதிர்பார்க்கப்படுகிறது.
இவ்வாறு அவர் கூறினார்.