தமிழகம் முழுவதும் போலி மருத்துவர்கள் 34 பேர் சிக்கினர்

தமிழகம் முழுவதும் போலி டாக்டர்களை கைது செய்யும் வேட்டை தீவிரப்படுத்தப்பட்டுள்ளது. சென்னை மற்றும் நெல்லையில் அலோபதி சிகிச்சை அளித்து வந்தது தொடர்பாக 34 போலி டாக்டர்கள் சிக்கினர். தமிழகம் முழுவதும் போலி டாக்டர்கள் 2 ஆயிரம் இருப்பதாக கூறப்படுகிறது. அவர்களை போலீசார் தீவிரமாக தேடி வருகின்றனர்.
எம்பிபிஎஸ் படிக்காமலேயே தமிழகத்தில் சிலர் டாக்டர் தொழில் செய்வதாக இந்திய மருத்துவ சங்கத்துக்கு புகார்கள் வந்தன. இதையடுத்து, மாவட்ட வாரியாக டாக்டர்கள் பட்டியல் சேகரிக்கப்பட்டது. இதில், தமிழகம் முழுவதும் 2 ஆயிரம் போலி டாக்டர்கள் இருப்பது கண்டுபிடிக்கப்பட்டது.

தமிழக டிஜிபி லத்திகா சரண், கூடுதல் டிஜிபி கே.ராதாகிருஷ்ணன் ஆகியோரை இந்திய மருத்துவ சங்க நிர்வாகிகள் சந்தித்து, தமிழகத்தில் உள்ள போலி டாக்டர்கள் பட்டியலை கொடுத்தனர். போலி டாக்டர்கள் மீது நடவடிக்கை எடுக்குமாறு வலியுறுத்தினர். இந்த பட்டியல் மாவட்ட வாரியாக பிரித்து எஸ்.பி.க்களுக்கு அனுப்பப்பட்டது. அதை வைத்து போலி டாக்டர்களை போலீசார் தேடி வந்தனர்.

சென்னை திருவொற்றியூர் டிஎஸ்ஆர் நகரில் அற்புதராஜ் (48), மார்க்கெட் பகுதியில் எஸ்.வி.கோயில் தெருவில் ராஜா (45), மாட்டுச்சந்தையில் எட்வின்தாஸ் (54), மந்தைவெளியில் முருகவேல் (35) ஆகியோரை போலீசார் பிடித்தனர். இவர்கள் அலோபதி சிகிச்சை அளித்து வந்தது கண்டுபிடிக்கப்பட்டது. 4 பேரையும் போலீசார் இன்று காலை பிடித்தனர். அவர்களிடம் தீவிர விசாரணை நடத்தி வருகின்றனர்.

நெல்லை மாவட்டத்தில் நான்குநேரி, களக்காடு, வள்ளியூர், ஏர்வாடி, மூலக்கரைபட்டி, விகேபுரம், கல்லிடைக்குறிச்சி, அம்பை உள்பட பல பகுதிகளிலும் போலீசார் நேற்று விடிய விடிய அதிரடி சோதனை நடத்தினர். இதில் களக்காட்டை சேர்ந்த சுப்பையா (73), கங்காதரன் (61), கோவில்பத்தை சேர்ந்த நாகராஜன் (30), கீழபத்தை சேர்ந்த முத்துசாமி (60) ஆகியோர் அலோபதி சிகிச்சை அளித்ததாக பிடிபட்டனர். டோனாவூரில் எமி (50) என்பவரும் கைது செய்யப்பட்டார். மாவட்டத்தின் பல்வேறு பகுதிகளிலும் 25 பேர் கைது செய்யப்பட்டனர்.

எம்பிபிஎஸ் படிக்காமல் அலோபதி சிகிச்சை அளிக்கும் போலி டாக்டர்கள் தமிழகம் முழுவதும் சுமார் 2 ஆயிரம் பேர் இருப்பதாக கூறப்படுகிறது. அவர்களை பிடிக்கும் நடவடிக்கைகள் மாநிலம் முழுவதும் தீவிரப்படுத்தப் பட்டுள்ளது.

34 அல்ல நண்பரே 170.
(நன்றி தினமலர்)